TLEN XKUAJLI PANOTIKA

2 | Xmalui motomintsin

¿TLEKA NONEKI IJKON TIKCHIUAS?

Ipan yejuin tonaltin, miyekej sajnoye nokojtiliaj para kinextijtiaskej tlen ika nopanoltijtiaskej. Niman pampa aman más san tlemach panotika, noneki más nokojtiliskej. ¿Tleka?

Ijkuak ipan se kalpan xonka tomintsin, sajnoye tlapatioua.
Miyekej kipolouaj intekiyo, niman akin ok kipiyaj, san achijtsin kintlaxtlauiliaj.
Ijkuak tlaixpoliui noso ijkuak panoua itlaj tlen xkuajli, miyekej tlajyouiyaj pampa inkaluan xoxotonij noso ijtlakauij, niman xsan yejon, kanaj kipolouaj okseki tlen kipiyaj. Nochi yejuin kichiua maka sa makipiyakan tomintsin.

¿Tikmatiya yejuin?

Tla kuajli tijkui motomin, tikpiyas tlen ika timopanoltis, maski tla kampa tichanti peua tlatlasojti.
Maski se melak miyek tomin makitlani, maski miyek tomin makejyeua noso maski miyek tlemach makipiya, nochi yejon tomin uelis xok patioj yes.
Tomin xuelis kichiuas xyolpaki niman kuajli xmouika iuan mofamilia.

¿Tlenon uelis tikchiuas?

Biblia kijtoua: “Tla tikpiyaj tlen tikuaj niman no tikpiyaj totlaken, ma tipakikan san yejua ika on” (1 Timoteo 6:8).

Yejuin xkijtosneki ika san uelis tiyolpakiskej tla tikpiyaj nochi tlen tiknekij, yejuin kijtosneki ika uelis tiyolpakiskej maski tla san tikpiyaj on tlen noneki. Yejuin melak noneki matikilnamikikan, niman más ijkuak xtikpiyaskej totomintsin.

Kanaj kemantika nonekis xok más tikpopolos motomin, pampa tla tikpopoloua tomin tlen xtikpiya, sakin uelis sajnoye tikteuikilis, niman yejon uelis kichiuas maka sa xyolpaki.

¿KENON UELIS TIKXIKOS? Seki tlen uelis mitspaleuis

Tla tikchiua nochi yejuin, mitspaleuis xmalui motomintsin

MAKA MIYEK TOMIN XPOPOLO

Maka miyek tomin xpopolo

Maka xkoua itlaj tlen xsajnoye noneki tikpiyas. Xmotlajtolti: “¿Yemelak noneki nikpiyas se carro? ¿Uelis niktokas itlaj tlen nijkuas para xok más miyek nijkouas?”.
Achto itlaj tijkouas, xmotlajtolti: “¿Yemelak noneki nikpiyas? ¿Uelis niktlaxtlauas?”.
Tla uelis, xkintlajtlanili tekiuajkej mamitspaleuikan noso okseki grupos akin tepaleuiyaj. Kemantika yejuamej kichijchiuaj se programa niman ijkon tepaleuiskej.

“Nejua iuan nofamilia, otikitakej kenon xok melak miyek tomin tikpopoloskej ipan tlen ika toyolpaktiaj. Noijki opeuj titlakualchiuaj ika tlen xmás patioj” (Gift).

XKITA KECH TOMIN UELIS TIKPOPOLOS

Xkita kech tomin uelis tikpopolos

Biblia kijtoua: “Ijkuak itlaj kuajli kinemiliaj ken kichiuaskej, kuajli kisa. Pero itlaj yejuan san kisijkachiuaj, xkuajli kisa” (Proverbios 21:5). Tla kuajli tikita kech tomin uelis tikpopolos, uelis más mitsajxilis motomintsin.

Kachtopa, xkijkuilo kech tomin tiknemilia tiktlanis ipan se metstli.
Sakin, xkijkuilo kech tomin tikpopoloua ipan se metstli niman kuajli xkita tlenon ika tikpopoloua.
Niman noijki, xkita kech tomin tiktlani niman kech tomin tikpopoloua. Tla tikita ika más miyek tomin tikpopoloua xijkon ken tlen tiktlani, xkita tlenon uelis tikchiuas niman ijkon xok melak tikpopolos motomintsin.

“Nochi metstin tikijkuilouaj kech tiktlanij niman kech tikpopolouaj. Tikejyeuaj seki tomintsin para ijkuak melak nonekis, ijkon xmelak tajmanaj pampa tikmatstokej ika ompa tikpiya achijtsin tomintsin para tla kemantika itlaj panoua” (Carlos).

MAKA XMOTLANEUI NIMAN XKEJYEUA MOTOMIN

Maka xmotlaneui niman xkejyeua motomin

Xkita tlenon uelis tikchiuas niman ijkon xmelak timotlaneuis. Xkejyeujtiuj motomintsin niman ijkon uelis tikmokouilis tlen noneki.
Xkejyeujtiuj motomintsin para tla kemantika itlaj panoua.

KUAJLI XCHIUA MOTEKIYO

Biblia kijtoua: “Tla tichikajkatekiti tikpiyas tlajtlamach on tlen tikneki” (Proverbios 14:23).

Kuajli xchiua motekiyo

Xyolpaki pampa tikpiya tekitl. Maski tla kanaj xmás tikuelita motekiyo, xkilnamiki ika yejon tekitl mitspaleuiya xnexti tlen ika timopanoltis.
Tla nochimej kitaj ika tejua timokojtilia chikauak titekitis niman ika uelis motech tlaneltokaskej, mitspaleuis nochipa xpiya tekitl.

“San katlejua tekitl nikchiua, maski tla xmás nikuelita noso maski tla xueyi niktlani. Melak ninokojtilia kuajli nikchiuas notekiyo, ijkon ken nejua nikuelitaskia manochiua” (Dimitri).

¿Tiktejtemoua tekitl?

Itlaj xchiua. Xtetlajtolti tla yakaj kipiya se tekitl kampa kineki makipaleuikan. Xkimijli mochanejkauan niman moamigos ika tiktejtemoua tekitl.
Maka xmoneneki. Kanaj xnochipa tiknextis se tekitl tlen tejua tikuelitaskia tikpiyas.