TLAMACHTIJLI 37
¿Tlenon kijtoua Biblia itech tekitl niman tomin?
¿Xmelak ika tajmanaj ijkuak xtikpiyaj tekitl noso ijkuak xtikpiyaj tomin? Kema, miyekej hasta uelis kinemiliskej ika xuelis tiktekichiuiliskej Jehová ijkon ken kinamiki pampa noneki titekitiskej niman ijkon tikpiyaskej tlen techpoloua. Matikitakan kenijki Biblia uelis techpaleuis.
1. ¿Tlenon kijtoua Biblia itech tekitl?
Jehová kineki matechyolpakti totekiyo. Biblia kijtoua: “Xonka itlaj tlen melak kuajli para se tlakatl ken [...] mayolpaki ijkuak chikauak tekiti” (Eclesiastés 2:24, TNM). Jehová chikauak tekiti. Kuakon, ijkuak tejuamej titekitkej ijkon ken yejua, tikchiujtokej tlen yejua kuelita niman tiyolpakij.
Maski noneki titekitiskej, xnoneki tijkauiliskej ika totekiyo makichiua maka kuajli matiktekichiuilikan toTajtsin (Juan 6:27). Jehová techijlia ika yejua techmakas nochi tlen techpoloua tla tejuamej tokojtiliaj chikauak tiktekichiuiliskej niman tla nochipa tiktlakamatij.
2. ¿Tlenon kijtoua Biblia itech tomin?
Biblia kijtoua ika tomin tepaleuiya, san ika, noijki kijtoua ika tomin xuelis kichiuas melauak matiyolpakikan (Eclesiastés 7:12). Ika yejon, Biblia techijlia maka matiktlasojtlakan tomin, niman noijki techijlia: “Xpakikan san ika on tlen nenkipiyaj” (xkita Hebreos 13:5). Ijkuak tiyolpakij san ika tlen tikpiyaj, xtiknekij totomintiskej, xtiktlaneuij tomin tlen kanaj xuelis tiktekuepiliskej niman xsan tiknemilijtokej tikpiyaskej okseki tlemach (Proverbios 22:7). Noijki xtokalaktiaj kampa nauiltilo ika tomin san pampa tiknekij sajnoye totomintiskej.
3. ¿Kenijki uelis titepaleuiskej ika totomin?
Jehová kuelita kitemakas tlen kipiya, kuakon, ijkuak tejuamej titepaleuiyaj ika tlen tikpiyaj, tikteititijtokej ika noijki tikchiuaj ken Jehová (1 Timoteo 6:18). Ika totomin uelis titlapaleuiskej ipan tlanechikojli, tikinpaleuiskej tokniuan niman oksekimej akin kixnamiktokej tlen xkuajli. Jehová xkita kech tiktemakaj, yejua kita tleka tiktemakaj. Tla ika nochi toyojlo tiktemakaj tlen tikpiyaj, tiyolpakiskej niman noijki tikyolpaktiskej Jehová (xkita Hechos 20:35).
OKSEKI XKASIKAMATI
Matikitakan tlenon panos tla titekitij san ken kinamiki niman tla tiyolpakij san ika tlen tikpiyaj.
4. Tikyolpaktiaj Jehová ijkuak kuajli titekitij
Tla kuajli touikaj iuan Jehová, tikitaskej tekitl san ken kinamiki. Xkitakan VIDEO niman xtlajtokan itech yejuin:
¿Tlenon más otikuelitak itech tlen kichiuaya Jason ipan itekiyo?
¿Tlenon kichiuaya niman ijkon kitas itekiyo san ken kinamiki?
Xkitakan Colosenses 3:23, 24 niman xtlajtokan itech yejuin:
¿Tleka melak noneki kuajli matitekitikan?
Maski noneki titekitiskej, xnoneki tijkauiliskej ika totekiyo makichiua maka kuajli matiktekichiuilikan Jehová.
5. Melak tepaleui tla tiyolpakij san ika tlen tikpiyaj
Miyekej kinekij melak notomintiskej, san ika ¿tlenon techijlia Biblia itech yejuin? Xkitakan 1 Timoteo 6:6-8 niman xtlajtokan itech yejuin:
¿Tlenon techijlia Biblia?
Uelis tiyolpakiskej maski xtikpiyaj miyek tomin. Xkitakan VIDEO niman xtlajtokan itech yejuin:
¿Tleka melak yolpakij akin ouajneskej ipan video maski xkipiyaj miyek tomin?
Miyekej sajnoye miyek tomin kipiyaj, san ika, kinekij más notomintiskej. Jesús okijto ika tla ijkon tikchiuaj, uelis techijtlakos. Xkitakan Lucas 12:15-21 niman xtlajtokan itech yejuin:
¿Tlenon mitsmachtia tlen okijto Jesús? (Xkitakan Lucas 12:15).
Xkitakan Proverbios 10:22 niman sakin xkitakan tlenon kijtoua 1 Timoteo 6:10. Aman xtlajtokan itech yejuin:
¿Tejua tlenon tiknemilia más kuajli: tikpiyaskej miyek tomin, noso touikaskej iuan Jehová? ¿Tleka ijkon tiknemilia?
¿Tlenon topan nochiuas tla melak tiknekij totomintiskej?
6. Jehová nochipa techmakas tlen techpoloua
Tlen tiknekiskej tikchiuaskej ijkuak xtikpiyaskej tekitl noso ijkuak xtikpiyaskej tomin uelis techititis tla melauak titlaneltokaj itech Jehová. Xkitakan VIDEO. Ompa nenkitaskej tlenon uelis techpaleuis tla kemantika ijkon topan nochiua. Aman xtlajtokan itech yejuin:
¿Tlenon okixnamik tokniuj akin otikitakej ipan video?
¿Tlenon okipaleui makixiko nochi tlen kixnamiktoya?
Xkitakan Mateo 6:25-34 niman xtlajtokan itech yejuin:
¿Tlenon kichiuas Jehová inpampa akin chikauak kitekichiuiliaj niman nokojtiliaj nochipa kitlakamatiskej?
SEKIMEJ KIJTOUAJ: “Noneki chikauak nitekitis niman ijkon nikintlakualtis nochanejkauan. Xnochipa uelis nias tlanechikoltin”.
¿Katlejua texto mitspaleuiya xkita ika más kuajli tla tiktekichiuilia Jehová niman nochipa tiktlakamati?
TLEN OTIUEL
Maski noneki titekitiskej niman ijkon tiktlaniskej tomin, xnoneki tijkauiliskej ika yejon makichiua maka kuajli matouikakan iuan Jehová.
¿Kenon titlanankiliskia?
¿Tlenon mitspaleuis xkita tekitl ijkon ken kinamiki?
¿Tleka melak kuajli tla tiyolpaki san ika tlen tikpiya?
Jehová kijtoua ika kinmakas itekipanojkauan nochi tlen kinpoloua, ¿kenijki uelis tikteititis ika tikneltoka yejuin?
OKSEKI XKITA
¿Xkuajli tla yakaj kipiya miyek tomin? Xkita tlen Biblia kijtoua.
¿Kuelita toTajtsin matiktemakakan tlen tikpiyaj? Xkita tlen Biblia kijtoua.
“¿Tlenon kijtoua Biblia itech yakaj akin kuelita kitemakas tlen kipiya?” (Tlamachtijli de jw.org)
¿Xkuajli tla yakaj nauiltia ipampa tomin?
“Tlen kijtoua Biblia: Timauiltis ipampa tomin” (¡Xtlachiakan!, marzo de 2015)
Xkita tlenon okipaleui manopatla se tlakatl akin nauiltiaya ipampa tomin niman tlachtekiya.
“Melak nikuelitaya nias kampa notlatlanij caballos” (Amatl Tekakistilijketl, 1 de noviembre de 2011)