Makasikamatikan tlenon kuajli niman tlenon ka

¿TLENON KIJTOSNEKI?

Akin kuajli noyekanaj, kuajli kasikamatij tlenon kuajli niman tlenon xkuajli. Niman tlen yokinemilijkej kichiuaskej xnopatla maski itlaj nopatla inpan innemilis, yejuamej kichiuaj ijkon ken yonomachtijkej maski xakaj kimita.

¿TLEKA MELAK NONEKI?

Ipan yejuin tonaltin, kampa escuela, seki tlakuikaltin, películas niman tlen kipanoltiaj ipan televisión xkimititiaj kokonej tlenon kema kuajli niman tlenon xkuajli. Tlen ompa kikakij uelis kichiuas ika maometlamatikan itech tlen intajuan yokimititijkej.

Niman yejuin más inpan panoua akin itelpochtitiuej. Se libro tlen tlajtoua itech kenon titlajtos imiuan mokoneuan, kijtoua ika akin itelpochtitiuej “noneki kimatiskej kenon kixikoskej ijkuak, akin imiuan nomachtiaj niman tlen nopanoltia ipan televisión noso ipan itlaj okse, kinchiualtiskej melak makimixmatikan. Kuakon, ijkuak kitlapejpeniskej tlenon kichiuaskej, noneki mauelikan manoyekanakan ika tlen yokinmachtijkej, maski akin imiuan nouikaj kimijliskej itlaj okse”. Kuakon, kuajli nesi ika noneki kinmachtiskej ijkuak ok kokonej.

¿KENON UELIS TIKINMACHTIS TLENON KUAJLI NIMAN TLENON KA?

Kuajli xkititi tlenon kuajli niman tlenon xkuajli

TLEN BIBLIA TECHMACHTIA: “On yejuan yonoskaltijkej, [...] yokimachtijkej intlamachilis para kajsikamatij on tlen kuajli niman on tlen xkuajli” (Hebreos 5:14).

• Xkititi kenon kitas tlenon kuajli niman tlenon xkuajli. Ika tlen mojmostla nochiua xkititi tlenon kuajli niman tlenon xkuajli. Uelis tikijlis: “Ijkin tikijtos tlen melauak. Ijkin titlakajkayauas”, “Ijkin tikchiuas tlen yotikijto. Ijkin xtikchiuas tlen yotikijto”, “Ijkin titeasikamatis. Ijkin xtiteasikamatis”. Ijkon, mokoneuj ueltias tlenon kuajli niman tlenon xkuajli kichiuas.

• Xtlanemililti tleka noneki kitlakamatis tlen yotikmachti. Kanaj uelis tiktlajtoltis: “¿Tleka mitspaleuis tla tikijtoua tlen melauak?”, “¿Tleka tla titlakajkayaua xok kinekiskej mouan nouikaskej?” noso “¿Tleka xkuajli tla titlachteki?”. Tla ijkon tikchiua, mokoneuj kuajli kinemachtijtias itlamachilis.

• Xkititi kenon tepaleui tla nokojtilia ijkon kichiuas. Kanaj uelis tikijlis: “Tla xtitlakajkayaua, miyekej motech tlaneltokaskej” noso “Tla tejua titetlakaita, oksekimej kinekiskej mouan nouikaskej”.

Xkita ika mochanejkauan makimixmatikan pampa kichiuaj tlen kuajli

TLEN BIBLIA TECHMACHTIA: “Sano nemejuamej kuajli xmixtlalokan para nenkitaskej tla nenmelajkanemij ipan nemotlaneltok” (2 Corintios 13:5).

• Mochanejkauan noneki kichiuaskej tlen yonemomachtijkej, niman ijkon uelis kuajli kijtoskej:

  • “Tejuamej xtitlakajkayauaj”.

  • “Tochan xakaj tlauisoki niman xakaj tetlaueltsajtsilia”.

  • “Tejuamej xtiteuijuikaltiaj”.

Niman ijkon, mokoneuj kitas ika tikasikamatis tlenon kuajli niman tlenon xkuajli xsan noneki tikintlakamatis, yejuin kichiuas ika kuajli matlajtokan itech mochanejkauan.

• Xteneua itlaj tlen panoua niman ika yejon xkititi mokoneuj tlenon xnoneki kichiuaskej mochanejkauan. Tejua uelis tikititis tlenon kichiuaj akin imiuan nomachtia noso tlen kijtouaj ipan televisión. Xtlajtolti: “¿Tlenon tikchiuaskia tejua?” noso “¿Tlenon kichiuaskiaj tochanejkauan?”.

Xchiua maka makilkaua tleka noneki kichiuas tlen kuajli

TLEN BIBLIA TECHMACHTIA: “Xpiyakan kuajli nemochipajkatlamachilis” (1 Pedro 3:16).

• Ijkuak itlaj kuajli kichiuas, xkijli. Ijkuak mokoneuj noyekanas ika tlen yokimat ika kuajli, xkijli niman xtomili tleka kuajli tlen okitlapejpeni kichiuas. Tejua kanaj uelis tikijlis: “Melak nechyolpaktia ika otikijto tlen melauak”. Tla mokoneuj mitsijlia ika okichiuj itlaj tlen xkuajli, kachtopa xkijli ika tiktlasojkamati ika omitsijli niman sakin uelis tikyektlalis.

• Xyektlali ijkuak kichiuas itlaj tlen xkuajli. Xmachti mokoneuj ika san no yejua makinyektlali itlaueluan. Kokonej noneki kimatiskej tlenon xkuajli yokichiujkej niman tleka nemochan xnenkuelitaj manochiua yejon. Sekimej tajtin xkinekij kinyolkokoskej inkoneuan, san ika, tla imiuan titlajtoua itech tlen okichiujkej kinpaleuis makiyektlalikan intlamachilis niman makixmatikan tlenon kuajli niman tlenon xkuajli.