Kumi e Tala Mooli Hagaao ke he Lagi

KO E fulufuluola ha ia he logona e amaamanakiaga ke ō ke he lagi! Ko e amaamanakiaga he moui ka mole e mate kua kehekehe e tau manatu ha ko e tau Musilimi, tau Hinitū, tau Puta, mo e tau tagata he tau lotu Kerisitenitome, mo e tokologa foki ia lautolu ne nakai fiafia ke he lotu. Ko e lagi kua fa manatu ki ai ko e matakavi fulufuluola mo e fiafia ka moua he tau tagata e totokaaga mai he matematekelea ti liu ai feleveia mo e “tau fakahele ne mamate.” Ke he laulahi he tau tagata, kua mooli e talahauaga tuai nei: Kua manako e tau tagata oti ke ō ke he lagi, ka e nakai fai tagata ne manako ke mate ke hoko atu ki ai. Ko e ha ne pihia ai?

Kaeke kua tufuga a tautolu ke mamate ti ō ke he lagi, nakai kia amaamanaki lahi atu ki ai e tau tagata tokologa ke tuga e tama ne amaamanaki lahi ke tupu hake po ke tama fuata ne amaamanaki lahi ke mau? Ka e laulahi he tau tagata ne nakai manako ke mamate.

Pete he pihia, ne talahau he tau akoako ka mole e moui kū ha tautolu he lalolagi, ko e finagalo pauaki ma tautolu ke momoui ke he lagi. Ma e fakatai, ko e Pope ko Theodore Edgar McCarrick, ko e pisopo ne mua kua tuku e gahua i Washington, D.C., ne fatiaki he pehē: “Nakai taute a tautolu ke lata mo e moui nei. Na taute a tautolu ke lata mo e moui he lagi.” Pihia foki, ko e pelesiteni fakamua he U.S. National Association of Evangelicals, ne fatiaki he pehē: “Ko e kakano he moui ke fakaheke e Atua mo e ō ke he lagi . . . ha ko e lagi ko e kaina ha tautolu.”

Ko lautolu ne talitonu ka mole e mate to momoui a lautolu ke he lagi kua fa fakavē e tua ha lautolu ke he tau vala tala temotemoai. Ko George Barna, ko e pelesiteni he kamupanī ne kumikumi ke he tau manatu fakalotu, ne moua kua tokologa e tagata ne “onoono ke he moui mo e moui ka mole e mate ne fakavē ke he tau manatu he tau punaaga kehekehe, tuga e tau kifaga, tau leo kofe mo e tau pepa.” Ko e akoako Epikopo i Florida ne fatiaki he pehē: “Nakai iloa e mautolu ha mena hagaao ke he lagi, ka ko e lagi hokoia ko e nofoaga he Atua.”

Ko e lagi ko e matakupu aoga lahi ne fakatutala he Tohi Tapu. Hagaao ke he Kupu he Atua, fēfē e lagi? Tufuga kia e tagata ke moui he lagi? Ka ō e tau tagata ke he lagi, ko e heigoa ha lautolu ka taute i ai?

[Blurb he lau 3]

Ko e ha ne manako e tokologa ke ō ke he lagi, ka e tokofiha ne manako ke mamate ke hoko atu ki ai?