Fakaako Mai he Kupu he Atua

Maeke Fēfē ia Koe ke Mailoga e Tapuakiaga Mooli?

Ko e vala tala nei kua fakalagā e tau hūhū kua liga hūhū e koe mo e fakakite e matakavi ka totou e koe e tau tali he Tohi Tapu haau. To fiafia e Tau Fakamoli a Iehova ke fakatutala e tau hūhū nei mo koe.

1. Na taha ni kia e lotu mooli?

Ne fakaako e Iesu ke he tau tutaki haana na taha ni e lotu, ko e lotu mooli. Tuga e hala kua takitaki ke he moui. Hagaao ke he hala ia, ne pehē a Iesu: “Kua tokogaogao foki a lautolu ke moua.” (Mataio 7:14) Talia he Atua e tapuakiaga hokoia ne fakavē ke he haana Kupu mooli. Ko e tau tagata tapuaki mooli oti kua fakalataha ke he taha e tua.​—Totou Ioane 4:23, 24; 14:6; Efeso 4:4, 5.

2. Ko e ha kua loga lahi e tau lotu kehekehe ne talahau ke eke mo Kerisiano?

Tokologa e perofeta fakavai ne fakahēhē e lotu Kerisiano ti fakaaoga ai ke fakatupu ki mua ha lautolu ni a tau manako. He talahau tuai e Iesu, ne fakakite e lautolu a lautolu ko e ‘tau mamoe’ ka e mahani tuga e tau luko ne hoge. (Mataio 7:13-15, 21, 23) Ko e lotu Kerisiano fakavai ne holofa lahi he mole e mamate he tau aposetolo ha Iesu.​—Totou Gahua 20:29, 30.

3. Ko e heigoa falu puhala kua fakakite e tapuakiaga mooli?

Fakalilifu he tau tagata tapuaki mooli e Tohi Tapu ko e Kupu he Atua. Kua eketaha a lautolu ke momoui fakatatau ke he tau matapatu fakaakoaga i ai. Ti kehe e lotu mooli mai he lotu ne fakavē ke he tau manatu he tau tagata. (Mataio 15:7-9) Ko e tau tagata tapuaki mooli ne nakai fakamatala taha mena ti taute e mena kehe.​—Totou Ioane 17:17; 2 Timoteo 3:16, 17.

Fakaheke he lotu mooli e higoa he Atua ko Iehova. Ne fakailoa e Iesu e higoa he Atua. Lagomatai e ia e tau tagata ke iloa e Atua ti fakaako a lautolu ke liogi ke fakatapu e higoa he Atua. (Mataio 6:9) He matakavi ne nofo a koe, ko e lotu fe ne fakaohooho e fakaaoga he higoa he Atua?​—Totou Ioane 17:26; Roma 10:13, 14.

4. Maeke fēfē a koe ke mailoga e tau tagata tapuaki mooli?

Fakamatala he tau Kerisiano mooli e Kautu he Atua. Ne fakafano mai he Atua a Iesu ke fakamatala e Kautu. Ko e Kautu he Atua e amaamanakiaga hokoia ma e tau tagata. Ne matutaki a Iesu ke tutala hagaao ki ai ato hoko e aho ke mate a ia. (Luka 4:43; 8:1; 23:42, 43) Ne tala age a ia ke he tau tutaki haana ke fakamatala e Kautu he Atua. Ka hau taha tagata ki a koe ke tutala hagaao ke he Kautu he Atua, liga ko e lotu fe kua fakalataha a ia ki ai?—Totou Mataio 10:7; 24:14.

Nakai ko e tau tagata he lalolagi kelea nei e tau tutaki ha Iesu. Nakai fai vala a lautolu he tau mena fakapolitika po ke tau totokoaga fakamatakau. (Ioane 17:16) Nakai fifitaki foki e lautolu e tau gahua mo e tau aga hagahaga kelea he lalolagi.​—Totou Iakopo 1:27; 4:4.

5. Ko e heigoa e matapatu fakamailoga he lotu Kerisiano mooli?

Ha ha he tau Kerisiano mooli e fakaalofa mua ue atu ma e taha ke he taha. Mai he Kupu he Atua, kua fakaako a lautolu ke fakalilifu e tau tagata he tau matakau fakamotu oti kana. Pete he fa lalago malolō he lotu fakavai e tau felakutaki he tau motu, kua nakai talia he tau tagata tapuaki mooli ke taute pihia. (Mika 4:1-4) Ka ko e tau tagata he lotu mooli kua fakaaoga fakamakai e tau magaaho mo e tau koloa ha lautolu ke lagomatai mo e atihake e falu.​—Totou Ioane 13:34, 35; 1 Ioane 4:20, 21.

Ko e matakau fe ne fakavē e tau fakaakoaga oti ke he Kupu he Atua, fakaheke e higoa he Atua, mo e fakailoa e Kautu he Atua ko e amaamanakiaga hokoia he tau tagata? Ko e matakau fe ne fakakite e fakaalofa mo e nakai lalago e felakutaki? Ko e tau fakamooliaga kua tuhi ke he Tau Fakamoli a Iehova.​—1 Ioane 3:10-12.

Ma e falu vala tala foki, kikite e veveheaga 15 he tohi nei, Ko e Heigoa ne Fakaako Moli he Tohi Tapu?, ne taute fakailoa he Tau Fakamoli a Iehova.

[Fakatino he lau 16]

“Kua talahau e lautolu kua iloa e lautolu e Atua, ka kua fakatikai e lautolu a ia ke he tau gahua ha lautolu.”​—Tito 1:16