Ko e Heigoa he Tama Haau Ka Talahau?

TAU MATUA: He fufuta ia Ianuari 15, 2010, lau 16-20, ne talahau e mautolu kua lata e tau magaaho fakamahani mo e tau fanau haau. Kua foaki he vala tala nei e tau manatu ke lagomatai a koe ke tauteute e tama tote haau ke feleveia mo e tau paleko he aoga. Liga manako a koe ke taute e tau magaaho nei he haau a afiafi he Tapuakiaga Magafaoa.

KO E tau fanau ne Tau Fakamoli a Iehova kua fehagai mo e tau paleko loga. Fa mahani e tau kapitiga aoga ke hūhū e kakano ne nakai fai vala a lautolu he falu matagahua, tuga e saluti e matini, tau fakamanatuaga tūtau, mo e tau matafeua magaaho okioki. Ka fehagai e tama taane po ke tama fifine haau ke he tau hūhū pihia, to fēfē e tali he tama haau?

Kua pehē ai e falu fanau Kerisiano: “Ai maeke au ke taute e mena ia. Na ai fakaatā he lotu haaku e mena ia.” Kua lata ke nava ke he tau fanau ia ha kua tumauokafua. Ko e tali ha lautolu kua liga fakanonono aki e tau hūhū loga. Ka e, tomatoma he Tohi Tapu ki a tautolu ke ‘mautali ke tali atu mo e mahani molu mo e matakutaku kia lautolu oti kua hūhu mai kia tautolu’ ma e tau taofiaga ha tautolu. (1 Pete. 3:15) Ko e taute pihia he nakai ni talahau, “Ai maeke au ke taute e mena ia.” Pete he nakai talia he falu a tautolu, liga loto fakaaue e falu he iloa kua fai kakano a tautolu ma e tau fifiliaga ha tautolu.

Tokologa e fuata Fakamoli ne talahau e tau tala Tohi Tapu ke he tau kapitiga aoga ha lautolu he fakaaoga e tau tohi tuga e Learn From the Great Teacher. Maeke he tau tala nei ke lagomatai ke fakamaama e kakano ne taute po ke nakai taute he tau fanau Fakamoli e falu a mena. Fanogonogo fakamitaki falu tama aoga ke he tau tala Tohi Tapu, ti loga e fakaako Tohi Tapu kua kamata ke he puhala nei. Ko e falu tama aoga ne liga uka ke fanogonogo ke he tala katoa he Tohi Tapu. He nakai fai fakamaama katoa, liga uka lahi e falu tala Tohi Tapu ma e tau tama aoga ke maama. He uiina he kapitiga fifine a ia ke he fiafia tūtau haana, ne tala age a Minhee ne 11 e tau he moui ke he kapitiga haana: “Nakai talahau he Tohi Tapu ki a tautolu ke fakamanatu e tau aho tūtau. Ko e tagata he Tohi Tapu, ko Ioane ko e Papatiso, ne tamate he aho tūtau.” Ka e manatu e Minhee, tuga kua nakai maama he kapitiga haana e tali haana.

Falu mogo, kua mitaki ke fakakite ke he taha tama aoga e fakatino po ke tala he taha he tau tohi ha tautolu. Ka e kua ka pehē e tau pule aoga kua nakai manako a lautolu ke fakakite he tau tama e tau pepa Tohi Tapu ke he falu tama aoga? Maeke nakai e tau fanau ha tautolu ke fakamatala fakamitaki pete he nakai fai tohi? Maeke fēfē a koe ke lagomatai e fanau haau ke fai tali atu?

Taute e Tau Magaaho Fakamahani

Kua lagomatai lahi he fai magaaho fakamahani i kaina, he taute he tau matua e vala he tau kapitiga aoga. He lali e tau tama ke fai tali atu hagaao ke he tua ha lautolu, to manako e tau matua ke nava ke he tau laliaga ha lautolu mo e fakakite ki a lautolu e puhala ka holo ki mua e fakakakanoaga ha lautolu mo e kakano kua mitaki e mena ia. Ma e fakatai, tala age ke fakaaoga e tau kupu ka maama he tau tama aoga ne atu taha. Ko Joshua, ko e tama taane ne hiva e tau, kua talahau ko e tau kapitiga aoga haana ne nakai maama e tau kupu tuga e “loto manamanatu” mo e “mahani fakamooli.” Ti fakaaoga e ia e tau kupu mukamuka lahi ke fakamaama e kakano ki a lautolu.—1 Kori. 14:9.

Falu tama aoga ne hūhū kua liga galo e fiafia, ka tala age e tali loagitu. He putoia a lautolu ke he fakatutalaaga mo e fakamaama e kakano ki a lautolu, maeke he tau fuata Fakamoli ke fakatumau e fiafia. Ko Haneul, ko e tama fifine ne hogofulu e tau, ne pehē, “Loto e tau kapitiga aoga haaku ke tutala ka e nakai fai fakamaamaaga.” Ke fakatutala, tala age e tau hūhū, ti fanogonogo fakamitaki ke he tau manatu fakatagata ne talahau.

Fakakite he tau fakatutala i lalo e puhala ka fakamaama he tau fanau Kerisiano ke he tau kapitiga aoga ha lautolu. Nakai lata ke ako manatu e tau fakatutalaaga nei—nakai tatai e fanau tokoua, ti ko e tau tuaga kehekehe ne lata ai mo e tau tali kehekehe. Ko e mena ia, ko e tama Fakamoli kua lata ke tokaloto e manatu, ti tuku ai ke he tau kupu ni haana, mo e talahau ai ke he aga kua latatonu ke he tuaga mo e tau kapitiga aoga. Ka fai tama o aoga a koe, lali ke fakamahani e tau fakatutalaaga nei mo lautolu.

Ko e fakaako e fanau ha tautolu kua lata ke lahi e magaaho mo e laliaga. Manako e tau matua Kerisiano ke tō e tau matapatu fakaakoaga he Tohi Tapu ke he tau fanau ha lautolu mo e fakalagalaga a lautolu ke momoui fakatatau ke he tau matapatu fakaakoaga ia.—Teu. 6:7; 2 Timo. 3:14.

He ha mutolu a afiafi he Tapuakiaga Magafaoa i mua, lali ke fakamahani mo e fanau haau e tau fakatutala ne fakakite he mena nei. Kitia e aoga he mena nei. Kia tokaloto ko e foliaga ke nakai ako manatu he tau tali po ke tau kupu. Ti liga taute lagaloga e koe e mena ne tupu, he foaki e tau tali kehekehe mo e kitia e puhala ne hikihiki e tau tama haau. He lali a lautolu ke fakamaama e matapatu he tau taofiaga ha lautolu, lagomatai a lautolu ke feaki e aga totonu mo e fakailoilo. Fai mogo, to fakaako e koe e puhala ke he fanau haau ke tali atu e mena ne talitonu a lautolu ke he tau kapitiga aoga, tau katofia, pihia mo e tau faiaoga.

[Puha/Tau Fakatino he lau 4, 5]

TAU FAKAMANATU TŪTAU

Mary: Fakaalofa atu ma John. Manako au ke uiina a koe ke he fiafia tūtau haaku.

John: Fakaaue he manatu mai au ma Mary. Maeke nakai au ke hūhū ki a koe e kakano kua taute e fiafia tūtau?

Mary: Ke fakamanatu e aho ne fanau au. Ai kia fakamanatu haau?

John: Nakai, ai fakamanatu haaku.

Mary: Ko e ha ne pihia ai? Na fiafia e magafaoa haaku he mogo ne fanau au.

John: Ko e magafaoa haaku kua tuga ni haau. Ne fiafia foki a lautolu he mogo ne fanau au. Ka e nakai ko e kakano a ia ki a au ke fakamanatu he tau tau takitaha. He tau fiafia tūtau ha lautolu, tokologa ne manatu kua mua atu e aoga ha lautolu. Ka e nakai kia mua atu e Atua? Ti nakai kia fakaaue a tautolu ki a ia ha kua foaki e ia e moui ki a tautolu?

Mary: Kakano kia a koe kua nakai lata au ke taute e fiafia tūtau haaku?

John: Ki a koe ni ma Mary. Ka ko e ha ne nakai manamanatu ke he mena nei? Tokologa e tagata kua manako ke moua e tau mena fakaalofa tūtau, ka kua pehē e Tohi Tapu mua e monuina he foaki atu ke he talia mai. He nakai hagaaki ki a tautolu ni he tūtau ha tautolu, nakai kia mitaki he fakaaue ke he Atua, ke manamanatu ke he falu, mo e taute e mitaki ki a lautolu?

Mary: Ai manamanatu pihia au. Ti nakai fai mena fakaalofa a koe ne atu he tau matua haau?

John: Na fai. Ka e nakai leo e tau matua haaku ke he aho tūtau haaku. Mai e laua e tau mena fakaalofa ki a au he ha magaaho he manako ha laua. Mohā ma Mary, manako nakai a koe ke iloa na kamata fēfē e tau fakamanatu tūtau?

Mary: Maeke nakai a koe ke talahau ki a au?

John: To tala atu e au a pogipogi e tala ofoofogia ke he tūtau i tuai.

SALUTI E MATINI

Gail: Ko e ha ne ai saluti e koe e matini ma Claire?

Claire: Fakaaue he hūhū ma Gail. Liga hūhū mua au ko e ha ne saluti ai e koe?

Gail: Taute pihia e au ha kua loto au ke he haaku motu.

Claire: Iloa e au na ofania e koe e matua fifine haau ma Gail. Ka e ai saluti e koe e matua fifine haau, pihia nakai?

Gail: Hako. Iloa e koe na saluti e au e matini ha kua fakalilifu au ki ai. Ai kia fakalilifu e koe e matini?

Claire: Fakalilifu e au. Ka e nakai saluti e taua e tau tagata oti mo e tau mena oti ne fakalilifu e taua, pihia nakai?

Gail: Mooli, fakalilifu e au e faiaoga ha taua ka e nakai saluti e au a ia. Liga ai iloa e au e kakano ne saluti e au e matini.

Claire: Tokologa e tagata ne manamanatu kua fakamailoga he matini e motu ha lautolu ma Gail. Ko e saluti e matini na kakano to taute e lautolu e tau mena oti ma e motu ha lautolu. Ka e nakai pihia tonu e logonaaga haaku. Nakai maeke au ke foaki e moui haaku ke he motu haaku ha ko e Atua ne foaki ki a au e moui. Kua fifili au ke foaki e moui haaku ki a Ia. Ti pete he fakalilifu e au e matini, ai saluti au ki ai.

Gail: Maama tuai e au.

Claire: Mohā ma Gail, fiafia au he talahau e koe e mena nei. Ti ka manako a koe ke iloa e kakano ne taute e au po ke nakai taute e au falu a mena, hūhū mai ki a au. Taha mena foki, ne pehē e Tohi Tapu he vahā leva kua mole, ko e patuiki Papelonia ne poaki ke he tau tagata ke fakaveli fakafōhifo ke he tupua. Nakai fakaveli hifo e falu—ti hagahaga kelea ai e tau momoui ha lautolu.

Gail: Mooli ka? Ko e heigoa ne tupu ki a lautolu?

Claire: To tala atu e au e tala ki a lautolu ka okioki kailaā.

TAU FAKATONUTONU HE AOGA

Mike: Ko hai he manatu haau kua lata ke takitaki e vahega ha tautolu ma Tim?

Tim: Ai kau au mo e ha tama ne tuku e higoa ke vili ki ai.

Mike: Ko e ha a ia?

Tim: Fitā au he fai takitaki mitaki ue atu. Ha ko e Kerisiano, kua mavehe au ke fifitaki a Iesu. Ti ai maeke au ke fifili taha takitaki. Taha mena foki, iloa nakai e koe ko e ha ne manatu au ko ia e Takitaki mitaki katoatoa?

Mike: Nakai, ai aoga e mena ia ki a au.

Tim: Ka manako a koe ke iloa, to fiafia au ke tala atu ki a koe.

[Fakatino]

“Fakaalofa atu ma John. Manako au ke uiina a koe ke he fiafia tūtau haaku”

[Fakatino he lau 3]

“Ko e ha ne ai saluti e koe e matini?”