¿ITekiuajyo toTajtsin onka ipan toyojlo?

Tlen Biblia kijtoua

Ka, iTekiuajyo toTajtsin xonka ipan inyojlo akin kichiuaj ken Cristo.a Biblia kuajli techasikamachiltia kanon onka, pampa kijtoua ika iTekiuajyo toTajtsin “tlamandaroua iluikak” (Mateo 4:​17). Noijki kijtoua ika iTekiuajyo toTajtsin se gobierno niman ika itlanauatijtika desde ne iluikak. Matikitakan.

• ITekiuajyo toTajtsin kinpiya akinomej tlayekanaskej, akinomej kinyekanaskej niman tlanauatiltin, niman kichiuas ika nochimej akin nemij ipan tlaltikpaktli niman ne iluikak makitlakamatikan toTajtsin (Mateo 6:​10; Apocalipsis 5:​10).

• ITekiuajyo toTajtsin kinyekanas “nochi tlakatl de nochimej naciones, niman nochimej on yejuan tlajtlajtouaj sesekneka tlajtoltin” (Daniel 7:​13, 14). Yejuin gobierno xsan tlaltikpakchanejkej okitlapejpenijkej, yej toTajtsin yejua akin yokitlali niman yokimakak tlanauatijkayotl para matechyekana (Salmo 2:​4-6; Isaías 9:7).

• Jesús okimijli iapóstoles ika yejuamej iuan nemiskiaj ipan Tekiuajyotl tlen onka iluikak niman ijkon iuan noseuiskiaj “ipan on uejueyixtokej sietas” noso iuan tekiuajtiskiaj (Lucas 22:28, 30).

• ITekiuajyo toTajtsin kinpopolos itlauelikniuan (Salmo 2:​1, 2, 8, 9; 110:​1, 2; 1 Corintios 15:25, 26).

Biblia xtemachtia tla Tekiuajyotl tlen onka iluikak onka ipan toyojlo, noso kentla tla iTekiuajyo toTajtsin tlayekantoskia desde ipan toyojlo. San ika, Biblia kema temachtia ika on “kuajli tlajtoltin itech Tekiuajyotl” techyolmapeua itlaj matikchiuakan (Mateo 13:19; 24:14).

¿Jesús xokijto: “ITekiuajyo toTajtsin onka toijtik”?

Ipan seki Biblias ijkin kitlajtolkuepaj tlen okijto Jesús ipan Lucas 17:21: “ITekiuajyo toTajtsin onka toijtik” (Biblia Americana San Jerónimo). Ika yejon, miyekej kinemiliaj ika iTekiuajyo toTajtsin onka ipan toyojlo. San ika, para kuajli tikasikamatiskej tlen kijtoua yejuin versículo noneki kuajli tomachtiskej okseki tlen ompa noijtoua.

Kachtopa, ijkuak Jesús okijto yejuin tlajtoltin, okimijli on fariseos, akin melak kitlauelitayaj niman hasta yokinemilijkaj kenon kimiktiskej (Mateo 12:14; Lucas 17:20). ¿Jesús okijtosnek ika on xkuajkualtin tlakamej kipiayaj iTekiuajyo toTajtsin ipan inyojlo? Ka, pampa yejua okijto: “Nemojtik tentikaj ikan on tlen xmelauak niman ikan tlajtlakojli” (Mateo 23:27, 28).

Okseki Biblias kuajli okitlajtolkuepkej tlen noijtoua ipan Lucas 17:21 pampa kuajli teasikamachiltiaj tlen Jesús okijtosnek. El Nuevo Testamento original kijtoua: “ITekiuajyo toTajtsin onka nenmonakastlan”, niman Traducción del Nuevo Mundo de las Santas Escrituras (con referencias) kijtoua: “ITekiuajyo toTajtsin nemotsajlan onka” (xkita nota). Ijkuak ipan yejuin texto noijtoua ika iTekiuajyo toTajtsin onkatka innakastlan noso intsajlan fariseos, kijtosneki ika Jesús, akin toTajtsin yokitlapejpeni para tekiuajtis ipan iTekiuajyo, ompa imiuan nemiya (Lucas 1:32, 33).