TLAMACHTIJLI 02

Biblia techyolseuiya

Ika amatl

Miyekej kixnamikij tlen xkuajli, ika yejon, noyolkokouaj niman najmanaj. Kanaj tejua noijki ijkon timomachilia. Kanaj tikualo noso kanaj yomik yakaj akin melak tiktlasojtlaya. Ika yejon, kanaj timotlajtoltia: “¿Ajsis se tonajli ijkuak xok titlajyouiskej?”. Tlen kijtoua Biblia uelis mitsyolseuis.

1. ¿Kenijki techyolseuiya Biblia?

Biblia techijlia tleka nochiua tlen xkuajli. Noijki kijtoua ika ajsis se tonajli ijkuak xok titlajyouiskej niman ijkuak melak kuajli tinemiskej (xkita Jeremías 29:11, 12). Biblia techpaleuiya matinemikan ika toyojlo maski aman tikixnamikij tlen xkuajli. Noijki techijlia ika uelis nochipa tiyolpakiskej.

2. ¿Tlenon kijtoua Biblia nochiuas ika tlayekapan?

Biblia techijlia ika sa achijtsin poliui ijkuak “xok onyas mikilistli, nion chokistli, nion ajmantli, nion kokolistli” (xkita Apocalipsis 21:4). Ajsis se tonajli ijkuak xok titlajyouiskej, ijkuak xok onias tlen xkuajli, ijkuak xok tikualoskej, ijkuak xok yakaj mikis niman ijkuak xok onias mayantli. Biblia kijtoua ika tejuamej uelis nochipa tinemiskej ipan se tlaltikpaktli kampa melak tlakualtsinkan yes.

3. ¿Tlenon mitspaleuis xneltoka ika nochiuas tlen kijtoua Biblia?

Miyekej kuelitaskiaj manoyektlali tlen panotika, san ika, kinemiliaj ika xkeman ijkon panos. ¿Tejua tlenon tiknemilia? Biblia kijtoua ika ajsis se tonajli ijkuak xok nochiuas tlen xkuajli. Tla kuajli tomachtiaj Biblia, tikitaskej ika uelis tikneltokaskej tlen ompa ijkuiliujtika (Hechos 17:11). Timitsyolchikauaj kuajli xmomachti Biblia niman san no tejua xkita tla uelis tikneltokas tlen ompa kijtoua.

OKSEKI XKASIKAMATI

Biblia kijtoua tlenon nochiuas ika tlayekapan. Matitlajtokan itech yejuin niman matikitakan kenijki Biblia melak miyekej yokinpaleui.

Miyek tlaixkopinaltin: Ipan seki tlaixkopinaltin nesi kenon miyekej tlajyouiyaj ipan yejuin tonaltin. Ipan okseki tlaixkopinaltin nesi kenon tinemiskej ika tlayekapan.

4. Biblia kijtoua ika ajsis se tonajli ijkuak nochipa tinemiskej ika toyojlo

Tlatsintlan uajnestiuej seki textos tlen techititiaj tlenon panos ika tlayekapan. ¿Katlejua más tikuelitaskia manochiua? ¿Niman tleka?

Xkimitakan textos tlen tlatsintlan uajnestiuej niman xtlajtokan itech yejuin:

¿Tiknemilia ika uelis mitspaleuiskej yejuin textos? ¿Tiknemilia ika yejuin textos kinpaleuis mofamilia niman moamigos?

San xkonnemili ijkuak ijkin tinemiskej:

TLEN XOK YAKAJ IPAN NOCHIUAS	TLEN NOCHIMEJ INPAN NOCHIUAS
Xok yakaj tlajyouis, nion ueuentsintias nion mikis (Isaías 25:8).	Nochimej kitaskej ika yoliuiskej akin kintlasojtlayaj (Juan 5:28, 29).
Xok yakaj kipiyas nion se kokolistli (Isaías 33:24; 35:5, 6).	Nochimej kojtikej yeskej ken ijkuak telpokamej katkaj (Job 33:25).
Xok yakaj kichiuiliskej tlen xkuajli (Isaías 32:16, 17).	Nochimej kipiyaskej miyek tlen kikuaskej, kipiyaskej kanon chantiskej niman kinyolpaktis intekiyo (Isaías 30:23; Isaías 65:21, 22).
Xok yakaj tlajyouis ipampa guerras (Salmo 46:9).	Nochimej nemiskej ika inyojlo (Salmo 37:11).
Xok yakaj najmanas ipampa tlen xkuajli okichiuilijkej (Isaías 65:17).	Nochimej chantiskej ipan yejuin tlaltikpaktli kampa melak tlakualtsinkan yes niman xok yakaj mikis (Salmo 37:29).

Se konetsintli akin achto kualouaya pajti niman kinapaloua inan.

Se ueuentsin akin xok ueliya nejnemiya aman yotelpochtiak niman kimapeujtiuj se carretilla kampa kimitki miyek verduras.

5. Tlen kijtoua Biblia uelis techpaleuis kuajli matinemikan

Miyekej melak najmanaj noso hasta tlauelmikij pampa nochiua tlen xkuajli. Ika yejon, sekimej kiyejyekouaj kiyektlaliskej tlen panotika. Xkita kenijki Biblia melak miyekej kinpaleuijtika. Xkitakan VIDEO niman xtlajtokan itech yejuin:

VIDEO: Niknekiya maka sa manochikoitalo (4:07)

Tlen nesi ipan video “Niknekiya maka sa manochikoitalo”. 1. Rafika, ijkuak konetl katka kitejtektinemiya algodón imiuan ichanikniuan. 2. Rafika yauj ipan se inueyitlanechikol iteixpantijkauan Jehová niman mojkatlachia ijkuak kita ika ompa xnochikoitalo.

Ken ones ipan video, ¿tlenon xkuelitaya Rafika?
Maski xopopoliuj tlen yejua xkuelitaya, ¿tlenon opanok ijkuak opeuj nomachtia Biblia?

Tlen kijtoua Biblia uelis techpaleuis maka melak matajmanakan ijkuak topan nochiuas tlen xkuajli. Xkitakan Proverbios 17:22 niman Romanos 12:12, niman xtlajtokan itech yejuin:

¿Tiknemilia ika tlen kijtoua Biblia uelis mitspaleuis xyolpaki? ¿Tleka ijkon tiknemilia?

SEKIMEJ KIJTOUAJ: “Melak kualtsin tlen kijtoua Biblia, san ika, kanaj xmelauak nochiuas”.

¿Tlenon uelis mitspaleuis kuajli xneltoka ika tlen kijtoua Biblia melauak nochiuas?

TLEN OTIUEL

Biblia techijlia ika ajsis se tonajli ijkuak nochipa tiyolpakiskej. Yejuin techpaleuiya maka melak matajmanakan ijkuak topan nochiua tlen xkuajli.

¿Kenon titlanankiliskia?

¿Tleka nochimej noneki makimatikan tlen kijtoua Biblia?
¿Tlenon kijtoua Biblia nochiuas ika tlayekapan?
¿Tiknemilia ika mitspaleuis tlen kijtoua Biblia? ¿Tleka ijkon tiknemilia?

Xkijkuilo kemanon otitlan yejuin tlamachtijli: :

Xchiua yejuin

Para maka tikilkauas tlen Biblia kijtoua nochiuas, oksejpa xkimita textos tlen uajnestiuej ipan yejuin tlamachtijli.

Tlen noijki uelis tikchiuas:

Okse tlen uelis tikchiuas

OKSEKI XKITA

Xkita kenijki más techyolseuiya Biblia.

“¿Akinon uelis techyolseuis?” (¡Xtlachiakan!, 22 de abril de 2004)

Xkita tlenon yokinyolseui akin melak kualoj.

“¿Uelis techpaleuis Biblia matiyolpakikan maski tikualoj?” (Tlamachtijli de jw.org)

Xkita yejuin video niman xkonnemili ika tejua iuan mofamilia nennemij ipan se kualtsin tlaltikpaktli.

Sa nikchiatika yejon tonajli (3:37)

Xkita kenijki Biblia okipaleui se tlakatl akin yeuejkaui kinekiya kiyektlalis tlen panotika.

“Yonikasikamat ika san toTajtsin uelis tlayektlalis” (Amatl Tekakistilijketl, 1 de julio de 2013)