Se cajita tlen techpaleuiya machikaujto totlaneltokil

Iteixpantijkauan Jehová xkeman tikseliayaj miyek tlamachtijli ika formato digital ken aman. San ika, miyekan, tokniuan xuelij kitlaxtlauaj internet. Oksekimej chantij kampa internet melak noteteltia noso melak yolik noso kampa xtlaj internet.

San ika, aman miyekej tokniuan uelij kintemoltiaj toamatlajkuiloluan maski xkipiyaj internet, ¿kenon?

JW Box se cajita pitentsin tlen kintitlaniliaj tlanechikoltin kampa xtlaj internet noso melak yolik. Yejuin cajita tekiti ken se rúter niman kikouiliaj se empresa, noijki kipiya se programa tlen okichijchiuj Departamento de Computación tlen onka Betel niman yejuin kinpiya videos niman amatlajkuiloltin tlen onkatij ipan jw.org. Se cajita nokoua ika 75 dólares.

Ipan Kajli kampa tosentlaliaj, tokniuan kalakij ipan JW box ika wifi niman kintemoltiaj amatlajkuiloltin niman videos. Ipan celulares niman tabletas tlen youejkaujkej noso xpatiojkej noijki ueli ompa kintemoltiaj amatlajkuiloltin niman videos. San ika, tla se tlanechikojli xkipiya internet, ¿kenon JW Box uelis kipiyas tlen más yenkuik? Sucursal kintitlani memorias USB ipan tlanechikoltin, tlen kinkoua ika 4 dólares niman kipiya nochi tlen yenkuik kistiuj ipan jw.org. Yejuin memorias USB nokalaktiaj ipan JW Box niman ijkon tokniuan uelis kitemoltiskej tlen más yenkuik.

¿Kenon JW Box yokinpaleui tokniuan? Tokniuj Nathan Adruandra, akin chanti ipan República Democrática del Congo, techijlia: “Uejkaujtipan onikyejyeko nikintemoltis videos ‘Jehová, motech nitlaneltoka’ niman Xkilnamikikan isiuauj Lot, san ika, xkeman oniuel. Yejon nechajmanaya. Aman yoniuel nikintemoltia videos ipan noteléfono, yejuin techpaleuiya kuajli matikimiskaltikan tokoneuan”.

Se tokniuj akin kinpaleuiya tlanechikoltin kuajli makikuikan JW Box ne Nigeria, kijtoua: “Tokniuan kitaj JW Box ken se kualtsin tetlayokolijli tlen Jehová yokinmakak. Melak yolpakij ika aman xouijtika kintemoltiaj amatlajkuiloltin niman videos tlen ika titemachtiaj”.

Yonotitlankej ipantsin 1,700 JW Box ipan tlanechikoltin ne África, Oceanía niman Sudamérica, niman noijki nonemilijtika notitlanis yejuin cajita ipan okseki tlanechikoltin. ¿Kanon kisa tomintsin para nochiuas yejuin? Itech donaciones tlen notemakaj. Miyek donaciones nochiuaj ipan donate.jw.org. Timechtlasojkamachiliaj ika nenkitemakaj nemotomintsin.