Tau Mahaga ne Kehekehe

KUA kehekehe lahi e tau tama taane tokoua nei, pihia nakai? Iloa nakai e koe e tau higoa ha laua? Ko e tagata takafaga manu ko Esau, ka ko e tama taane ne leveki mamoe ko Iakopo.

Ko Esau mo Iakopo ko e mahaga taane ha Isaako mo Repeka. Ko e matua taane ko Isaako ne ofania lahi a Esau, ha kua iloilo a ia he takafaga ti tamai e tau kai ki kaina ke lata mo e magafaoa. Ka e ofania lahi e Repeka a Iakopo, ha ko e tama nofotaha mo e totonu.

Ne moui agaia e matua tupuna taane ko Aperahamo, ti maeke ia tautolu ke manamanatu ke he fiafia ha Iakopo ke fanogonogo ki a ia ka tutala hagaao ki a Iehova. Fakahiku ne mate a Aperahamo he 175 e tau he moui, he magaaho ia kua 15 e tau tau moui he mahaga.

He magaaho ne 40 e tau ha Esau ne hoana e ia tokoua e fifine mai he motu ko Kanana. Ne momoko lahi a Isaako mo Repeka ha ko e mena nei, ko e tau fifine nakai tapuaki a laua ki a Iehova.

Ti hoko ke he taha aho ne fai mena tupu ati ita lahi ai a Esau ke he tehina haana ko Iakopo. Ne hoko mai e magaaho ke fakamonuina e Isaako e tama taane uluaki haana. Ha ko e uluaki a Esau ia Iakopo, ne amanaki a Esau ke moua e fakamonuinaaga nei. Ka kua fitā he fakafua e Esau e tonuhia haana ke moua e monuina ki a Iakopo. Pihia foki, he magaaho ne fanau e tau tama taane tokoua ne pehē e Atua to moua e Iakopo e monuina. Ti ko e mena hanei ne tupu. Ne foaki age e Isaako e monuina ke he tama taane haana ko Iakopo.

He magaaho fakamui, ne iloa e Esau e mena nei ti ita lahi a ia ki a Iakopo. Ne to lahi e ita haana ti pehē a ia to kelipopo e ia a Iakopo. He magaaho ne logona e Repeka e mena nei, kua tupetupe lahi a ia. Ti tala age a ia ke he taane haana ko Isaako: ‘To kelea lahi foki ka mau a Iakopo mo e taha he tau fifine nei ha Kanana.’

Ko e mena ia ati hea ai e Isaako haana tama ko Iakopo mo e pehē age: ‘Aua neke faihoana a koe ke he taha fifine Kanana. Ka e fano ke he kaina he magafaoa he tupuna taane haau ko Petueli i Karana. Kia mau a koe mo e taha he tau tama fifine he haana tama taane ko Lapana.’

Ne fanogonogo a Iakopo ke he matua taane haana, ko e mogoia ni ti kamata haana fenoga loa ke he tau magafaoa ne nonofo i Karana.