Tikseliskej itlaj tlen melak kualtsin

“San ika, noneki tikmatis ika ipan itlamiyan tonaltin panos tlen melak xkuajli niman ouijtika yes titlaxikos” (2 TIMOTEO 3:1, TNM).

¿YOTIKITAKA noso yotiktekakilijka itlaj ken yejuin?

● Se kokolistli miyekej kinmiktia.

● Miyekej mikij pampa xkipiyaj tlen kikuaskej.

● Miyekej mikij niman sekimej kinpolouaj inkaluan ipampa tlalolinalistin.

Matikitakan nochi tlen aman panotika. Niman tikitas ika Biblia yokijtojka ika nochi yejuin panoskia “ipan itlamiyan tonaltin”.a

Yejuin revista xsan kijtoua tlen xkuajli nochiujtika, noijki techititia tlen kualtsin tikseliskej ika tlayekapan. Niman techasikamachiltis ika nochi tlen aman panotika techititia ika itinemij “ipan itlamiyan tonaltin”. Niman noijki tikitaskej tlenon kinemiliaj sekimej itech yejuin, niman tleka uelis tikneltokaskej ika ajsis tonajli ijkuak melak kuajli tinemiskej.

[Nota]

1. Tlalolinalistin

“Temojtij tlalolinis miyekan” (LUCAS 21:11).

● Winnie, se ichpokatsin akin kipiaya 16 meses ika yonenka, omakis ijkuak otlalolin ne Haití pampa sekimej akin kipanoltijtoyaj noticias okikakkej ika se konetsintli ompa chokatoya niman okimakixtijkej. Winnie san yejua onokauj pampa itajuan omijkej ipan yejon tlalolinalistli.

TLEN YOPANOK. Ijkuak otlalolin Haití ipan enero de 2010, omijkej ipantsin 300,000 tlaltikpakchanejkej niman 1,300,000 okipolojkej inkal. Ijkuakon, melak otlaixpoliuj niman melak miyekej omijkej, san ika, xsan ompa otlalolin. Desde abril de 2009 hasta abril de 2010, opanokej kanaj 18 tlalolinalistin.

TLEN SEKIMEJ KIJTOUAJ. San noijki tlalolini ken yeuejkaui, san ika, aman tecnología techpaleuiya nimantsin matikmatikan ijkuak tlalolini.

¿YEMELAK TLEN SEKIMEJ KIJTOUAJ? Biblia xkijtoua kechpa tlaloliniskia ipan yejuin sa itlamiyan tonaltin. San ika, kema kijtoua ika ipan sa itlamiyan tonaltin “temojtij tlalolinis miyekan” (Marcos 13:8; Lucas 21:11).

¿TLENON TIKNEMILIA? ¿Yemelak miyekan chikauak tlalolini ijkon ken yokijtojka Biblia?

Xuelis tikijtoskej ika tinemij ipan sa itlamiyan tonaltin san pampa sajnoye tlalolini, san ika, yejuin techititia ika nochiujtika tlen Biblia yokijtojka. Matikitakan okse tlen Biblia yokijtojka nochiuas ipan sa itlamiyan tonaltin.

[Blurb]

“Akin tomachtiaj geofísica tikimixmatij ken uejueyimej tlalolinalistin, san ika, oksekimej san kitaj yejuin kentla itlaj tlen melak tlaijtlakoua”. (KEN HUDNUT, SERVICIO GEOLÓGICO DE ESTADOS UNIDOS)

[Picture Credit Line]

© William Daniels/Panos Pictures

2. Apistli

“Onyas apistli” (MARCOS 13:8).

● Se tlakatl ochantito ipan se kalpan tlen onka Quaratadji (Níger). Ichanejkauan noijki ompa ochantitoj pampa kampa chantiyaj xonkatka tlakuajli. San ika, yejon tlakatl noteka ipan petlatl niman san iselti ompa nomelaujtok. Sidi, akin tlayekana ipan yejon kalpan, kijtoua: “Yejuin tlakatl pinaui kitas [ifamilia] pampa xueli kintlakualtia”.

TLEN YOPANOK. Kanaj 690 millones de tlaltikpakchanejkej ipan nochi tlaltikpaktli xkuajli tlakuaj pampa xmás kipiyaj tlakuajli. Niman itech yejon 690 millones, kanaj 235 millones nemij África. San xkonnemili yejuin, nemi se konetl niman itajuan, san ika, san omemej uelis tlakuaskej, ¿akinon xtlakuas, tajtli noso nantli? Miyekej familias mojmostla kixnamikij yejuin.

TLEN SEKIMEJ KIJTOUAJ. Onka miyek tlakuajli, san ika, xkuajli noxeloua.

¿YEMELAK TLEN SEKIMEJ KIJTOUAJ? Melauak ika aman miyekej ueli melak tlatlakiltiaj. Kuakon, tekiuajkej noneki itlaj kichiuaskej para nochipa maonia tlakuajli. San ika, maski kinekij, xuelij ijkon kichiuaj.

¿TLENON TIKNEMILIA? ¿Yemelak tlen kijtoua Marcos 13:8? Maski tecnología melak yotepaleui, ¿tikita ika miyekej xkipiyaj tlen kikuaskej?

Tlalolinalistin niman apistli techititiaj ika itinemij ipan sa itlamiyan tonaltin.

[Blurb]

“Miyekej kokonej akin mikij ipampa neumonía, tlatekajli niman okseki kokolistin, xmikiskiaj tla kuajli tlakuaskiaj”. (ANN M. VENEMAN, AKIN TEKITIYA KEN DIRECTORA EJECUTIVA IPAN UNICEF)

[Picture Credit Line]

© Paul Lowe/Panos Pictures

3. kokolistin

“Onyas [...] miyek kualolistli miyekan” (LUCAS 21:11).

● Ipan se país tlen onka África, kampa melak onka guerra, se tlakatl akin itoka katka Bonzali, melak onokojtili kinpaleuis akin mikiyaj ipampa virus de Marburgo, se kokolistli tlen kichiua melak xtotonia. Bonzali okiteijli makipaleuikan, san ika, opanok naui metstli para okipaleuitoj niman chika oajsikej, yejua yomijka ipampa yejon kokolistli tlen miyekej yokinmiktijka.

TLEN YOPANOK. Ipan nochi tlaltikpaktli melak miyekej mikij ipampa neumonía, tlatekajli, sida, tuberculosis niman paludismo. Ipan 2004 yejuin kokolistin okinmikti kanaj 11 millones.

TLEN SEKIMEJ KIJTOUAJ. Aman más yotimiyekiyakej, yejua ika, nesi ika más miyekej kualoj.

¿YEMELAK TLEN SEKIMEJ KIJTOUAJ? Maski aman más yotimiyekiyakej, noijki miyekej nemij akin melak youelkej tepajtiaj. Kuakon, xok nonekiskia melak tikualoskej. San ika, xijkon panoua.

¿TLENON TIKNEMILIA? ¿Aman más miyekej kualoj ijkon ken yokijtojka Biblia?

Melak miyekej tlajyouiyaj ijkuak tlalolini, ijkuak xkipiyaj tlen kikuaskej niman ijkuak kualoj. Niman sekimej tlajyouiyaj pampa melak kintlajyouiltiaj. Xkita tlen Biblia kijtoua itech yejuin.

[Blurb]

“Ijkon ken melak xkuajli tikmachiliskia tla se león mitskuaskia, noijki melak xkuajli ijkuak tikmati ika se kokolistli ika yolik mitsmiktia”. (MICHAEL OSTERHOLM, EPIDEMIÓLOGO)

[Picture Credit Line]

© William Daniels/Panos Pictures

4. Miyekej xkintlasojtlaskiaj inchanejkauan

“Xkintlajsojtlaskej oksekimej nion xteikneliskej” (2 TIMOTEO 3:1-3).

● Chris tekiti ne norte de Gales kampa kinmanauiyaj akin kintlajyouiltiaj inchan. Yejua kijtoua: “Se tonajli onechitako se siuatsintli, san ika, hasta xonikixmat pampa melak yokiuisojkaj. Niman oksekimej siuamej akin melak yokinyolkokojkej hasta xkinekij techitaskej pampa pinauij”.

TLEN YOPANOK. Ipan se país tlen onka África, miyekej siuamej okinnajnauiltijkej ijkuak kokonej katkaj. Miyekej tlakamej akin ompa chantij kinemiliaj ika xtlaj panoua tla kemantika kiuisokij insiuauj. San ika, xsan siuamej ijkon inpan nochiua. Ne Canadá, miyekej siuamej kinuisokij inueuentsitsinuan.

TLEN SEKIMEJ KIJTOUAJ. Desde yeuejkaui nemij akin kintlajyouiltiaj inchanejkauan. San ika, aman más tlajtouaj itech yejon.

¿YEMELAK TLEN SEKIMEJ KIJTOUAJ? Yemelak, aman más miyekej yopeujkej tlajtouaj itech yejuin. San ika ¿yotepaleui maka sa ijkon manochiua? Ka. Aman más nemij akin kintlajyouiltiaj inchanejkauan.

¿TLENON TIKNEMILIA? ¿Nochiujtika tlen kijtoua 2 Timoteo 3:1-3? ¿Miyekej xkintlasojtlaj inchanejkauan?

Biblia noijki yokijtokaj ika aman miyekej melak kijtlakoskiaj tlaltikpaktli.

[Blurb]

“Miyekej akin kinuisokij inchan xkiteijliaj tlen kinchiuiliaj. Sekimej siuamej onnotlateluiliaj kampa policías hasta ijkuak yokinuisojkej ipantsin 35 veces”. (AKIN TLAJTOUA INPAMPA AKIN TEKITIJ KAMPA KINMANAUIYAJ AKIN KINTLAJYOUILTIAJ INCHAN NE GALES)

5. Kixoxotoniskiaj yejuin tlaltikpaktli

ToTajtsin kinpopolos “on yejuan kixoxotoniaj in tlaltikpaktli” (APOCALIPSIS 11:18).

● Pirri akin chanti Kpor (Nigeria), kinemaka vino de palma. San ika, aman xok ueli kinemaka pampa on petróleo tlen otoyauj ipan atentli Níger okimijtlako palmeras. Yejua kijtoua: “Petróleo kinmiktia michimej, kijtlakoua totlalnakayo niman kintsojkuilotia atentin. Aman xok ueli nitekiti”.

TLEN YOPANOK. Ixtlamatkej yokitakej ika ipan se xiuitl, melak miyek tlasojli onnoxinia ipan mar. Tlajkotipan de on tlasojli kipiya plástico tlen sajnoye uejkaui para ijtlakaui. Tlaltikpakchanejkej xsan kitsojkuilotijtokej yejuin tlaltikpaktli, noijki ikitlamijtokej nochi tlen kipiya yejuin tlaltikpaktli. Ixtlamatkej kijtouaj ika tlaltikpaktli uejkaui diecisiete metstli para oksejpa kichijchiuas nochi tlen tlaltikpakchanejkej kikuij ipan se xiuitl.

TLEN SEKIMEJ KIJTOUAJ. Tejuamej uelis tikyektlaliskej yejuin tlaltikpaktli niman tikchiuaskej maka mapopoliui.

¿YEMELAK TLEN SEKIMEJ KIJTOUAJ? Aman más yomiyekiyakej akin kitlajpiyaj tlaltikpaktli. San ika, maski ijkon, tlaltikpaktli ok melak tsojkuiliui.

¿TLENON TIKNEMILIA? ¿Nonekis toTajtsin kiyektlalis yejuin tlaltikpaktli ijkon ken yonoijtoka?

Biblia xsan okijto tlen xkuajli nochiuaskia ipan sa itlamiyan tonaltin, noijki okijto tlen kuajli panoskia. Matikitakan.

[Blurb]

“Nikan melak tlakualtsinkan katka, san ika, aman melak yotlaijtlakauj”.

[Box]

¿ToTajtsin yejua akin techtlajyouiltia?

Biblia yokijtojka ika nochiuaskia nochi tlen aman panotika, san ika, yejuin xkijtosneki tla toTajtsin yejua akin kichiua matitlajyouikan. Tla tikneki más tikmatis itech yejuin, xkita capítulo 11 itech libro ¿Tlenon melauak temachtia Biblia?, tlen okichijchiujkej iteixpantijkauan Jehová. (YEJUIN OKIJTO ERIN TAMBER, AKIN CHANTI IPAN COSTA SUR DE ESTADOS UNIDOS, IJKUAK OTOYAUJ PETROLÍFERO IPAN 2010 IPAN GOLFO DE MÉXICO)

[Picture Credit Line]

U.S. Coast Guard photo

6. Nochiuiyan notenojnotsas

“Niman yejuin kuajli tlajtoltin itech Tekiuajyotl notenojnotsas ipan nochi tlaltikpaktli” (MATEO 24:14, TNM).

● Vaiatea chanti ipan se isla tlen onka Pacífico, ipan archipiélago de Tuamotú. Onokej kanaj ochenta pipitikej islas kampa san chantij 16,000 tlaltikpakchanejkej. Maski ijkon, iteixpantijkauan Jehová okinojnotsatoj Vaiatea niman oksekimej akin noijki ompa chantij. ¿Tleka iteixpantijkauan Jehová ontenojnotsaj maski melak uejka? Pampa kinekij nochimej kimijliskej tlen kualtsin kichiuas iTekiuajyo toTajtsin ika tlayekapan.

TLEN YOPANOK. Nochiuiyan notenojnotstika. Ipan 2010 iteixpantijkauan Jehová otenojnotskej ipantsin 1,600 millones de horas ipan 236 países. Yejon yeskia kentla cada se iteixpantijkauj Jehová mojmostla tenojnotsaskia 30 minutos. Ipan majtlaktli xiuitl tlen yopanoka, okinchijchiujkej niman okintemakakej ipantsin 20,000 millones amatlajkuiloltin itech Biblia.

TLEN SEKIMEJ KIJTOUAJ. Melak yeuejkaui ika notenojnotsa.

¿YEMELAK TLEN SEKIMEJ KIJTOUAJ? Sekimej akin yokiyejyekojkej tenojnotsaskej itech Biblia, xmiyekej okinnojnotskej niman aman xok tenojnotsaj. San ika, iteixpantijkauan Jehová chikauak tenojnotsaj ipan nochi tlaltikpaktli. Niman ijkon yokichiujkej maski sekimej uejueyi tekiuajkej kinekiyaj kinteltiskej (Marcos 13:13).a Noijki, iteixpantijkauan Jehová xkitlajtlanij tomin ijkuak kintemakaj amatlajkuiloltin, ijkuak tenojnotsaj niman ijkuak temachtiaj. Nochi tekitl tlen yejuamej kichiuaj notlaxtlaua ika tomin tlen san no yejuamej kitemakaj ika inyojlo.

¿TLENON TIKNEMILIA? ¿Notenojnotsa itech iTekiuajyo toTajtsin ipan nochi tlaltikpaktli? ¿Yejuin kijtosneki ika tikseliskej itlaj tlen kualtsin ika tlayekapan?

[Footnote]

[Blurb]

“Hasta ijkuak toTajtsin techkauilis, tejuamej tokojtiliskej chikauak titenojnotsaskej”. (ANUARIO DE LOS TESTIGOS DE JEHOVÁ 2010)

Kualtsin tinemiskej ika tlayekapan

“Niman sa achijtsin poliui, akin xkuajli iyojlo xok nemis [...]. San ika, akin yolyemankej nemiskej ipan tlaltikpaktli, niman melauak kinextiskej inyolpakilis ika ueyi yolseuilistli” (SALMO 37:10, 11, TNM).

KUAJLI tikmatstokej ika tikuelitaskia manochiua tlen kijtoua yejuin texto. Niman uelis kuajli tikmatstos ika yejuin yemelak nochiuas.

Ipan okseki tlamachtiltin otikimitakej san seki teotlajtoltin tlen yonoteneujkaj ipan Biblia. Niman pampa yejuin teotlajtoltin inochiujtokej techititia ika itinemij “ipan sa itlamiyan tonaltin” (2 Timoteo 3:1-5, TNM). ToTajtsin okichiuj ika sekimej tlakamej makijkuilokan yejuin, niman ijkon tejuamej tikmatstoskiaj tlen kualtsin tikseliskej ika tlayekapan (Romanos 15:4). Kuajli tikmatstokej ika popoliuis tlen aman tikixnamiktokej pampa inochiujtika nochi tlen Biblia yokijtojka.

¿Tlenon nochiuas ijkuak yopanok itlamiyan tonaltin? ITekiuajyo toTajtsin tlayekanas (Mateo 6:9, 10). Matikitakan tlen kijtoua Biblia:

● Xok onias apistli. “¡Ma onya miyek trigo ipan on país, niman ma onya miyek trigo ipan on tepemej!” (Salmo 72:16).

● Xok yakaj kualos. “Xok yakaj kijtos: ‘Nikualo’” (Isaías 33:24).

● Noyektlalis tlaltikpaktli. “Ma paki on xalpatlajkan, on tlaluaktli; ma pakilistlamati, ma noxochiyoti” (Isaías 35:1).

Yejuin san seki tlen Biblia kijtoua tikseliskej ika tlayekapan. Tla tikneki más tikmatis itech yejuin, xtlajtolti se iteixpantijkauj Jehová tleka kuajli kineltoka ika ajsis se tonajli ijkuak melak kualtsin tinemiskej.