Akin iuan nouikaj toTajtsin kichiuaj tlen kuajli

Ijkuak tikpiyaj akin iuan touikaj niman tikuelitaj tlenon kichiuaj niman tiktlakaitaj, tikyejyekoaj tochiuaskej ken yejua. Biblia kijtoa: “Jehová yejua kuajli niman melaktik” (Salmo 25:8). Tla tiknekij iuan touikaskej toTajtsin, noneki tiyeskej tikuakualtin niman timelajkej. Biblia kijtoa: “Xkixkopinakan tlen toTajtsin kichiua pampa nintetlasojkakoneuan, niman xtetlasojtlatokan” (Efesios 5:1, 2, TNM). Yejuin san seki tlemach tlen uelis tikixkopinaskej itech Jehová:

Tikimpaleuiskej oksekimej. “Nochimej ma tikinchiuilikan on tlen kuajli.” (Gálatas 6:10.)

Matitekitkej. “Yejuan tlachteki, ma kajkaua ika tlachteki, niman ma peua tekiti. Niman ma kichiua on tekitl yejuan ika kuajli kitlakaitaskej.” (Efesios 4:28.)

Machipauak tonakayo niman tonemilis. “Ma tikxelokan itech totlalnakayo [...] nochi on tlen techijtlakoa. Niman ma kuajli titoyolchipauakan.” (2 Corintios 7:1.)

Matikintlasojtlakan niman matikintlakaitakan tochanejkauan. “On tlakatl noneki kitlajsojtlas isiuau sa no ken yejua notlajsojtla, niman on siuatl no noneki kitlakaitas iueuentsin. Kokonej, se konetl ma kintlakamati itajuan.” (Efesios 5:33–6:1.)

Tikintlasojtlaskej oksekimej. “Notlajsojkaikniuan, ma titotlajsojtlakan inuan oksekimej, pampa on tetlajsojtlalistli ualeua itech Dios.” (1 Juan 4:7.)

Matikintlakamatikan itlanauatiluan tekiuajkej. “Nochi tlakatl ma tetlakamati intech on tekiuajkej, [...]. Nochimej xkintlaxtlauilikan on tlen nenkinuikiliaj.” (Romanos 13:1, 7.)