Moua e Isaako e Hoana Mitaki

ILOA nakai e koe ko hai e fifine he fakatino nei? Ko e higoa haana ko Repeka. Ti ko e tagata taane ne hau a ia ke feleveia ko Isaako. Ko e eke ne fai a ia mo hoana haana. Tupu mai fēfē e mena nei?

E, na manako e matua taane ha Isaako ko Aperahamo ke moua e hoana mitaki ma e tama haana. Nakai manako a ia ke mau a Isaako mo e taha fifine Kanana, ha kua tapuaki e tau tagata nei ke he tau atua fakavai. Ti ui atu a Aperahamo ke he fekafekau haana mo e pehē: ‘Manako au ke fano a koe ke he magafaoa haaku ne nonofo i Karana mo e tamai e hoana ma e tama haaku ko Isaako.’

He mogoia ni ne uta he fekafekau ha Aperahamo hogofulu e kamela ti fina atu he fenoga loa. He magaaho ne tata atu a ia ke he matakavi ne nonofo ai e tau magafaoa ha Aperahamo, ne tu a ia he tapa vai keli. Kua hoko ke he magaaho afiafi, ko e magaaho ka o mai e tau fifine he maaga ke utu vai mai he vai keli. Ti liogi ai e fekafekau ha Aperahamo ki a Iehova: ‘Ko e fifine ka tamai taha magavai ma haaku mo e tau kamela, kia fifili e koe a ia ke eke mo hoana ha Isaako.’

Nakai leva ti hau a Repeka ke utu vai. Magaaho ne ole e fekafekau ki a ia ke age taha mena inu, ne age e ia. Ti fano a ia tamai fakalahi e vai ke fakainu aki e tau kamela oti ne fia inu. Ko e gahua uka lahi a ia ha ko e mena lahi mahaki e inu vai he tau kamela.

He magaaho ne oti e gahua nei ha Repeka, ne hūhū e fekafekau ha Aperahamo ki a ia, ko hai e higoa he matua taane haana. Ne ole foki a ia ko e maeke nakai ke nofo taha e pō he kaina ha lautolu. Ne pehē a ia: ‘Ko e matua taane haaku ko Petueli, ti fai mena ke nofo ai a koe mo mautolu.’ Ne iloa he fekafekau ha Aperahamo ko Petueli ko e tama taane he matakainaga ha Aperahamo ko Nakori. Ti fakatokotiu a ia mo e fakaaue ki a Iehova he takitaki atu a ia ke he magafaoa a Aperahamo.

He pō ia ne tala age he fekafekau ha Aperahamo ki a Petueli mo e tugaane ha Repeka ko Lapana e kakano ne hau ai a ia. Ne talia tokoua e laua kua maeke a Repeka ke ō mo ia ke mau mo Isaako. Ko e heigoa ha Repeka ne talahau he magaaho ne hūhū atu ki a ia? Pehē a ia, ‘E,’ manako a ia ke fano. He aho hake ni, ne heke e tau kamela ha lautolu ti kamata e fenoga loa ki Kanana.

Magaaho ne hohoko a lautolu, kua afiafi tuai. Ne kitia e Repeka e tagata taane ne faifano he fonua. Ko Isaako a ia. Ne fiafia lahi a ia ke kitia a Repeka. Ko e matua fifine haana ko Sara ne tolu laia e tau he mate, ti momoko agaia a ia ha ko e mena nei. Ka ko e magaaho nei kua lahi e manako loto ha Isaako ki a Repeka, ti liu foki a ia fiafia.