Uelis ika toyojlo tinemiskej maski noixnamikilo
Gary, akin soldado katka, kijtoua ika ijkuak opeuj nomachtia Biblia okasikamat tleka melak nochiua tlen xkuajli niman tleka melak tetlajyouiltiaj. Aman nemi ika iyojlo pampa kimatstok ika Jehová kichiuas ika tinochimej kuajli matinemikan ipan yejuin tlaltikpaktli.
Xsan Gary yokipaleui Biblia. Matikimixmatikan oksekimej akin noijki yokinpaleui.
TLEN BIBLIA KIJTOUA: “Tejua noTEKO, kuajli moyojlo niman titetlapojpoluiya” (Salmo 86:5).
KEN TEPALEUIYA: Wilmar akin ualeua Colombia, kijtoua: “Tlen uajnestiuj ipan Salmo 86:5 melak nechyolseuiya pampa nechtlalnamiktia ika Jehová teiknelia niman kinektok nechtlapopoluilis nochi tlen onikchiuj ipan guerra”.
TLEN BIBLIA KIJTOUA: “Nejua nikchiuas para ma yenkuiya on cielo niman ma yenkuiya on tlaltikpaktli. Nochi on tlen achtoj oonyak, nochimej kelkauaskej; xokaman yakaj kelnamikis” (Isaías 65:17).
KEN TEPALEUIYA: Se siuatl akin itoka Zafirah niman ualeua Estados Unidos, kijtoua: “Nejua melak niajmankamiki niman hasta aman melak nechajmana nochi tlen nopan onochiuj niman tlen onikitak ijkuak nisoldado katka. Pero tlen kijtoua Isaías 65:17 nechtlalnamiktia ika Jehová kichiuas manikilkaua tlen xkuajli niman tlen kemantika hasta xnechkauilia kuajli manikochi. Melak kualtsin yes ijkuak xok itlaj nechyolkokos”.
TLEN BIBLIA KIJTOUA: “Ipan yejon tonaltin nomiyekiliskej akin yolmelaujkej, niman ijkuak xok onias metstli, ipan yejon tonajli xok onias yolseuilistli” (Salmo 72:7, TNM).
KEN TEPALEUIYA: Olexandra akin ualeua Ucrania, kijtoua: “Miyekpa nitlanemilia itech tlen uajnestiuj ipan Salmo 72:7. Nechtlalnamiktia ika sa achijtsin poliui para nochi ken tetlajyouiltia guerra xok keman nochiuas niman noijki xok techajmanas tla uelis itlaj ipan nochiuas tofamilia”.
TLEN BIBLIA KIJTOUA: “Yejuan mikij, oksejpa nemiskej; maski yomikaj oksejpa yoliuiskej. On yejuan tlaltoktokej, oksejpa nokuiteuaskej niman chikauak pakatsajtsiskej” (Isaías 26:19).
KEN TEPALEUIYA: Marie akin ualeua Ruanda, kijtoua: “Ijkuak okinmiktijkej gente akin kimixmatij ken tutsis, okinmiktijkej miyekej de nofamilia. San ika, tlen kijtoua Isaías 26:19 kuajli nechititia ika oksejpa nikimitas. Sa niknektok imiuan niyolpakis ijkuak yoliuiskej”.
TLEN BIBLIA KIJTOUA: Sa achijtsin poliui ijkuak akin xkuajkualtin “popoliuiskej. Pero on yejuan yolyemankej itech toTEKO, kiseliskej on kuajli tlajli. Niman sanoyej pakanemiskej ikan yolseuilistli pampa xitlaj kimpajsolos” (Salmo 37:10, 11).
KEN TEPALEUIYA: Daler akin ualeua Tayikistán, kijtoua: “Maski nikan kampa nichanti yotlan guerra, ok nemij akin tetlajyouiltiaj niman kichiuaj tlen xkuajli. Pero Salmo 37:10 niman 11 melak nechyolchikaua pampa nikmatstok ika Jehová kita tlen nopan nochiua niman nechasikamati. Niman noijki yokijto ika kipopolos nochi tlen xkuajli niman xok keman tikilnamikiskej”.
Nochimej akin nikan yonoteneujkej testigos de Jehová niman pampa yonomachtijkej Biblia, yonopatlakej niman nemij ika inyojlo. Yejuamej aman xok tetlauelitaj niman xok techikoitaj (Efesios 4:31, 32). Akin titestigos de Jehová xtokalaktiaj ipan política niman xtiteixnamikij (Juan 18:36).
Tinochimej akin titestigos de Jehová san sekan topaleuiyaj ijkon ken se familia nopaleuiya (Juan 13:35). Olexandra akin yotikteneujkaj, oyajkej ipan okse país iuan ikniuj pampa kampa chantiyaj onkatka guerra. Yejua kijtoua: “Ijkuak otajsikej ipan país kampa otopaleuitoj, testigos de Jehová sa techchiatoyaj. Yejuamej otechpaleuijkej para nimantsin otomatkej ipan yejon país kampa otajsikej”.
Timitsnotsaj touan xtlakakiti kampa tosentlaliaj, ompa tiuelis tlen temachtia Biblia niman tlenon uelis tikchiuaskej para matechpaleui matinemikan ika toyojlo. Xuiya ipan jw.org niman xtejtemo kanon uelis tias noso xtlajtlani mamitsmachtikan Biblia tlen xtiktlaxtlauas. Se testigo de Jehová mitsmachtis ika libro ¡Nochipa uelis tiyolpakis!