Fakatufono he Kautu he Atua​—Kua Moli he Vaha Nei

“Maeke fefe he tau motu loga, mo e tau aga fakamotu nakai fetataiaki ne tutupu he tau magaaho kehekehe, ke fetaliaaki? Kua fita he talahau ko e totoko mai ni he taha palaneta ka fakalataha e lanu tagata.”​—The Age, nusipepa Ausetalia.

KO E totoko mai he taha palaneta? Po ke tamai he mena ia e kaufakalataha ke he tau motu oti he lalolagi po ke nakai, ne tutala moli e perofetaaga he Tohi Tapu ke he matematekelea hane hau ka taute e tau motu he lalolagi ke pipi auloa. Pauaki, ko e matematekelea to tamai he tau malolo ne nakai mai he lalolagi.

Ko e Patuiki ko Tavita ha Isaraela i tuai kua vagahau fakaperofeta ke he tuaga he lalolagi nei. Ne tohi e ia i lalo hifo he omoiaga faka-Atua: “Kua tutu mai e tau patuiki he lalolagi, kua pulega fakalataha foki e tau iki, ke totoko atu kia Iehova mo ia ne fakauku e ia. Kia momotu e tautolu ha laua a tau liliaga, mo e tiaki ha laua a tau toua mai ia tautolu.” (Salamo 2:2, 3; Gahua 4:25, 26) Mailoga ko e tau iki he lalolagi to fakapotopoto auloa ke totoko ki a Iehova, ko e Tufuga he lalolagi mo e lagi katoatoa, mo ia kua fakauku hana, po ke Patuiki kotofa hana, ko Iesu Keriso. Maeke fefe e mena ia ke tupu?

Hagaao ke he matohiaga he Tohi Tapu mo e tau perofetaaga ne fakamoli, he tau 1914, ne fakatu ai e Kautu he Atua i luga he lagi mo e ko Iesu Keriso e Patuiki.a He magaaho ia ko e tau motu he lalolagi ne taha ni e manatu. He nakai omaoma ke he pule katoatoa he Kautu fanau fou he Atua, ne lavelave a lautolu he fetokoaki ke he pule​—ko e Felakutaki Lahi, po ke Felakutaki I he Lalolagi.

Fefe e onoonoaga ha Iehova ko e Atua ke he aga pihia he tau tagata ne pule? “To kata a ia kua haele ke he lagi; to va e [Iehova] kia lautolu. Ti vagahau atu ai a ia kia lautolu ke he hana ita, ti fakamatakutaku foki e ia a lautolu ke he hana ita lahi.” Ti, to tala age a Iehova ke he hana Tama, ko e Patuiki kua fakauku he Kautu: “Kia ole mai a koe kia au, ti ta atu ai e au e tau motu kehe mo fonua hāu; mo e tau kala he lalolagi ke eke māu. To pakipaki e koe a lautolu ke he tokotoko lapatoa:to lipilipi e koe a lautolu tuga ne kapiniu he tagata eke kapiniu kelekele.”​—Salamo 2:4, 5, 8, 9.

Ko e tuki malipilipi nei he fakaotiaga he tau motu totoko aki e tokotoko lapatoa to fakahoko i Amaketo. Ko e tohi fakahiku he Tohi Tapu, ko Fakakiteaga, ne fakamaama e tapunu he tau mena tutupu nei ko e ‘tau ke he aho lahi he Atua Mua Ue Atu,’ ka fakapotopoto auloa ai e “tau patuiki he lalolagi, mo e lalolagi oti kana.” (Fakakiteaga 16:14, 16) I lalo hifo he hufiaaga fakatemoni, ko e tau motu he lalolagi to fakahiku ai ke fakalataha ke he taha e foliaga​—ke tau atu ke he Atua Mua Ue Atu.

Ko e magaaho ka fakapotopoto auloa e tau tagata ke tau atu ke he pule katoatoa ha Iehova hane hoko mafiti mai. Ka e fuluola ai, ko e ‘fakalataha ha lautolu’ to tamai ki a lautolu e nakai aoga fakatagata. Kehe ai, ko e tau mahani ha lautolu to eke ko e kamataaga he mafola ne kua leva e fakatali e tau tagata oti. Maeke fefe? Ke he tauaga fakahiku ia, ko e Kautu he Atua “to tuki malipilipi mo e fakaotioti e tau kautu oti ia [he lalolagi], ka ko ia to tumau tukulagi a ia.” (Tanielu 2:44) Ko e Kautu he Atua, nakai ko e fakatokatokaaga he ha tagata, ko e fakatufono ka fakamoli e manako he tau tagata ma e mafola he lalolagi.

Ko e Iki Leveki he Fakatufono he Kautu

Ko e Kautu haia ne tokologa e tau tagata loto fakamoli kua liogi, he pehe: “Kia hoko mai hau a Kautu. Kia eke hau a finagalo ke he lalolagi, tuga ne eke ke he lagi.” (Mataio 6:10) He nakai ko e tuaga manatu noa he loto, ko e Kautu he Atua ko e fakatufono moli ne kua fakakatoatoa e tau gahua homo ue atu tali mai he fakaukuaga i luga he lagi he 1914. Kia o mai a tautolu ke kumikumi falu he tau matapatu mena ne fakakite e moli he Kautu he Atua kua gahuahua katoa he vaha nei.

Fakamua, kua ha ha ai e la tokoluga kua malolo mo e lauia mitaki ne kua takitaki he Patuiki kua fakatu, ko Iesu Keriso. He 33 V.N., ne taute e Iehova ko e Atua a Iesu Keriso ko e Ulu he fakapotopotoaga Kerisiano. (Efeso 1:22) Tali mai i ai, kua fakagahuahua e Iesu e pule hana, he fakatata e hana a lotomatala ke fakatokatoka. Ma e fakatai, he magaaho ne lahi e hoge ne to ki Iuta he senetenari fakamua, ko e fakapotopotoaga Kerisiano kua fakamafiti ke taute e lakaaga ke foaki e lagomataiaga ma e tau tagata ha lautolu. Kua fakatokatoka ai e gahua ke lagomatai, ti ko Panapa mo Saulo kua fakafano atu mafiti mai Anetioka mo e lagomatai fakaalofa.​—Gahua 11:27-30.

Kua nakai tote e mena ka amanaki e tautolu mai ia Iesu Keriso he mogonei ha kua fakagahua ai e fakatufono he Kautu. He ha magaaho ka hohoko e tau matematekelea​—ko e tau mafuike, tau hoge, tau fakapuke, tau matagi lalahi, tau afa, po ke tau mouga pa—​ko e fakapotopotoaga Kerisiano he Tau Fakamoli a Iehova ne mafiti ke fakateliga atu ke he tau manako he tau katofia talitonu mo e falu he tau matakavi kua lauia. Tuga ia, he magaaho ne lauia a El Salvador he tau mafuike lalahi ia Ianuari mo Fepuari 2001, ko e tau gahua lagomatai kua fakatokatoka he tau fahi oti he motu, mo e tau matakau he Tau Fakamoli a Iehova mai i Kanata, Kuatemala, mo e Tau Fahi Kaufakalataha ne foaki e lagomatai. Tolu he tau matakavi tapuaki ha lautolu pihia mo e molea e 500 e tau kaina kua liu talaga he magaaho ku ni.

Tau Tagata he Fakatufono he Kautu he Atua

Tali mai he fakatu ai he 1914, ko e Kautu he Atua he lagi kua fakapotopoto mo e fakatokatoka e hana tau tagata mai ia lautolu he lalolagi katoa. Ko e fakamoliaga anei he perofetaaga maaliali ne fakamau e Isaia: “To hoko ni ke he tau aho a mui, to fakamau ai e mouga ha i ai e fale a Iehova [hana tapuakiaga moli ne fakatokoluga] ke he tapunu mouga ha atu mouga, . . . ti tafe atu ki ai e tau motu oti kana.” Kua fakakite he perofetaaga to o hake “e tau motu kehe loga” ke he mouga ia mo e talia e tau fakaakoaga mo e tau fakatufono ha Iehova.​—Isaia 2:2, 3

Ko e matagahua nei kua moua ai e fakatokatokaaga holo mitaki he tau vaha fou nei​—ko e tau matakainaga he lalolagi katoa ne molea e 6,000,000 he tau Kerisiano he molea 230 e tau motu he lalolagi. Ke he tau fonoaga he lalolagi katoa he Tau Fakamoli a Iehova, ko e tau tagata kitekite kua mahani mau ke ofo he kitia e fakaalofa, mafola, mo e fakalataha ke he vahaloto he moto tagata tokologa, ne kautu mai he tau kaupaaga fakamotu, aga fakamotu, mo e tau vagahau. (Gahua 10:34, 35) Nakai kia talia e koe ma e fakatufono ne maeke ke tamai e tau teau he tau matakau fakamotu ke fakalataha ke he mafola mo e fetaliaaki, kua lata ke lauia mitaki mo e nakai hikihiki​—mo e moli?

Kautu he Atua mo e Fakaakoaga

Ko e tau fakatufono oti kua ha ha i ai e tau tuaga ne kua lata he tau tagata he motu ke moua, mo e ko lautolu oti ne manako ke nonofo i lalo hifo he fakatufono ia kua lata ke moua e tau tutuaga ia. Tatai ai, kua ha ha he Kautu he Atua e tau tutuaga ne kua lata he tau tagata oti ka talia ke moua. Ka e, ke taute e tokologa he tau tagata mo e tau feakiaga kehekehe ke talia mo e muitua ke he tau tuaga tatai ko e matagahua lahi mahaki moli. Hanei, mogoia, taha mena ne fakamoli e moli lahi he Kautu he Atua​—ko e fakaholoaga lagomatai he fakaakoaga ne aamotia mo e hiki nakai ni ke he manamanatuaga ka e pihia foki e loto.

Maeke fefe he fakatufono he Kautu fakatufono ke fakamoli e foliaga uka nei? Ha ko e puhala fakaaposetolo he fakamatala atu ke he “taha fale foki mo e taha fale” mo e fakaako e Kupu he Atua ke he tau tagata takitokotaha. (Gahua 5:42; 20:20) Lauia mitaki fefe e vahega fakaako nei? Ko Jacques Johnson, ko e akoako Katolika, ne tohi he nusipepa fahi tapu i Kanata hagaao ke he tau laliaga hana ke fakalolelole e fifine mai he fakaako mo e Tau Fakamoli a Iehova. “Kua fakagogoa lahi au mo e mailoga to nakai maeke ia au ke kautu,” he talahau e ia. “Ne kamata au ke mailoga he fai mahina he mole ko e tau fifine Fakamoli a Iehova kua haitia e tau fakafetuiaga kakano mo e matua fifine fuata nei ne nofo kaina. Ne fakamatutaki a laua mo ia he lagomatai a ia, fakakapitiga ki a ia, mo e fakatu e pipiaga kakano he loto. Nakai leva ti eke a ia mo tagata gahua ke he lotu ha lautolu ti nakai lahi e mena ke taute e au ke puipui e mena ia he tupu.” Tuga ni e loto he tagata Katolika fakamua nei ne hiki ha ko e ogo he Tohi Tapu ne fakaako he Tau Fakamoli a Iehova mo e ha lautolu a mahani Kerisiano, ti kua aamotia pihia e tau loto he tau miliona he lalolagi.

Ko e vahega fakaako nei​—fakaakoaga he Kautu—​kua fakamatapatu ke he Tohi Tapu, he fakatokoluga hana tau mena aoga mo e tau tutuaga he tau mahani. Kua fakaako ai e tau tagata ke fakaalofa mo e fakalilifu e taha mo e taha pete he tau feakiaga ha lautolu. (Ioane 13:34, 35) Kua lagomatai foki e tau tagata ke tali ke he hatakiaga: “Aua neke mahani foki a mutolu fakalataha mo e lalolagi nai, ka kia faliu a mutolu ke he liu foki fakafou he tau loto ha mutolu, kia kumikumi fakamua e mutolu po ke heigoa e finagalo he Atua, ko e mena mitaki, kia talia foki mo e fiafia, ti kua katoatoa.” (Roma 12:2) He toka ki tua e puhala moui fakamua ha lautolu mo e fiafia he mumuitua ke he tau fakatufono mo e tau matapatu fakaakoaga he Kautu fakatufono, ne totou miliona kua moua e mafola mo e fiafia mogonei mo e amaamanakiaga fulufuluola ma e anoiha.​—Kolose 3:9-11.

Ko e lagomataiaga kitia lahi ke moua e fakalatahaaga nei ke he lalolagi katoa ko e mekasini nei, Ko e Kolo Toko. Ha kua gahua auloa mo e tau puhala fakaliliu mo e tau lakau lolomi he tau vagahau kehekehe, ko e tau vala tala matapatu fakaakoaga i loto he Ko e Kolo Toko kua lolomi fakatatai oti ke he 135 e tau vagahau, mo e molea e 95 e pasene he tau tagata totou he lalolagi katoa ka maeke ke fakaako e tohi he vagahau ni ha lautolu he magaaho taha.

Ko e tagata Mamoga tohi tala ne taute e talahauaga ke he tau misionare mo e tau kautuaga tokoluga i fafo he hana lotu. Ne tohi e ia Ko e Kolo Toko mo e Awake!, ne lomi fakailoa he Tau Fakamoli a Iehova, ko e tau mekasini kua mua atu e mitaki ma e fakamatala mo e pehe: “To nakai fai ke tokutoku kelea e Kolo Toko po ke Awake! he feaki e aga fakateaga​—ka ke he taha fahi, ne fakatupu e lautolu e logonaaga ke mataala ne kua uka lahi ia au ke kitia he tau tohi he falu lotu. Ko e Kolo Toko mo e Awake! kua hauhau ha kua moli e fakaveaga ha lautolu, kua hokulo e kumikumiaga, felauaki mo e latatonu moli mo e lalolagi.”

Kua moli lahi e talahauaga ko e Kautu he Atua hane gahuahua moli. Ko e Tau Fakamoli a Iehova kua fiafia mo e hakahakau he talahau “e tala mitaki nai he kautu” ke he ha lautolu a tau katofia kaina, he uiina a lautolu ke eke mo tau tagata i ai. (Mataio 24:14) Mafanatia nakai e amaamanakiaga pihia ki a koe? Maeke ia koe ke fiafia e tau monuina ne mai ha ko e fakalataha auloa mo lautolu ne kua fakaako ki ai mo e fakamakamaka ke moui ke he tau tutuaga he Kautu. Mua atu agaia ni, maeke ia koe ke hoko mai ke olioli e amaamanakiaga he nonofo i lalo hifo he pule he Kautu he lalolagi fou ne kua mavehe “ke nofo ai e tututonu.”​—2 Peteru 3:13.

[Matahui Tala]

[Fakatino he lau 5]

He tau 1914 ko e tau motu kua lavelave ke he felakutaki he lalolagi

[Tau Fakatino he lau 6]

Ko e gahua foaki noa ko e fakamoliaga he fakaalofa Kerisiano hane gahuahua

[Fakatino he lau 7]

Ko e Tau Fakamoli a Iehova he lalolagi katoa kua aoga mai he tatai e fakaholoaga fakaako