Matiktekitiltikan jw.org ijkuak titenojnotsaj: “Xmouika iuan Jehová”

Ipan jw.org itech “Amatlajkuiloltin” kipiya videos ipan sección tlen itoka “Xmouika iuan Jehová” tlen onochijchiuj inpampa kokonej. (Ika español, xsan onka videos, noijki onka tlakuikaltin niman okseki tlemach.) ¿Yotiktekitilti yejuin ijkuak titenojnotsa? Tla semej akin tikmachtia kipiya ikoneuan, ¿tleka xtikimititia? Xtikmatij tla yejuin kichiuas makitakan okseki tlen onka ipan yejon página ipan Internet.

Ijkuak se tokniuj okimakak se amatlajkuilojli pitentsin ¿Uelis yoliuiskej akin yomijkej? se siuatl akin kipiya ikoneuan, nimantsin opeuj kipoua, ikoneuan noijki kinekiya kimatiskej tlenon katka yejon amatl. Kuakon tokniuj okimijli itech tlen tlajtouaya niman okimititi página ipan Internet tlen ompa uajnestiaya. Pampa ones ika yejuin siuatl okuelitak, tokniuj nimantsin okimititi ipan iteléfono se video itech Caleb.

Se tokniuj siuatl okinojnots akin iuan tekitiya, se siuatl akin kipiaya ikoneuan, niman okititi jw.org kampa se uelis kinextis tlenon kinpaleuiya familias. Yejuin siuatl iuan ikoneuan okitlajpokej yejuin página. Sakin, yejuin siuatl okijli tokniuj ika ikoneuan nokuikatitinemiyaj inchan “Predica la palabra”, tlen onka ika español, tlen uajlauj itech sección “Xmouika iuan Jehová”.

¿Xmelak ika noneki kuajli matikixmatikan tlen notlalijtiuj ipan jw.org niman matiktemoltikan videos, tlakuikaltin niman okseki tlemach tlen noneki? Ijkon uelis tiktekitiltiskej yejuin página ijkuak titenojnotsaj. Niman yejuin techpaleuijtos matiktekipanokan toTeko ken tlakeualtin (Hech. 20:​19).