¿Tlenon kijtoua Biblia itech apistli tlen aman onka?
“Xok onias apistli”. Yejuin tlen kineki kichiuaskej akin tlayekana ipan nochi tlaltikpaktli niman ijkon kipopoloskej tlen melak kintlajyouiltia nochimej.a San ika, ¿ajsis se tonajli ijkuak xok onias apistli? ¿Tlenon kijtoua Biblia?
Biblia yokijtojka ika oniaskia apistli
Biblia yokijtojka ika aman, tlen notokayotiskia “itlamiyan tonaltin”, oniaskia apistli (2 Timoteo 3:1, TNM). XtoTajtsin itlajtlakol ika ijkon panotika, san ika, yejua yotechijlika ika ijkon nochiuaskia (Santiago 1:13). Matikitakan ome tlemach tlen Biblia yokijtojka ika nochiuas.
“Onyas apistli” (Mateo 24:7). Ipan yejuin texto kijtoua ika oniaskia apistli ipan miyek países. Temojkatlachialti tlen kemach okijtokej akin kuajli nomachtiaj itech kenon noxeloua tlakuajli: “Ipan yejuin tlaltikpaktli más ionka apistli, miyek tlakuajli xkipaleuiya totlalnakayo niman miyekej xkipiyaj tlen kikuaskej”.b Miyekej tlaltikpakchanejkej itech miyek países xuelij kipiyaj tlen kikuaskej, niman teajman ika miyekej mikij ipampa yejuin.
“Onikitak sen caballo tlilijki. On yejuan ipan yetiaya kitkiya sen tlatemachiuajli para ika tlatemachiuas” (Apocalipsis 6:5). Ipan yejuin texto yejon caballo niman akin ipan yeuatiaya kineskayotia apistli tlen oniaskia ipan itlamiyan tonaltin.c Akin yeuatiaya ipan caballo kitkiya se tlatemachiuajli tlen ika kitemachiuaskia tlakuajli. Chika yaya ipan caballo, se chikauak tlajtojli okijto ika tlakuajli melak patioj yeskia niman okimijli tlaltikpakchanejkej maka makinenpolokan tlakuajli tlen kipiayaj (Apocalipsis 6:6). Yejuin kijtosneki apistli tlen onka ipan nochi tlaltikpaktli ipan yejuin tonaltin, niman kenon miyekej tlaltikpakchanejkej xuelij kipiyaj nion kikouaj tlakuajli tlen maka makimijtlako.
Xok onias apistli
Akin ixtlamatkej kijtouaj ika yejuin tlaltikpaktli kichiua melak maonia miyek tlakuajli para nochi tlaltikpakchanejkej. Kuakon, ¿tleka miyekej xkipiyaj tlen kikuaskej? Niman ijkon ken kijtoua Biblia, ¿tlenon kichiuas totlachijchiujkauj, Jehová,d niman ijkon kiyektlalis tlen panotika?
Tlen xkuajli panotika: Tekiuajkej xuelij kichiuaj maka maonia apistli nion ika nochimej makipiyakan tlen ika kikouaskej tlen kikuaskej.
Ken noyektlalis: Tekiuajkej akin tlajtlakolejkej akin nemij ipan yejuin tlaltikpaktli, kintekipatlas se tekiuajyotl tlen xtlajtlakole: iTekiuajyo toTajtsin, niman Jesucristo yejua akin tlayekanas (Daniel 2:44; Mateo 6:10). Ipan yejuin tonaltin, miyekej akin xkipiyaj tomin ouijtika kitaj kikouaskej tlen kikuaskej. San ika, yejon nopatlas ijkuak iTekiuajyo toTajtsin peuas tlayekanas. Biblia kijtoua itech Jesús: “Yejua kimanauis on mayanki yejuan kitlajtlanilis ma kipaleui, niman kimanauis on yejuan tlajyouiya, yejuan xkipiya akinon kipaleuis. ¡Ma onya miyek trigo ipan on país, niman ma onya miyek trigo ipan on tepemej!” (Salmo 72:12, 16).
Tlen xkuajli panotika: Guerra kichiua melak matlaijtlakaui niman ika miyekej maka makipiyakan tomin, yejuin kichiua ika sekimej maka makipiyakan tlen kikuaskej.
Ken noyektlalis: “[Jehová] yokichiu para nochiuiyan ipan in tlaltikpaktli maka ma onyaj guerras, yokimpojpostek on arcos, yokimpojpostek on lanzas, niman yokintlatij on carretas de guerra” (Salmo 46:9). ToTajtsin kinpopolos nochi armas niman nochimej akin kichiuaj maoniakan guerras. Ijkuak ijkon kichiuas, nochimej uelis kipiyaskej tlen kikuaskej. Biblia kijtoua: “Ma onya yolseuilistli niman yolmelajkilistli nochi on tiempo” (Salmo 72:7).
Tlen xkuajli panotika: Pampa kemantika melak tona noso melak seua, chikauak kiyaui niman tlaixpoliui kichiua maka matlatlaki niman ika miyekej yolkamej mamikikan.
Ken noyektlalis: ToTajtsin kichiuas san kualtsin matonati, makiyaui niman maseua, nochi yejuin kichiuas melak matlatlaki. Biblia kijtoua: “[Jehová] okiteltij on ajakakiautli, niman on akoxonaltin xok onajkokkej. Pero no, kichiua ma onya amanaltin ipan on xalpatlajkan, niman kimeyaltia atl ipan on tlaltin kampa tlauakkan. Niman ompa kinchantia on yejuan apismikij [..]. Kemaj tlatôkaj, niman kitôkaj uvas. Niman ijkuak yotlatlak, miyek kipixkaj” (Salmo 107:29, 35-37).
Tlen xkuajli panotika: Miyekej akin san intech tlanemiliaj niman akin kinekij kipiyaskej más, kichijchiuaj tlakuajli tlen teijtlakoua noso kichiuaj ika oksekimej maka makipiyakan tlen kikuaskej.
Ken noyektlalis: ITekiuajyo toTajtsin kinpopolos nochimej akin tekajkayauaj niman san intech tlanemiliaj (Salmo 37:10, 11; Isaías 61:8). Biblia kijtoua ika Jehová “kinchiuilia tlen melajki on yejuan tlajyouiyaj niman kintlakualtia on yejuan apismikij” (Salmo 146:7).
Tlen xkuajli panotika: Nochi xiujtin, miyek tlakuajli itech nochi tlaltikpaktli ijtlakaui noso nenpoliui.
Ken noyektlalis: ITekiuajyo toTajtsin kichiuas kuajli manotekitilti niman manotemaka tlakuajli. Ijkuak Jesús nemiya ipan tlaltikpaktli, kuajli okitlajpix tlakuajli ijkon maka maixpoliui. Sejpatipan, ika se milagro okintlakualti ipantsin 5, 000 tlaltikpakchanejkej. Sakin okimijli: “Xsentlalikan nochi on tlen onokau para maka itlaj ma ixpoliui” (Juan 6:5-13).
Pampa iTekiuajyo toTajtsin kipopolos tlen kichiua maonia apistli, nochimej kipiyaskej miyek tlen kikuaskej (Isaías 25:6). Niman, ¿kemanon nochiuas? Tla tikneki tikmatis, xkita tlamachtijli “¿Kemanon tlayekanas ipan yejuin tlaltikpaktli?”.
a Agenda 2030 itech Desarrollo Sostenible, tlen okichiujkej nochi Estados itech Naciones Unidas ipan 2015.
b Yejuin tlen okijto Organización de las Naciones Unidas para Alimentación y la Agricultura, Fondo Internacional de Desarrollo Agrícola, Fondo de las Naciones Unidas para la Infancia, Programa Mundial de Alimentos de las Naciones Unidas niman Organización Mundial de la Salud.
c Tla tikneki tikmatis más itech yejon nauimej tlakamej akin yauej ipan caballos tlen kiteneua Apocalipsis, xkita tlamachtijli “¿Qué representan los jinetes del Apocalipsis?”.
d ToTajtsin itoka Jehová (Salmo 83:18). Xkita tlamachtijli “¿Akinon Jehová?”.