¿Tlenon kineki toTajtsin manikchiua?

Tlen kijtoua Biblia

ToTajtsin kineki ika tejuamej matikixmatikan, kuajli iuan matouikakan, matiktlasojtlakan niman matiktekichiuilikan ika nochi toyojlo (Mateo 22:37, 38; Santiago 4:8). Uelis tikchiuaskej nochi yejuin tla tomachtiaj tlen okichiuj Jesús niman tlen otemachti. Pampa nochi tlen yejua otemachti, xsan okijto noijki okichiuj (Juan 7:16, 17). Yejua kuajli otechijli tleka ouajlajka ipan tlaltikpaktli, okijto: “nejua oniualeu iluikak xpara nikchiuas tlen nejua nikneki, yej para nikchiuas on tlen kineki on yejuan onechajtitlan” (Juan 6:38).

¿Kanaj noneki nechuajnotsas toTajtsin noso panos itlaj tlen temojkatlachialti niman ijkon nikmatis tlenon kineki manikchiua?

Ka, pampa aman yejua techijlia tlenon kineki matikchiuakan itechkopa Biblia. Ipan iTlajtol tiknextiaj nochi tlen noneki tikmatiskej niman ijkon tikchiuaskej “nochi tlen kuajli” (2 Timoteo 3:16, 17). ToTajtsin kineki ika tejuamej matijkuikan Biblia niman totlamachilis pampa ijkon tikmatiskej tlenon kineki matikchiuakan (Romanos 12:1, 2; Efesios 5:17).

¿Uelis nikchiuas tlen toTajtsin nechtlajtlanilia?

Kema. Pampa yejua techijlia ipan iTlajtol ika “itlanauatiluan xyetikej” (1 Juan 5:3). Maski ijkon, kuajli tikmatstokej ika xkijtosneki tla xouijtika tikintlakamatiskej itlanauatiluan, san ika, melak techpaleuis tla ijkon tikchiuaj. Jesús okijto: “¡Dios más kintiochiua on yejuan kakij itlajtoltsin niman kitlakamatij!” (Lucas 11:28).