¿Tleka yeuejkaui melak miyekej judíos okinmiktijkej? ¿Tleka toTajtsin xokinpaleui?
Miyekej akin ijkin notlajtoltiaj omijkej akin melak kintlasojtlayaj, yejuamej xsan kineki kimatiskej tleka ijkon opanok, yejuamej kinekij kimatiskej itlaj tlen makinyolseui. Sekimej kinemiliaj ika sajnoye xkuajli ika miyekej Judíos okinmiktijkej niman ika xuelis nemis se toTajtsin akin makitekauili yejon.
Tlen xmelauak noijtoua itech toTajtsin niman itech ijkuak miyekej Judíos okinmiktijkej.
Tlen xmelauak: Titetlajtoltis tleka toTajtsin okitekauili ika miyekej Judíos makinmiktikan se tlajtlakojli.
Tlen melauak: Miyekej itekipanojkauan toTajtsin noijki notlajtoltianij, ¿tleka toTajtsin kitekauilia mapano tlen xkuajli? Yeuejkaui, teotlajtoketl Habacuc okitlajtolti toTajtsin: “¿Tleka tinexchiualtia manikita tlen xkuajli?, ¿niman tleka tikxikoua tikitas tlajyouilistli?” (Habacuc 1:3, Traduccion del nuevo mundo). ToTajtsin xokualan ijkuak teotlajtoketl Habacuc ijkon okitlajtolti, yej okichiuj ika on tlen okijto Habacuc manoijkuilo ipan Biblia para tinochimej ika matopaleuikan.
Tlen xmelauak: ToTajtsin xnoyolkokoua ijkuak kita kenon titlajyouiyaj.
Fact:Tlen melauak: ToTajtsin xkuelita ijkuak kita kenon nochiua tlen xkuajli niman sajnoye kikualania ijkuak kita kenon titlajyouiyaj (Proverbios 6: 16-19). Biblia kijtoua ika ipan itonaluan Noé, toTajtsin sajnoye onoyolkoko ijkuak okitak kenon miyekej kichiuayaj tlen sajnoye xkuajli (Génesis 6: 5, 6). Yejuin kuajli techasikamachiltia ika toTajtsin sajnoye onoyolkoko ijkuak okitak kenon miyekej Judíos okinmiktijkej (Malaquías 3:6).
Tlen xmelauak: ToTajtsin okitekauili ika miyekej Judíos makinmiktikan para kintlajtlakolmakas.
Fact:Tlen melauak: Ipan kachtopa siglo, romanos okipopolojkej Jerusalén niman toTajtsin okitekauili ijkon mapano (Mateo 23:37–24:2). San ika, aman nion se kalpan xkipaleuiya nion xkitlajtlakolmaka. Biblia kijtoua ika “ixpan Dios, on yejuan xhebreos xok okseknekamej intech on hebreos” (Romanos 10:12).
Tlen xmelauak: Tla yemelak nemiskia toTajtsin akin melak kojtik niman techtlasojtlaskia, xkitekauiliskia miyekej Judíos makinmiktikan.
Tlen melauak: ToTajtsin xkeman techtlajyouiltia, san ika, kemantika kema kitekauilia matitlajyouikan (Santiago 1:13; 5:11).
¿Tleka toTajtsin okitekauili ika miyekej Judíos makinmiktikan?
ToTajtsin desde yeuejkaui kuajtekauilijtiuj manochiua tlen xkuajli, pampa kineki kiteititis ika xmelauak tlen yeuejkaui okijto Satanás. Biblia kuajli techasikamachiltia ika Diablo yejua akin kiyekantika yejuin tlaltikpaktli (Lucas 4:1, 2, 6; Juan 12:31). Tlen noteneua ipan Biblia uelis techpaleuis más matikasikamatikan yejuin. Matikitakan ome tlen kiteneua.
ToTajtsin techkauilia tejuamej matiktlapejpenikan tlenon tikchiuaskej. ToTajtsin okijli Adán niman Eva tlenon nonekiya kichiuaskej, san ika, xkeman okinchiualti makitlakamatikan. Yejuamej okitlapejpenijkej kijtoskej tlenon kuajli niman tlenon xkuajli, niman tlen okitlapejpenijkej kichiuaskej melak xkuajli okisato (Génesis 2:17; 3:6; Romanos 5:12). Noijki ijkon, kemantika tiktlapejpeniaj tlen xkuajli, niman yejon kichiua sajnoye matitlajyouikan. Ipan libro Statement of Principles of Conservative Judaism (Declaración de principios del judaísmo conservador), kijtoua ika ipan tlaltikpaktli melak onka tlajyouilistli pampa xkuajli notlapejpenia tlen nochiuas. San ika, maski ijkon, toTajtsin ok techkauilia tejuamej matiktlapejpenikan tlenon tikchiuaskej niman matikteititikan tla ueli san tejuamej toyekanaj.
ToTajtsin ueli niman kineki kiyektlalis nochi tlen xkuajli opanok ijkuak miyekej Judíos okinmiktijkej.Yejua yokijto ika kinyolitis miyekej akin yomijkej, noijki on Judíos akin okinmiktijkej, niman kichiuas ika akin omakiskej, makilkauakan nochi tlen xkuajli opanok (Isaías 65:17; Hechos 24:15). Kuajli tikmatstokej ika toTajtsin kichiuas tlen yokijto pampa yejua melak techtlasojtla (Juan 3:16).
Miyekej akin omakiskej ijkuak okinmiktijkej Judíos, ouel ika inyojlo onenkej niman otlaneltokakej, pampa kuajli okasikamatkej tleka toTajtsin kitekauilia manochiua tlen xkuajli niman kenon kiyektlalis yejon.