Perofetaaga 5. Moumou e Lalolagi
“Ke moumou ai foki [he Atua] a lautolu kua moumou e lalolagi.”—FAKAKITEAGA 11:18.
● Ko Mr. Pirri ne gahua taute uaina mai he paama i Kpor, i Nigeria. Ko e gahua haana kua matematekelea lahi he holofa e oela he vailele Niger Delta. “Kua tamate ai e tau ika ha mautolu, fakakelea e tau kili ha mautolu, fakakelea e tau vailele ha mautolu,” he ui e ia. “Nakai fai puhala moui a au ne toe.”
KO E HEIGOA NE FAKAKITE HE TAU MENA TUTUPU? Hagaao ke he falu pulotu, ko e 6.5 e miliona tone he tau veve ne hoko atu ke he moana he lalolagi he tau tau takitaha. Fuafua ke he 50 e pasene he tau veve ia ko e tau palasitiki ne tafea ke totou teau e tau tau ato malona. He nakai ni takiva e lalolagi, hane moumou fakahaga he tau tagata e tau koloa pauaki he puhala mafiti. Fakakite he tau kumikumi nukua lata e lalolagi ke taha e tau mo e lima e mahina ke liu fakafoou e tau mena ne fakaaoga he tau tagata he tau. “Ka fakatumau e holo ki mua he puke tagata mo e fakaaogaaga, to lata a tautolu ke ua e Lalolagi he 2035,” he hokotaki he nusipepa Sydney Morning Herald ha Ausetalia.
KO E HEIGOA E TOTOKOAGA FA MAHANI? Kua lotomatala e tau tagata. Maeke ia tautolu ke huhui e tau lekua nei mo e fakahao e lalolagi.
AOGA NAKAI E TOTOKOAGA IA? Tokologa e tau tagata mo e tau matakau gahua malolō kua fakamaama fakalahi e tau lekua he takatakaiaga. Ka ko e lalolagi katoa kua matutaki ke kiva lahi mahaki.
KO E HEIGOA E MANATU HAAU? Kua lata nakai ma e Atua ke fakalava mai mo e fakahao e palaneta ha tautolu neke moumou—tuga ni he mavehe mai e ia ke taute?
He lafi ke he tau perofetaaga ne lima nukua tutala laia ki ai, ne talahau tuai foki he Tohi Tapu e tau tupuaga kua mitaki ma e tau aho fakamui. Fakatutala ke he taha e fakataiaga he perofetaaga ke ono aki.
[Blurb he lau 8]
“Logona hifo e au kua tuga e hau au he moua e vala he parataiso ke he moua e toloaga veve kona.”—ERIN TAMBER, A RESIDENT OF THE GULF COAST, UNITED STATES, CONCERNING THE EFFECTS OF THE 2010 OIL SPILL IN THE GULF OF MEXICO.
[Puha he lau 8]
Fai Fakalagoaga Kia e Atua?
Tali mai he talahau tuai he Tohi Tapu e tau tuaga kelea kua kitia e tautolu he vahā nei, kua fai fakalagoaga kia e Atua ke he tau mena ia? Ko ia kia kua fakatupu a tautolu ke matematekelea? Maeke ia koe ke moua e tau tali makona ke he tau hūhū ia he tohi Ko e Heigoa ne Fakaako Moli he Tohi Tapu? he veveheaga 11, ne taute fakailoa he Tau Fakamoli a Iehova.
[Fakatino Credit Line he lau 8]
U.S. Coast Guard photo