TLAMACHTIJLI 2

Xtlajto ken nochipa titlajtoua

2 Corintios 2:17

TLEN TIUELIS: Xtlajto ken nochipa titlajtoua niman ken uelis mitsasikamatiskej, yejuin mitskauilis xteititi tlen tikmachilia itech tlen tikijtoua niman itech akin mitskaktokej.

KENON TIKCHIUAS:

Xchiuili teoyotl toTajtsin niman kuajli xmoyektlali. Xtlajtlanili Jehová ika mamitspaleui xtlanemili ipan motlamachtil niman maka motech xtlanemili. Kuajli xmatsto tlenon tikneki titemachtis. Tlen tikijtos makisa ipan moyojlo niman maka xteneua san tlen ijkuiliujtika.

Tla tikpouas Biblia noso se amatlajkuilojli, xmokojtili tikixmatis itech tlen tlajtoua niman ijkon xkanaj timoteltis ijkuak tikamapouas. Tla kipiya se tlaxelojli itech Biblia, xmachili ijkuak tikpouas, san ika, san ken kinamiki.
Xtlajto ika nochi moyojlo. Xnemili tleka akin mitskakiskej noneki kikakiskej tlamachtijli. Intech xtlanemili. Tla ijkon tikchiua, ken timotelketsas, tikintekitiltis momauan niman moxayak kiteititiskej ika melauak tlen tikijtoua niman ika titetlasojtla.

Titlajtos ken nochipa titlajtoua xkijtosneki san kenon titlajtlatos. Uelis tikteititis ika tiktlakaita tlen tikijtoua ijkuak kuajli tikintenkixtia tlajtoltin niman tikijtoua ijkon ken noijkuiloua motlajtol.
Xkintlajtlata akin mitskaktokej. Tla xkinyolkokos, xkintlajtlata. Ijkuak tiktemakas se tlamachtijli, maka san uejka xontlachia, kachtopa yakaj xtlajtlata, sakin okse niman ijkon xchiujtiuj imiuan oksekimej.