¿Kenon uelis tiknisiuiskej toTajtsin?

1. ¿Kinkaki toTajtsin nochimej akin kinotsaj?

ToTajtsin kineki nochimej makinisiuikan ika teoyotl (Salmo 65:2). San ika, xnochimej kinkaki ijkuak kinotsaj. Xkikaki ijkuak kinotsa se tlakatl akin kitlajyouiltia isiuauj (1 Pedro 3:7). Noijki, ijkuak israelitas xokikaujkej kichiuaj tlen xkuajli, toTajtsin xok kinkakiya ijkuak kinotsayaj. Tikchiuas teoyotl se ueyi tlateochiualistli. Maski se kichiua ueyi tlajtlakojli, toTajtsin kikaki tla noyolkuepa. Xkita Isaías 1:15 niman 55:7.

Xkita video ¿Kinkaki toTajtsin nochimej akin kinotsaj?

2. ¿Kenon noneki tiknotsaskej toTajtsin?

ToTajtsin tikueyichiuaj ijkuak tikchiuiliaj teoyotl, ika yejon, noneki san Jehová matikchiuilikan teoyotl (Mateo 4:10; 6:9). Tejuamej titlajtlakolejkej, ika yejon noneki matiknotsakan toTajtsin ipampa itokayo Jesús, yejua omik ipampa totlajtlakoluan (Juan 14:6) Jehová xkineki matiktsontekontlalikan noso matikijkuilokan tlen tikijliskej. Yejua kineki matikijlikan tlen kisa ipan toyojlo. Xkita Mateo 6:7 niman Filipenses 4:6, 7.

ToTajtsin akin otexchijchiuj techkaki maski ijkuak san ichtaka tiknotsaj (1 Samuel 1:12, 13). ToTajtsin techijlia matiknotsakan maski san kemanon, ika kualkan, ika teotlak, ijkuak titlakuaj noso ijkuak tikpiyaj tlauejli. Xkita Mateo 15:36 niman 1 Pedro 5:7.

3. ¿Tleka noneki tosentlaliskej kampa nomachtiaj itech toTajtsin?

Ouijtika noso mitstekiyomakas tiknisiuis toTajtsin pampa nemij miyekej akin xtlaneltokaj itech niman xkineltokaj tla kemantika tinemiskej ika toyojlo ipan yejuin tlaltikpaktli (2 Timoteo 3:1, 4; 2 Pedro 3:3, 13). Kuakon noneki toyolchikauaskej niman tosentlaliskej iuan akin tlaneltokaj itech toTajtsin. Xkita Hebreos 10:24, 25.

Tla tosentlaliaj imiuan akin kitlasojtlaj toTajtsin, techpaleuis matiknisiuikan toTajtsin. Tla tiauej kampa nosentlaliaj iteixpantijkauan Jehová, nochikauas totlaneltokil ijkuak tikinkakiskej niman tikimitaskej oksekimej akin kitekichiuiliaj toTajtsin. Xkita Romanos 1:11, 12.

4. ¿Kenon uelis tiknisiuiskej toTajtsin?

Uelis tiknisiuiskej Jehová tla titlanemiliaj itech tlen yotomachtijkej ipan iTlajtol. Tla titlanemiliaj itech tlen yokichijchiuj, tlen techijlia matikchiuakan niman itech tlen kijtoua kichiuas ika tlayekapan. Tla tikchiuaj teoyotl niman titlanemiliaj itech nochi yejuin, tiktlasojkaitaskej kenon techtlasojtla niman tikmojkaitaskej ika kipiya ueyi tlamachilistli. Xkita Josué 1:8 niman Salmo 1:1-3.

Uelis tiknisiuiskej toTajtsin san tla tikneltokaj ika kichiuas nochi tlen kijtoua. Ken se xochitl noneki tikatekiskej niman ijkon maka mapilini, noijki ijkon noneki tikchiuaskej ika totlaneltokil. Uelis tikchiuaskej, tla titlanemiliaj itech tlen techpaleuiya matikmatikan ika melauak tlen tikneltokaj. Xkita Mateo 4:4 niman Hebreos 11:1, 6.

5. ¿Kenon mitspaleuis tla tiknisiuiya toTajtsin?

Jehová kintlajpiya akin kitlasojtlaj. Yejua uelis techtlajpiyas itech tlen uelis kijtlakos totlaneltokil, niman kichiuas ika matikchiakan ika nochi toyojlo tikseliskej nemilistli tlen xkeman tlamis (Salmo 91:1, 2, 7-10). Techijlia itech tlen totlajpiyaskej ika maka matechajsi kokolistli niman matinemikan ika toyojlo. Jehová techmachtia kenon yemelak kuajli tinemiskej. Xkita Salmo 73:27, 28 niman Santiago 4:4, 8.