Fakalataha Katoa ke he Heleheleaga Fakaagaaga Lahi
“Kia fakamakai nakai noa ke he gahua he Iki.”—1 KORI. 15:58.
1. Ko e heigoa e uiina ne tuku age e Iesu ke he tau tutaki haana?
HE FENOGA he faahimotu ha Samaria he matahiku he 30 V.N., ne nofo a Iesu ke okioki he vaikeli ne tata ke he taone i Sikara. Ne tala age a ia i ai ke he tau tutaki haana: “Haga hake a ha mutolu a tau mata, mo e kitekite ke he fonua kua hina mai nai ke he heleheleaga saito.” (Ioane 4:35) Ne nakai hagaao a Iesu ke he helehele saito mooli, ka ko e fakapotopoto fakaagaaga he tau tagata loto mooli ke eke mo tau tutaki haana. Ko e tau kupu haana kua uiina ke fai mena ka taute. Kua lahi mahaki e gahua ke taute ka e tote ni e magaaho ke taute ai!
2, 3. (a) Ko e heigoa ne fakakite kua nonofo a tautolu he magaaho helehele? (e) Ko e heigoa ka fakatutala e vala tala nei ki ai?
2 Ko e tau kupu ha Iesu hagaao ke he heleheleaga kua fai kakano uho ki a tautolu he vahā nei. Kua nonofo a tautolu he magahala he lalolagi nukua ‘hina ma e heleheleaga’ ke he fonua he tau tagata. He tau tau takitaha, kua moua he tau miliona tagata e uiina he tau kupu mooli ne foaki e moui, ti tokoafe e tutaki foou kua papatiso. Ko e kotofaaga ha tautolu ke fakalataha ke he heleheleaga lahi mahaki nei i lalo he takitakiaga he Iki he heleheleaga, ko Iehova ko e Atua. Kua lahi nakai e “fakamakai nakai noa” haau ke he gahua helehele nei?—1 Kori. 15:58.
3 He tolu mo e hafa e tau he fekafekauaga ha Iesu he lalolagi, ne fakaako e ia e tau tutaki haana ma e ha lautolu a gahua ko e tau tagata helehele. To fakatutala e vala tala nei ke he tolu e fakaakoaga aoga he tau fakaakoaga loga ha Iesu ke he tau tutaki haana. Igatia e fakaakoaga mo e fakamaama e mahani ne uho lahi ki a tautolu he eketaha a tautolu ke taute katoa e fakapotopoto mai he tau tutaki he vahā foou nei. Kia fakatutala a tautolu ke he tau mahani nei takitaha he magaaho.
Aoga Lahi e Mahani Fakatokolalo
4. Fakamaama fēfē e Iesu e aoga he mahani fakatokolalo?
4 Manamanatu ke he mena ne tupu: Kua oti laia e taufetoko he tau tutaki ko hai ne mua. Ko e tau logonaaga he nakai falanaki ki ai mo e fakafualoto kua liga kitia agaia ke he tau fofoga ha lautolu. Ti hea e Iesu e tama tote ke tū ki mua ha lautolu. He hagaaki ke he tama tote, ne pehē a ia: “Ko ia ke fakatokolalo e ia a ia ke tuga e tama tote nai, to mua a ia ia lautolu ha ha he kautu he lagi.” (Totou Mataio 18:1-4.) He nakai manamanatu tuga e lalolagi ne fakavē e tagata ke he malolō, mautū, mo e tuaga haana, ne lata e tau tutaki ke maama ko e mua ha lautolu kua falanaki ke ‘fakatokolalo ne lautolu a lautolu’ ki mua he falu. To fakamonuina e Iehova a lautolu mo e fakaaoga ni a lautolu ka fakakite e lautolu e mahani fakatokolalo mooli.
5, 6. Ko e ha kua lata ia koe ke fakatokolalo ke maeke ke fakalataha katoa ke he gahua helehele? Fakamaama.
5 Ke he vahā nei, tokologa he lalolagi ne tukulele e tau momoui ha lautolu ke tutuli e malolō, mautū, mo e tuaga. Ko e fua, kua tote po ke nakai fai magaaho a lautolu ma e tau mena fakaagaaga. (Mata. 13:22) Kehe mai ai, kua fiafia e tau tagata ha Iehova ke ‘fakatokolalo ne lautolu a lautolu’ ki mua he falu ke moua e monuina mo e taliaaga he Iki he heleheleaga.—Mata. 6:24; 2 Kori. 11:7; Filipi 3:8.
6 Kikite e fakafifitakiaga ha Francisco, ne fekafekau ko e motua i Amerika Toga. He vahā fuata, ne tiaki e ia e univesitī ke eke mo paionia. “He toka mama au he magaaho fakamui ke fai hoana,” he liu manatu e ia, “kua maeke ia au ke moua e gahua ka tamai ke he hoana haaku mo au e haohao fakatupe mitaki lahi. Ka e fifili a maua ke fakamukamuka e tau momoui ha maua mo e matutaki tokoua ke he fekafekauaga mau. Ne fanafanau ai fakamui mo e holo ki mua e tau paleko. Ka e lagomatai e Iehova a maua ke pipiki ke he fifiliaga ha maua.” Ne fakahiku e Francisco: “Kua molea e 30 e tau ne olioli e au e kotofaaga ke fekafekau ko e motua, he lafi ke he loga he tau kotofaaga uho. Nakai lagataha e tokihala ha maua ha ko e fakamukamuka he puhala moui.”
7. Lali fēfē a koe ke fakagahua e fakatonuaga ne moua ia Roma 12:16?
7 Ka pehē a koe nakai ke he “tau mena fakatokoluga” he lalolagi nei ti fakaatā e koe a koe ke ‘feoaki ke he tau mena fakatokolalo,’ kua maeke foki ia koe ke amanaki ke olioli e tau monuina mo e tau kotofaaga loga ke he gahua helehele.—Roma 12:16; Mata. 4:19, 20; Luka 18:28-30.
Tamai he Fakamakai e Tau Palepale
8, 9. (a) Fakatōtō mai e fakataiaga ha Iesu ke he tau taleni. (e) Mua atu ki a hai e fakamafanatia he fakataiaga nei ki ai?
8 Taha he tau mahani kua lata ia tautolu ke moua ke fakalataha katoa ke he gahua helehele ko e fakamakai. Ne fakamaama e Iesu e mena nei he fakataiaga haana ke he tau taleni.a Ko e fakataiaga ia kua hagaao ke he tagata, ato fano fenoga ke he taha motu, ne tuku age e tau koloa haana ke he tolu e fekafekau. Ne moua he fekafekau fakamua mo e uaaki, lima mo e ua e taleni ka ko e fekafekau ke toluaki, taha e taleni. He mole atu e iki ha lautolu, ko e tau fekafekau tokoua fakamua ne fakamakai mo e fakamafiti ke “fakafua” e tau taleni ha laua. Ka ko e fekafekau ke toluaki ne “teva.” Ne tanu e ia e taleni haana ke he kelekele. He liu mai, ne palepale he tagata e tau fekafekau tokoua fakamua he kotofa ki a laua e “tau mena loga.” Ne uta e ia e taleni ne age ke he fekafekau ke toluaki mo e vega e fekafekau ia mai he kaina haana.—Mata. 25:14-30.
9 Nakai fakauaua ko e manako haau ke fifitaki e tau fekafekau fakamakai he fakataiaga ha Iesu mo e fakalataha katoa ka maeke ke he gahua taute tutaki. Ka e kua ka nakai fakaatā katoatoa he tau tuaga haau mogonei e tau mena ka taute e koe? Liga kua fakaohooho he tau tuaga uka fakatupe a koe ke gahua loa ke leveki aki e magafaoa haau. Po ke liga nakai olioli e koe e hakahakau he vahā fuata mo e malolō tino mitaki. Kaeke kua pihia, ko e fakataiaga he tau taleni kua ha ha ai e fekau mafanatia ma haau.
10. Fakakite fēfē he iki he fakataiaga he tau taleni e mahani fakalatalata, ti ko e ha kua mafanatia a koe ke he mena nei?
10 Mailoga kua iloa he iki he fakataiaga e kehekehe he tau malolō he tau fekafekau takitaha haana. Ne fakakite e ia e mena nei he magaaho ne kotofa e ia e tau taleni “fakalata ke he malolo ha lautolu takitokotaha.” (Mata. 25:15) Tuga ne amanaki, ko e fekafekau fakamua ne lahi mahaki e mena ne moua ke he fekafekau ke uaaki. Pete ia, ne mailoga he iki e tau laliaga fakamakai he tau fekafekau tokoua nei he tala age ko e tau fekafekau ‘mitaki mo e fakamoli’ mo e tatai e tau palepale ne age ki a laua. (Mata. 25:21, 23) Pihia foki, ko e Iki he heleheleaga, ko Iehova ko e Atua, kua iloa na lauia he tau tuaga haau e mena kua maeke ia koe ke taute he fekafekauaga haana. To nakai kaumahala a ia ke mailoga e tau laliaga loto katoa haau ke fekafekau ki a ia mo e palepale a koe fakatatau ki ai.—Mare. 14:3-9; totou Luka 21:1-4.
11. Fakamaama kua maeke fēfē he fakamakai he tau tuaga kamatamata ke fua mai e tau monuina loga.
11 Ko e fakafifitakiaga ha Selmira, ko e matakainaga fifine Kerisiano ne nofo i Parasili, ne fakakite ko e fakamakai he fekafekauaga he Atua kua nakai fakavē ke he tau tuaga mitaki he moui. Ne uafulu e tau he mole e mate he taane ha Selmira he fana he tau tagata kaihā, ti toka hifo e tau tama ikiiki tokotolu ke feaki e ia. Ko e gahua fekafekau haana ne putoia e gahua loa mo e mategūgū he heke he peleōafi he taone ne puke he tau tagata. Pete ne tau mena uka nei, ne fakatokatoka e ia e tau matagahua haana ke eke a ia mo paionia tumau. Tokoua mai he tau tama tokotolu haana ne fakalataha mo ia he gahua paionia. “He tau tau loga kua mole, ne fakaako e au e Tohi Tapu mo e molea e toko 20 e tagata, ti eke a lautolu mo tau tagata he ‘magafaoa’ haaku,” he talahau e ia. “Hoko ke he aho nei, kua olioli e au e fakaalofa mo e fakakapitiga ha lautolu. Ko e koloa uho ne nakai maeke he tupe ke fakatau.” Kua palepale mooli he Iki he heleheleaga e tau laliaga fakamakai ha Selmira!
12. Fakakite fēfē e tautolu e fakamakai ke he gahua fakamatala?
12 Kaeke ko e tau tuaga he mogonei he moui kua fakakaupā e magaaho kua ha ha ia koe ke fakaaoga he gahua he fonua, maeke agaia ia koe ke lali ke fakalahi e gahua helehele he taute haau a gahua he fonua ke fua mitaki. Ka fakagahua fakamitaki e koe e tau manatu lagomatai aoga he Feleveiaaga Fekafekau he faahitapu, to fakamatila e koe e tau puhala fakamatala haau mo e kumi e tau puhala foou ke fakamatala. (2 Timo. 2:15) Ka lata foki, maeke ia koe ke liu fakatoka po ke fakamamutu e tau matagahua nakai aoga ke maeke ia koe ke lalago tumau e tau fakaholoaga he gahua he fonua he fakapotopotoaga.—Kolo. 4:5.
13. Ko e heigoa e kei ke he feaki mo e fakatumau he fakamakai?
13 Kia tokaloto na puna mai e fakamakai he loto fakaaue. (Sala. 40:8) Ko e fekafekau ke toluaki he fakataiaga ha Iesu kua matakutaku he iki haana, he onoono ki a ia ko e tagata pule lahi mo e nakai fakalatalata. Ko e fua, ne tanu he fekafekau e taleni haana ka e nakai fakaaoga ai ke fakalahi aki e tau koloa he iki haana. Ke kalo mai he aga fakateaga pihia, lata ia tautolu ke feaki mo e fakatumau e fakafetuiaga mafanatia mo e Iki he heleheleaga, ko Iehova. Tuku kehe e magaaho ke fakaako mo e manamanatu fakahokulo ke he haana a tau mahani fulufuluola—haana fakaalofa, fakauka, mo e fakaalofa noa. He puhala ia, to omoomoi he loto haau a koe ke taute katoa e tau mena kua maeke ia koe he fekafekauaga haana.—Luka 6:45; Filipi 1:9-11.
“Kia Tapu a Mutolu”
14. Ko e heigoa e poakiaga aoga lahi ne lata ke fakatatau ki ai a lautolu kua manako ke eke mo tau tagata helehele?
14 He fatiaki mai he tau Tohiaga Tapu Heperu, ne talahau he aposetolo ko Peteru e finagalo he Atua ma e tau fekafekau Haana he lalolagi, he pehē: “Tuga ne tapu a ia kua ui kia mutolu, kia pihia foki a mutolu ke tapu ke he tau mahani oti ha mutolu; ha kua tohi Kia tapu a mutolu, ha ko au nai kua tapu ni au.” (1 Pete. 1:15, 16; Levi. 19:2; Teu. 18:13) Ne fakamaama he talahauaga nei kua lata e tau tagata gahua helehele ke meā e tau mahani mo e tau tuaga fakaagaaga. Maeke ia tautolu ke fakatatau mo e poakiaga aoga lahi ia he taute e tau lakaaga ke fakameā fakatai. Taute fēfē e mena ia? He lagomatai he kupu mooli he Atua.
15. Ko e malolō he kupu mooli he Atua kua taute e heigoa ma tautolu?
15 Ko e kupu mooli he Atua kua tuga e vai ke fakameā. Tuga anei, ne tohi he aposetolo ko Paulo ko e fakapotopotoaga he tau Kerisiano fakauku kua meā ki mua he Atua, tuga e kitofaitaane meā ma Keriso, ne fakameā ai he “koukouaga he vai, katoa mo e kupu . . . tapu mo e nakai fai mena kelea.” (Efeso 5:25-27) Fakamua atu, ne vagahau foki a Iesu ke he malolō fakameā he kupu he Atua ne talahau e ia. He vagahau ke he tau tutaki haana, ne pehē a Iesu: “Kua oti foki he fakamea a mutolu ke he kupu ne talahau atu ai e au kia mutolu.” (Ioane 15:3) Ti ha ha he kupu he Atua e malolō ke fakameā e tau mahani mo e tau tuaga fakaagaaga. Ka fakaatā ni e tautolu e kupu mooli he Atua ke fakameā a tautolu ke he puhala nei to talia e ia ha tautolu a tapuakiaga ki a ia.
16. Maeke fēfē a tautolu ke fakatumau e meā fakaagaaga mo e mahani mitaki?
16 Ti, ke eke mo tau tagata gahua he heleheleaga he Atua, fakamua kua tiaki katoatoa e tautolu e tau mahani nakai meā mo e tau gahua kelea fakaagaaga oti he tau momoui ha tautolu. E, ke fakatumau ke lata mo e kotofaaga nei ko e tagata gahua helehele, kua lata ia tautolu ke fakafifitaki mitaki he taofi mau e tau mahani mo e tau tuaga fakaagaaga tokoluga ha Iehova. (Totou 1 Peteru 1:14-16.) Tuga he leveki tumau e tautolu e meā fakatino ha tautolu, ti kua lata ia tautolu ke omaoma tumau ke he fakaohoohoaga fakameā he kupu mooli he Atua. Putoia ke he mena nei e totou he Tohi Tapu mo e ō he tau feleveiaaga Kerisiano. Kua kakano foki ke taute e tau laliaga mooli ke fakagahua e tau fakamanatuaga he Atua ke he tau momoui ha tautolu. He taute pihia ka lagomatai a tautolu ke totoko ke he tau fatuakiloto agahala ni ha tautolu mo e totoko e tau fakaohoohoaga kelea muikau he lalolagi nei. (Sala. 119:9; Iako. 1:21-25) E, kua mafanatia mooli ke iloa he lagomatai he kupu mooli he Atua to maeke ia tautolu ke “koukou” mai foki he tau agahala kelea lahi mahaki!—1 Kori. 6:9-11.
17. Ke maeke ke fakatumau e meā, ko e fakatonuaga fe he Tohi Tapu kua lata ia tautolu ke muitua ki ai?
17 Kua talia nakai e koe e fakaohoohoaga fakameā he kupu mooli he Atua he moui haau? Ma e fakatai, tali atu fēfē a koe ka hataki a koe ke he tau hagahaga kelea he tau fiafiaaga fakalialia he lalolagi nei? (Sala. 101:3) Kalo kehe nakai a koe mai he tau lafiaga nakai lata he tau kapitiga he aoga mo e tau tagata gahua ne nakai fakalataha ke he tau taofiaga haau? (1 Kori. 15:33) Kua fakamooli nakai e tau laliaga haau ke kautū ke he tau lolelole fakatagata ka taute a koe ke nakai meā ke he fofoga ha Iehova? (Kolo. 3:5) Kua vevehe kehe tumau nakai a koe mai he tau taufetoko fakapolitika he lalolagi nei mo e aga papale fakamotu ne hufia ke he loga he tau sipote fetoko?—Iako. 4:4.
18. To lagomatai fēfē he meā e tau mahani mo e tau tuaga fakaagaaga a tautolu ke eke mo tau tagata gahua helehele fua mitaki?
18 Ko e muitua fakamooli haau ke he tau fakatonuaga pihia ka tamai e tau fua mitaki lahi mahaki. He fakatatai e tau tutaki fakauku haana ke he tau lā he vine, ne pehē a Iesu: “Ko e tau la oti ni ha ia au, nakai fua, kua uta kehe [he Matua haaku]; ka ko e tau la oti kua fua, kua [“fakameā,” NW] e ia, kia au atu ai he fua.” (Ioane 15:2) He fakaaoga e koe e vai fakameā he kupu mooli he Tohi Tapu, to au atu a koe he fua loga.
Tau Monuina Mogonei mo e Vahā Anoiha
19. Fakamonuina fēfē e tau tutaki ha Iesu ha ko e tau laliaga ha lautolu ke eke mo tau tagata gahua helehele?
19 Ko e tau tutaki tua fakamooli ne talia e fakaakoaga ha Iesu ne fakahiku ke fakamalolō he agaaga tapu ke he Penetekoso 33 V.N. ke eke mo tau fakamooli “ke hoko ni ke he fakaotiaga he lalolagi.” (Gahua 1:8) Ne matutaki atu a lautolu ke eke mo tau tagata he kau fakatufono, tau misionare, mo e tau motua faifano, ti taute e lautolu e matagahua lahi he fakamatala e tala mitaki “ke he tau tagata oti ke he lalolagi.” (Kolo. 1:23) Ko e tau monuina mooli ne helehele e lautolu, mo e fiafia mooli ne tamai e lautolu ke he falu!
20. (a) Ko e heigoa e tau monuina kua moua e koe mai he fakalataha katoa ke he heleheleaga fakaagaaga? (e) Ko e heigoa e fifiliaga haau ka taute?
20 E, he fakakite e mahani fakatokolalo, fakakite e fakamakai, mo e taofi mau e tau tuaga tokoluga he Kupu he Atua, to fakatumau a tautolu ke olioli e fakalataha katoa mo e fai kakano he heleheleaga fakaagaaga lahi hane taute mogonei. He matematekelea e tokologa ke he mamahi mo e fakahogohogo manava ne putoia ai e velevelekoloa he lalolagi nei mo e puhala moui tutuli fakafiafia, kua moua e tautolu e fiafia mo e makona mooli. (Sala. 126:6) Mua atu e aoga, kua “nakai noa mo e fua ha [ta]utolu a fakafita ke he gahua he Iki.” (1 Kori. 15:58) Ko e Iki he heleheleaga, ko Iehova ko e Atua, to palepale mitaki a tautolu tukulagi ma e ‘ha tautolu a tau gahua mo e fakaalofa kua fakakite e tautolu ke he hana higoa.’—Hepe. 6:10-12.
[Matahui Tala]
a Ko e fakataiaga ke he tau taleni kua matapatu ke he puhala ne fehagai a Iesu mo e tau tutaki fakauku haana, ka kua ha ha ai e tau matapatu fakaakoaga ne lata mo e tau Kerisiano oti.
Manatu Nakai e Koe?
He eketaha a koe ke fakalataha katoa ke he gahua helehele . . .
• ko e ha kua aoga lahi ke fakakite e mahani fakatokolalo?
• maeke fēfē ia koe ke feaki mo e fakatumau ke fakamakai?
• ko e ha kua aoga ke fakatumau ke he tau mahani meā mo e tuaga fakaagaaga?
[Fakatino he lau 17]
Lagomatai he fakatokolalo a tautolu ke moua e moui mukamuka ne matapatu ke he tau mena he Kautu