¿Kenon noneki tiknotsaskej toTajtsin tla tiknekij matechkaki?
ToTajtsin Jehová techkaki “ipan toueyikatsajtzilis” (Salmo 65:2). Uelis tiknotsaskej maski san yolik noso chikauak, san tlen hora, niman maski san kanon tinemiskej. Jehová kineki matikitakan ken “toTaj”, niman yejua akin melak kuajli tajtli (Mateo 6:9). Ika tlasojtlalistli, Jehová techmachtia kenon noneki tiknotsaskej tla tiknekij matechkaki.
MATIJKUIKAN ITOKA JESÚS IJKUAK TIKNOTSASKEJ TOTAJTSIN JEHOVÁ
“NoTajtsin mechmakas nochi tlen nenkitlajtlaniliskej ikan notokatsin” (Juan 16:23).
Tlen Jesús okijto techmachtia ika Jehová kineki yejua matiknotsakan, niman xkineki matiknotsakan intechkopa tajtsitsintin, santos, ángeles noso inpampa tochanejkauan akin yomijkej. ToTajtsin noijki kineki matiknotsakan ika itokatsin Jesucristo. Ijkuak tikuij itoka Jesús, tikititiaj toTajtsin ika tikmatstokej ika yejua techkaki itech tlen Jesús okichiuj topampa. Jesús okijto: “Tej, san nejua notechkopa uelis ajsiskej itech noTajtsin” (Juan 14:6).
MATIKNOTSAKAN IKA NOCHI TOYOJLO
“Xkijlikan nochi tlinon mechajmana” (Salmo 62:8).
Ijkuak tiknotsaskej Jehová, noneki tiknotsaskej ken se totaj akin techtlasojtla. Maka san matikpouakan ipan se libro noso maka san matikijtokan tlen yotiktsontekontlalijkej. Ijkuak tiknotsaskej toTajtsin, matikititikan ika tiktlakaitaj niman matikijlikan nochi tlen tikmachiliaj.
MATIKTLAJTLANILIKAN TOTAJTSIN TLEN YEJUA KUELITA
“Tikneltokaj ikan nochi toyojlo, ika Dios san tlinon tiktlajtlaniliskej ken yejua kineki, yejua techkakis” (1 Juan 5:14).
Ipan Biblia, toTajtsin techijlia tlenon kichiuas topampa niman tlenon kineki matikchiuakan ipampa. Tla tiknekij ika yejua matechkaki, noneki tiknotsaskej “ken yejua kineki”. Tla tiknekij ijkon tikchiuaskej, noneki tikpouaskej Biblia, niman ijkon kuajli tikixmatiskej. Ijkon, toTajtsin kinektos techkakis.
¿TLENON NONEKI TIKTLAJTLANILISKEJ?
Matiktlajtlanikan tlen techpoloua. Uelis tikijliskej toTajtsin matechpaleui matiknextijtiakan tlen ika topanoltiskej, tlen tikuaskej noso matikpiyakan tlen ika totlakentiskej noso kampa tichantiskej. Niman noijki uelis tiktlajtlaniliskej matechpaleui matikchiuakan tlen kuajli niman matitlaxikokan ijkuak tikpiyaj tlauejli. Noijki, uelis tikijliskej matechtlapopolui, makichikaua totlaneltokil niman matechtlajpiya (Lucas 11:3, 4, 13; Santiago 1:5, 17).
Matiktlajtlanikan inpampa oksekimej. Akin kuajli tajtin kuelitaj ijkuak inkoneuan notlasojtlaj. Jehová yejua toTaj niman kineki sa no tejuamej matotlajpiyakan. Noneki matiktlajtlanikan ipampa toixnamik, tokoneuan, tochanejkauan niman ipampa toamigos. Santiago, inomachtijkauj Cristo, okijto: “Xchiuakan oración impampa oksekimej” (Santiago 5:16).
Matiktlasojkamachilikan. Biblia techijlia ika akin otexchijchiuj miyek yokichiuj topampa: “Yejua kichiua para ma kiaui niman para kuajli ma tlatlaki. Yejua tej, techmaka on tlen tikuaj para kuajli tinemij niman tipakij ikan nochi toyojlo” (Hechos 14:17). Tla titlanemiliaj itech nochi tlen toTajtsin yotechmakak, tiknekiskej tiktlasojkamachiliskej. San ika, noijki noneki tikchiuaskej tlen yejua technauatia niman ijkon tikititiskej ika tiktlasojkamachiliaj (Colosenses 3:15).
MAKA MATIJKAJKAUAKAN IKA TIKNOTSAJ TOTAJTSIN
Kemantika kanaj uelis tajmanaskej pampa xnimantsin technankilia toTajtsin. ¿Kijtosneki yejon ika toTajtsin xkineki techpaleuis? ¡Ka, xyejon kijtosneki! Matikitakan seki tlen techititia ika kemantika san noneki xtokajkauaskej tiknotsaskej toTajtsin.
Ipan kachtopa tlamachtijli otitlajtokej itech Steve. Yejua techijlia okseki tlen ipan onochiuj: “Tla xniknotsaskia toTajtsin, xnitlaxikoskia ken hasta aman yonitlaxiko”. ¿Tlenon okipaleui? Yejua opeuj nomachtia Biblia niman okasikamat ika nonekiya nochipa kinotsas toTajtsin. Steve kijtoua: “Niktlasojkamachilia toTajtsin pampa noamigos melak nechtlasojtlaj niman nechpaleuiyaj. Aman melak niyolpaki”.
¿Niman tlenon ipan onochiuj Jenny, akin kimachiliaya ika xkinamikiya makikaki toTajtsin? Yejua kijtoua: “Ijkuak melak xkuajli ninomachiliaya, oniktlajtlanili toTajtsin manechpaleui manikasikamati tleka ijkon ninomachiliaya”. ¿Kenon okipaleui pampa kinotsaya toTajtsin? “Ijkuak niknotsaya toTajtsin oniktlajtlanili manechpaleui maninoita ken yejua nechita. Onikasikamat ika, maski noyojlo nechtlajtlakoltia, toTajtsin xijkon kichiua. Noijki onechpaleui maka maninosiaujkaua”. ¿Tlenon opanok sakin? “Pampa niknotsa Jehová yonechpaleui manikita ken yakaj akin kuajli iuan ninouika, akin xkeman nechkaua, ken se Tajtli tetlasojtlani niman se noTajtsin akin melauak nemi. Yejua nochipa nouan nemis niman nechpaleuis tla ninokojtilia nikchiua tlen kuelita”.
“Ijkuak nikita kenon nokoneuj melak yolpaki maski kualo, nikasikamati ika toTajtsin ijkon onechnankili”, kijtoua Isabel.
Aman matikitakan tlenon ipan onochiuj Isabel. Ijkuak koneua katka, tlapajtikej okijlikej ika ikoneuj uajnemiskia ika se kokolistli. Yejon melak okiyolkoko. Sekimej okijlikej makitlajkali ikoneuj. Yejua kijtoua: “Ijkuakon onikmachili ika nitekipachmikiskia”. ¿Tlenon okichiuj? “Miyekpa oniktlajtlanili toTajtsin manechpaleui”. Sakin, okipix ikoneuj, Gerard, akin kema ouajnen ika se kokolistli. ¿Kimachilia Isabel ika toTajtsin okinankili? ¡Kema! ¿Niman kenon okinankili? “Yopanok 14 xiuitl, niman nikita nokoneuj Gerard ken se kualtsin tetlayokolijli. Ijkuak nikita kenon nokoneuj melak yolpaki maski kualo, nikasikamati ika toTajtsin ijkon onechnankili”.
Yejuin tlajtoltin tlen melak teyolchikauaj techilnamiktiaj tlen okijto salmista: “Tejua tikaki iminoración on yejuan yolyemankej. Tejua tikinyoleua niman tikimpaleuiya” (Salmo 10:17). ¡Kuajli nesi ika melak tepaleui tla tiknotsaj toTajtsin!
Ipan Biblia tiknextiaj miyekpa ijkuak Jesús okinots toTajtsin. Niman más kixmatstokej oración tlen okinmachti inomachtijkauan. ¿Tlenon tiuelij itech yejon oración?