Ko e Ole ne Taute he Lalolagi Katoa

MANAMANATU ke he teau he tau miliona, po ke totou piliona foki, he tau tagata kua ole oti ke he taha e mena. Kua ole a lautolu ke he pule tokoluga mua ue atu he lagi mo e lalolagi katoatoa ke fakamooli e taha ole pauaki. Ka e gahoa ni ia lautolu ne iloa e mena kua ole a lautolu ki ai. Maeke mooli nakai taha mena pihia ke tupu? Kua tupu mooli ai he tau aho oti. Ko e heigoa he tau tagata oti nei kua ole ki ai? Ko e hoko mai he Kautu he Atua!

Hagaao ke he taha fuafuaaga, kua kavi ke he 37,000 e lotu ne talahau ko e tau Kerisiano a lautolu, ti totoku ko Iesu Keriso e Takitaki ha lautolu. Kua molea e ua e piliona tagata he tau lotu ia. Tokologa ia lautolu kua talahau e liogi ne fa iloa ko e Ha Mautolu a Matua po ke Liogi he Iki. Iloa nakai e koe e liogi nei? He fakaako e Iesu ke he tau tutaki haana, ne kamata pehē: “Ha mautolu a Matua na e, ha ha he lagi, kia tapu hau a higoa. Kia hoko mai hau a kautu. Kia eke hau a finagalo ke he lalolagi, tuga ne eke ke he lagi.”—Mataio 6:9, 10.

Kua totou teau e tau tau mogonei hane totoku lagaloga fakalilifu he tau tagata tapuaki e tau kupu ia i loto he tau fale tapu. Ne talahau manatu foki e lautolu he tau potopotoaga fakamagafaoa mo e takitokotaha, he tau magaaho mitaki mo e kelea. Kua talahau fakamooli mo e fakahokulo foki e lautolu e tau kupu. Tokologa foki ne ako manatu mo e talahau tumau ai ka e temotemoai po ke nakai manamanatu ke he kakano. Ne nakai ko e tau tagata nei ni hokoia ha Kerisitenitome ne amaamanaki mo e liogi ke hoko mai e Kautu he Atua.

Kua Ole Pihia Foki e Falu Lotu

Ko e liogi talahaua he tua faka-Iutaia he tau tagata mauku ko e Kaddish. Pete kua tote e hagaao ke he mate po ke maanu, kua fa mahani ke talahau ai he tau magaaho mauku. Ne ole e liogi: “Kia fakatū la e ia [Atua] e Kautu haana he magahala ne moui ai a koe . . . ti taute fakamafiti foki.”a Taha liogi tuai foki he sunako ne talahau ke he amaamanakiaga ma e Kautu he Mesia mai he faoa a Tavita.

Ko e falu tagata he tau tua nakai faka-Kerisiano ne fiafia foki ke he manatu hagaao ke he Kautu he Atua. He The Times of India, ko e takitaki lotu talahaua i Initia he senetenari ke 19 aki ne fiafia ke matutaki auloa e tau tua faka-Hinitu, Musilimi, mo e faka-Kerisiano, ne pehē: “Ko e kautu mooli he Atua to nakai hoko mai ato kaufakalataha e faahi uta mo e faahi lalo.” Mo e ulu faiaoga he koliti Isilama i Strathfield, Ausetalia, ne tohi he foou nei ke he nusipepa: “Ke tuga e tau Musilimi oti, ne talitonu au to liu mai a Iesu mo e fakatū e Kautu mooli he Atua.”

Nakai fakauaua, ko lautolu mogonei ne amaamanaki mo e ole ma e Kautu he Atua kua totou piliona. Ka e manamanatu la ke he mena mooli.

Kua liga iloa e koe ko mautolu ko e Tau Fakamoli a Iehova, ne taute fakailoa e mekasini nei, kua ō ke he taha fale mo e taha fale he matakavi haau ke tutala mo e tau tagata hagaao ke he Tohi Tapu. He tohi e mena nei, kua taute e mautolu e gahua nei ke he lalolagi katoa, ke he 236 e motu mo e ke he molea e 400 e vagahau. Ko e matapatu matakupu he fakamatala ha mautolu ko e Kautu he Atua. Mailoga, ko e mataulu katoa he mekasini nei Ko e Kolo Toko Fakapuloaaga he Kautu a Iehova. Ne fa hūhū a mautolu ke he tau tagata kua liogi nakai a lautolu ma e Kautu ia. Ne tokologa ne tali e. Ka e, ka hūhū ko e heigoa e Kautu ia, laulahi ne tali, “Ai iloa au,” po kua nakai maama mitaki mo e fakauaua e tali ha lautolu.

Ko e ha ne tokologa lahi kua ole ke he taha mena ne nakai maeke ia lautolu ke fakamaama? Kakano kia ha ko e Kautu he Atua ko e matakupu uka mo e halahū? Nakai. Ko e Kautu kua fakamaama fakamatafeiga mo e fakamahino i loto he Tohi Tapu. Mua atu, kua maeke e fekau he Tohi Tapu hagaao ke he Kautu ke foaki ki a koe e amaamanakiaga mooli he tau vahā pouliuli nei. He vala tala ka mui mai, to kitia e tautolu e puhala ka fakamaama he Tohi Tapu e amaamanakiaga ia. To kitia mogoia e tautolu e magaaho ka tali ai e liogi ha Iesu ke hoko mai e Kautu.

[Matahui Tala]