Iehova ko e ‘Fakamoui’ ma Tautolu
“[To] lagomatai foki a Iehova kia lautolu, mo e laveaki a lautolu.”—SALA. 37:40.
1, 2. Ko e heigoa e kupu mooli mua ue atu hagaao ki a Iehova ko e punaaga he fakamafanaaga mo e malolō ma tautolu?
NE HIKIHIKI tumau e tau ata laā. He holo e fua lalolagi, ne hiki tumau foki e tau ata. Ka e nakai hiki e Tufuga he fua lalolagi mo e laā. (Mala. 3:6) “Ko ia,” he talahau he Tohi Tapu, “nakai ha i ai ha mena hikihikifano, po ke mafoki fakatote [“he ata,” NW].” (Iako. 1:17) Ko e kupu mooli mua ue atu nei hagaao ki a Iehova ko e punaaga moolioli he fakamafanaaga mo e malolō ma tautolu, mua atu ka fehagai a tautolu mo e tau kamatamata mo e tau paleko uka. Ko e ha?
2 He mailoga e tautolu ke he vala tala fakamua, kua eke a Iehova mo ‘Fakamoui’ he tau vahā Tohi Tapu. (Sala. 70:5) Ne tumau mo e fakamooli a ia ke he kupu haana; ti fai kakano lahi e tau tagata tapuaki haana he vahā nei ke falanaki ki a ia he ‘lagomatai mo e laveaki ki a lautolu.’ (Sala. 37:40) Laveaki fēfē e Iehova e tau fekafekau haana he tau vahā foou nei? Liga taute fēfē e ia ma tautolu takitokotaha?
Laveaki Mai he Tau Tagata Totoko
3. Ko e ha kua iloa tonu e tautolu to nakai maeke he tau tagata totoko ke taofi e tau tagata a Iehova he fakamatala e tala mitaki?
3 Nakai fai he tau totokoaga loga lahi ha Satani ka taofi e Tau Fakamoli a Iehova mai he foaki e tapuakiaga katoatoa ki a Iehova ne kua lata ki a ia. Kua fakamafana he Kupu he Atua ki a tautolu: “Ko e tau kanavaakau oti kua taute ke tau kia koe, nakai monuina ia; ko e tau alelo oti ke taufetoko mo koe ke he fakafiliaga to fakahala ai e koe.” (Isaia 54:17) Kua lali e tau tagata totoko ka e kaumahala ke taofi e tau tagata he Atua he taute e poakiaga ha lautolu ke fakamatala. Manamanatu ke he ua e fakataiaga.
4, 5. Ko e heigoa e totokoaga ne fehagai mo e tau tagata a Iehova he 1918, ti ko e heigoa e fua?
4 He 1918, ne fehagai e tau tagata a Iehova mo e tau favaleaga loga ne fakaohooho he tau akoako ne foli ke taofi e gahua fakamatala ha lautolu. Ia Me 7, ne fakatoka mai he fakatufono e atāina ke tapaki a J. F. Rutherford ne takitaki e gahua fakamatala he lalolagi katoa he magahala ia, mo e falu he la matapatu. Nakai katoa e ua e mahina, ne fakahala fakakelea e Matakainaga Rutherford mo e tau ekegahua haana ha ko e lagatau fakafualoto ati tuku leva ai he fale puipui. Kua kautū nakai e tau tagata totoko he fakaaoga e tau hopoaga ke taofi tumau aki e gahua fakamatala? Nakai pihia!
5 Manatu e maveheaga a Iehova: “Ko e tau kanavaakau oti kua taute ke tau kia koe, nakai monuina ia.” He hiki mafiti e tau tuaga, ia Mati 26, 1919—hiva e mahina he mole e fakahala he Matakainaga Rutherford mo e tau ekegahua haana—ne fakatoka mai e tau matakainaga ki tua he fale puipui ha kua totogi aki e tupe. He tau hake, ia Me 5, 1920, ne magalo noa e hokotaki ha lautolu. Ne fakaaoga he tau matakainaga e atāina ha lautolu ke fakatumau ke he gahua he Kautu. Ko e heigoa e fua? Tali mai he magahala ia kua tupu lahi mooli e numera! Ko e tau fakaheke oti ke he tau mena ne fua mai ai kua tuku atu ke he ‘Fakamoui.’—1 Kori. 3:7.
6, 7. (a) Ko e heigoa e matagahua ne taute ke he Tau Fakamoli a Iehova i Nasi Sihamani, ti ko e heigoa e fua? (e) Ko e heigoa e fakamooliaga ne fakakite he fakamauaga tala he vahā foou nei ne kitia ke he tau tagata a Iehova?
6 Manamanatu la mogonei ke he fakataiaga ke uaaki. He 1934, ne omonuo a Hitler ke tamate oti e Tau Fakamoli a Iehova i Sihamani. Nakai ko e omonuo fakavai a ia. Ne tokologa ne tapaki mo e tuku ai ke he tau fale puipui. Totou afe he Tau Fakamoli ne matematekelea noa; ti totou teau ne tamate ke he tau kemuaga pagotā. Kautū nakai a Hitler ke he matagahua ia haana ke utakehe e Tau Fakamoli? Taofi katoa nakai e ia e fakamatala he tala mitaki i Sihamani? Nakai! He favaleaga, ne matutaki e tau matakainaga ha tautolu ke gahua fakamatala fufū. He tō hifo e fakatufono Nasi, ne fakaaoga he Tau Fakamoli e atāina ha lautolu ke matutaki e fakamatala. I Sihamani he magaaho nei, kua molea e 165,000 e tagata fakailoa he Kautu. Ati liu tuai e ‘Fakamoui’ ke fakamooli e maveheaga haana: “Ko e tau kanavaakau oti kua taute ke tau kia koe, nakai monuina ia.”
7 Ko e fakamauaga tala he vahā foou nei he Tau Fakamoli a Iehova kua foaki e fakamooliaga, to nakai fakaatā e Iehova ke fakaotioti fakamatakau e tau tagata haana. (Sala. 116:15) Ka e kua a tautolu takitokotaha? Laveaki fēfē e Iehova a tautolu takitokotaha?
Ka e kua e Puipuiaga Fakatino?
8, 9. (a) Iloa fēfē e tautolu kua nakai fai maveheaga ma e puipuiaga fakatino ha tautolu he magaaho tonu nei? (e) Ko e heigoa kua lata ke talahau mooli e tautolu?
8 Igatia a tautolu mo e iloa kua nakai fai maveheaga ma e puipuiaga fakatino ha tautolu he magaaho tonu nei. Taute e tautolu e tuaga ne talahau he tau Heperu tua fakamooli tokotolu ne nakai manako ke hufeilo ke he tupua auro he Patuiki ko Nepukanesa. Ne nakai amanaki e tau fuata taane matakutaku Atua ia to puipui fakamana e Iehova a lautolu mai he hagahaga kelea fakatino. (Totou Tanielu 3:17, 18.) Ko e fakahikuaga he mena ne tupu, ne laveaki e Iehova a lautolu mai he gutuumu ne puho ai e afi. (Tani. 3:21-27) Pihia foki he tau vahā Tohi Tapu, nakai ko e mena tupu tumau e laveakiaga fakamana. Tokologa e tau fekafekau tua fakamooli a Iehova ne kelipopo he tau tagata totoko.—Hepe. 11:35-37.
9 Ka e kua he vahā nei? Ha ko e ‘Fakamoui,’ kua maeke mooli ia Iehova ke laveaki e tau tagata takitokotaha mai he tau tuaga hagahaga kelea lahi. Maeke nakai ia tautolu ke talahau moolioli kua maeke po ke nakai maeke ia Iehova ke lalago mai ke he tau tutupuaga pauaki? Nakai. Ka e liga logona agaia he tagata ne hao mai he tuaga hagahaga kelea kua lalago mai a Iehova. To liga fakaheu he falu ke nakai talia e manatu haana. He magaaho taha, kua lata mooli ia tautolu ke mailoga na tokologa e tau Kerisiano tua fakamooli ne mamate ha ko e favaleaga, tuga e mena ne tupu he magahala Nasi. Ne mamate e falu i lalo he tau tuaga matematekelea lahi mahaki. (Fakama. 9:11) Liga hūhū a tautolu, ‘Kua kaumahala kia a Iehova he eke mo ‘Fakamoui’ ha kua mamate tuai a lautolu ne tua fakamooli?’ Nakai mooli e mena ia.
10, 11. Ko e ha e tagata ne nakai maeke ke taofi e mate, ka ko e heigoa kua maeke ia Iehova ke taute ki ai?
10 Manamanatu ke he mena nei: Kua nakai maeke he tagata ke taofi e mate, ha kua nakai fai tagata ‘ke laveaki e ia a ia mai he lima he tukuaga,’ ko Seoli, po ko Hate. (Sala. 89:48) Ka e kua mogoia a Iehova? Taha e matakainaga fifine ne hao he magaaho ne hoko e fakamatakutakuina Nasi, ne manatu e mena ne tala age he matua fifine Fakamoli haana he taha vahā ke fakamafana aki a ia ha ko e mamate e tau fakahele ke he tau kemuaga pagotā: “Ka tumau tukulagi e mamate he tau tagata, to mua atu kia e malolō ke he Atua, pihia nakai?” Mooli, ne nakai mua e mate ke he Punaaga malolō ue atu he moui! (Sala. 36:9) Ko lautolu oti i Seoli, po ko Hate, kua haia he manamanatuaga a Iehova, mo e to fakamoui e ia a lautolu takitokotaha.—Luka 20:37, 38; Fakakite. 20:11-14.
11 He magaaho nei, kua putoia fakahako a Iehova ke he tau momoui he tau tagata tapuaki tua fakamooli haana he vahā nei. Kia manamanatu la tautolu mogonei ke he tolu e puhala ko e ‘Fakamoui’ mooli a ia ma tautolu.
Puipui Fakaagaaga
12, 13. Ko e ha e puipuiaga fakaagaaga ne aoga lahi mahaki, ti foaki fēfē e Iehova e tau mena ia ma tautolu?
12 Ne foaki e Iehova ki a tautolu e puipuiaga fakaagaaga, ne kua mua atu e aoga lahi. Ko e tau Kerisiano mooli, kua maama e tautolu na fai mena kua mua atu e aoga lahi ke he moui ha tautolu mogonei. Ko e koloa uho ue atu ha tautolu ko e fakafetuiaga fakatagata mo Iehova. (Sala. 25:14; 63:3) He nakai fai fakafetuiaga pihia, to nakai aoga lahi e moui ha tautolu mogonei ti galo e tau amaamanakiaga ha tautolu ma e vahā anoiha.
13 Fakaaue ai, ne foaki e Iehova ki a tautolu oti e lagomatai kua lata ke fakatumau e fakafetuiaga tata mo ia. Ha ha ia tautolu haana a Kupu, agaaga tapu, mo e fakapotopotoaga he lalolagi katoa ke lagomatai a tautolu. Maeke fēfē a tautolu ke fakaaoga katoatoa e tau foakiaga nei? He fakaako tumau mo e fakamakutu e Kupu haana, to fakamalolō e tua ha tautolu mo e fakakikila ai e amaamanakiaga ha tautolu. (Roma 15:4) He liogi fakamooli ma e agaaga haana, to moua e tautolu e lagomatai ke totoko e kamatamata neke taute e mahani nakai faka-Atua. (Luka 11:13) He fakatatau tumau ke he takitakiaga he vahega fekafekau ne puhala mai he tau tohi ne fakavē ke he Tohi Tapu ti pihia ke he tau feleveiaaga, tau toloaga, mo e tau fonoaga, to tupu olaola fakaagaaga a tautolu ke he “tau mena kai ke he tau magaaho [tonu].” (Mata. 24:45) Kua puipui fakaagaaga he tau foakiaga pihia a tautolu mo e lagomatai a tautolu ke nonofo fakatata atu ke he Atua.—Iako. 4:8.
14. Talahau e mena ne tupu kua fakamaama e puipuiaga fakaagaaga.
14 Ke fakamaama e puipuiaga fakaagaaga pihia, manatu e tau matua ne totoku he kamataaga he vala tala fakamua. Fai aho gahoa he mole e hokotaki kua galo ha laua a tama fifine, ko Theresa, ne logona e laua e ogo matematekelea: Kua kelipopo tuai a ia.a Ne manatu he matua taane: “Ne liogi au ki a Iehova ke puipui a ia. He moua a ia kua kelipopo tuai, tala atu e au ko e mena fakamua ne manatu au ki ai kua ha ne nakai tali haaku tau liogi. Mooli, iloa e au kua nakai mavehe mai e Iehova e puipuiaga fakamana ma e tau tagata takitokotaha haana. Ne matutaki au ke liogi ma e maamaaga. Ne mafanatia au he iloa kua puipui fakaagaaga e Iehova e tau tagata haana—kakano, kua foaki e ia e tau mena kua lata mo tautolu ke puipui aki e fakafetuiaga ha tautolu mo ia. Ko e vahega puipuiaga pihia kua mua atu e aoga, ha kua maeke ke lauia ha tautolu a vahā tukulagi anoiha. Ke he mena ia, ne puipui mooli e Iehova a Theresa; kua fekafekau tua fakamooli a ia ke hoko ke he mate haana. Ne moua e au e mafola he iloa ko e tau amaamanakiaga he moui ma e vahā anoiha haana kua toka ke he tau lima fakahele Haana.”
Faihoani he Magaaho ne Gagao
15. Ko e heigoa e tau puhala kua liga lagomatai e Iehova a tautolu ka lauia a tautolu he gagao?
15 Kua faihoani foki e Iehova a tautolu ‘ka takoto he gagao,’ tuga ne taute e ia ki a Tavita. (Sala. 41:3) Pete he nakai fakamoui e Iehova a tautolu he vahā nei ke he puhala fakamana, kua lagomatai mooli e ia a tautolu. Fēfē? Ko e tau matapatu fakaakoaga ne moua he Kupu haana kua liga lagomatai a tautolu ke taute e tau fifiliaga kua pulotu hagaao ke he tuluiaga mo e falu matakupu foki. (Fakatai 2:6) Liga maeke ia tautolu ke moua e tau manatu lagomatai mo e aoga mai he tau vala tala ne taute fakailoa he Ko e Kolo Toko mo e Awake! ne fakatutala hagaao ke he lekua pauaki he malolō tino ha tautolu. Puhala he agaaga a Iehova, ne liga foaki e ia ki a tautolu “e lahi ue atu he malolo” ke kautū ke he tuaga ha tautolu mo e fakatumau a tautolu ke fakamooli, pete ne mena ka tupu. (2 Kori. 4:7) Ke he lagomatai pihia, kua maeke ia tautolu ke kalo mai he molea e tupetupe ke he gagao, ne kua fakagalo e onoonoaga fakaagaaga ha tautolu.
16. Maeke fēfē taha matakainaga taane ke kautū mai he gagao?
16 Manamanatu la ke he matakainaga taane fuata ne hagaao ki ai he kamataaga he vala tala fakamua. He 1998, ne moua a ia he gagao amyotrophic lateral sclerosis, po ke ALS, ne fakahiku ke mate katoatoa e tino haana.b Maeke fēfē a ia ke fahia mai he gagao haana? Ne fakamaama e ia: “Falu magaaho haaku kua mamahi mo e hogohogo manava ka logona e au ko e mate ne puhala ke fakatotoka aki au. He magaaho ka logona e au kua molea e tupetupe, ne liogi au ki a Iehova ke foaki ki a au tolu e mena:ko e loto totoka, fakauka, mo e fakamanava lahi. Ne logona e au kua tali e Iehova e tau liogi ia. Ne taute he loto totoka au ke fakaata e tau manatu mafanatia, tuga e onoono atu ke he lalolagi foou ka maeke ia au ke liu fanofano, fiafia ha ko e tau mena kai lolo, mo e liu tutala ke he magafaoa haaku. Kua lagomatai he mahani fakauka au ke fakatumau ke he tau mena ne nakai tokotoko mitaki mo e tau paleko he mate e tino. Kua maeke he mahani fakauka ke fakatumau au ke tua fakamooli mo e nakai galo e lagotatai fakaagaaga haaku. Maeke mooli ia au ke tatai mo e salamo ko Tavita, ha kua logona e au a Iehova ne faihoani au he takoto he gagao.”—Isaia 35:5, 6.
Moua e Tau Leveki Fakatino
17. Ko e heigoa ne mavehe e Iehova ke taute ma tautolu, ti ko e heigoa e kakano he maveheaga nei?
17 Ne mavehe e Iehova to leveki e ia a tautolu ke he tau puhala fakatino. (Totou Mataio 6:33, 34 mo e Heperu 13:5, 6.) Nakai kakano e mena ia to moua noa e tautolu e tau koloa fakatino po ke nakai manako a tautolu ke gahua. (2 Tesa. 3:10) Ko e kakano mooli he maveheaga ia anei: Ka kumi fakamua e tautolu e Kautu he Atua he tau momoui ha tautolu mo e makai ke gahua ke leveki aki e moui, maeke ia tautolu ke falanaki ki a Iehova ke lagomatai a tautolu ke moua e tau mena ke lata mo e moui. (1 Tesa. 4:11, 12; 1 Timo. 5:8) Maeke a ia ke foaki e tau mena ne manako a tautolu ke he puhala ne nakai amanaki ki ai, liga puhala mai he matakainaga tapuaki ne lagomatai ki a tautolu po ke he foaki e gahua tupe ma tautolu.
18. Talahau e mena ne tupu ke fakakite to liga foaki mai ki a tautolu e tau mena kua lata he magaaho ka manako lagomatai.
18 Manatu e matua fifine nofo tokotaha ne totoku he kamataaga he vala tala fakamua. He magaaho ne hiki atu a ia mo e tama fifine tote haana ke he matakavi foou, ne uka lahi a ia ke moua e gahua. Ne fakamaama e ia: “Ne fano au ke he gahua he fonua he mogo pogipogi, ti fakaaoga e au e tau magaaho afiafi oti ke kumi gahua. Manatu e au he taha aho ne fano au ke he fale koloa mena kai ke fakatau e huhu. Ne tū au mo e onoono ke he tau lakau kai, ka e nakai lahi e tupe haaku ke fakatau aki. Ne nakai la logona ia e au e tupetupe lahi he moui haaku. He liu mai au ki kaina he fale koloa he aho ia, ne puke e kaupā he faahi tua haaku he tau kato he tau lakau kai kehekehe. Kua lahi e kai mogoia ke kai a maua ke he falu a mahina. Ne tagi au, mo e fakaaue ki a Iehova.” Ne nakai leva ti iloa he matakainaga fifine nei ko e tau kato ia nukua toka he matakainaga taane he fakapotopotoaga ne tō e tau lakau kai he katene haana. Ne tohi a ia ke he matakainaga taane he magaaho fakamui: “Pete ne fakaaue lahi mahaki au he aho ia ki a koe, ne fakaaue foki au ki a Iehova he fakaaoga e mahani totonu haau ke fakamanatu ki a au e fakaalofa Haana.”—Fakatai 19:17.
19. Ka hoko ke he matematekelea lahi, ko e heigoa he tau fekafekau ha Iehova ka mauokafua ai, ti ko e heigoa kua lata ke eketaha a tautolu ke taute mogonei?
19 Mooli, ko e mena ne taute e Iehova he tau vahā Tohi Tapu ti pihia mo e vahā ha tautolu, kua foaki ki a tautolu e kakano ke falanaki ki a Ia ko e Lagomatai ha tautolu. Nakai leva, ka hoko mai e matematekelea lahi ke he lalolagi a Satani, to lata a tautolu ke moua e lagomatai a Iehova ne nakai la pihia fakamua. Ka e to maeke e tau fekafekau a Iehova ke ono atu ki a Ia mo e mauokafua katoatoa. To maeke a lautolu ke hahaga hake mo e fiafia, he iloa kua tata mai e laveakiaga. (Luka 21:28) He magaaho nei, pete ne tau kamatamata ne liga fehagai mo tautolu, kia eketaha a tautolu ke falanaki atu ki a Iehova, he mauokafua katoatoa ko e Atua nakai hikihikifano ha tautolu ko e ‘Fakamoui’ mooli ha tautolu.
[Tau Matahui Tala]
a Kitekite ke he vala tala “Kautū Mai he Matematekelea Lahi Mahaki,” he Awake! ia Iulai 22, 2001, lau 19-23.
b Kitekite e vala tala “Fakatumau ha ko e Tua Haaku—Moua he Gagao ALS,” he Awake! ia Ianuari 2006, lau 25-29.
Manatu Nakai e Koe?
• Maeke fēfē ia Iehova ke fakahao a lautolu ne mamate tuai?
• Ko e ha e puipuiaga fakaagaaga kua aoga lahi mahaki?
• Ko e heigoa e kakano he maveheaga a Iehova ke leveki fakatino a tautolu?
[Fakatino he lau 8]
He tapaki he 1918, ne fakatoka mai e Matakainaga Rutherford mo e tau ekegahua haana he magaaho fakamui, ti magalo noa ai e fakahala
[Fakatino he lau 10]
Maeke ia Iehova ke faihoani a tautolu ‘ka takoto he gagao’