Hiki he Tohi Tapu e Tau Momoui

“Ne eke au mo taane mitaki.”​​—RIGOBERT HOUETO

• TAU NE FANAU: 1941

• MOTU NE FANAU AI: BENIN

• MOUI FAKAMUA: TAGATA HOANA LOGA, TAGATA TOTOKO KE HE TAU FAKAMOLI A IEHOVA

MOUI HAAKU KUA MOLE:

Ko au mai i Cotonou, ko e taone lahi i Benin. Ne feaki hake au ko e Katolika ka e nakai fano tapu tumau. Tokologa e tau Katolika he matakavi ne nofo ai au ne loga e hoana, ha kua fakaatā matafakatufono e hoana loga he tau magahala ia. Ne mau e au fā e fifine he magaaho fakamui.

Magaaho ne tupu e totokoaga he atu tau 1970, ne manatu au to aoga ai ke he motu haaku. Ne lalago katoatoa e au e totokoaga ti putoia ke he tau mena politika. Nakai fiafia e tau tagata totoko ke he Tau Fakamoli a Iehova ha kua fakatumau e Tau Fakamoli ke tuuho ke he tau mena fakapolitika. Ko au taha ia lautolu ne favale ke he Tau Fakamoli. Magaaho ne fekau e tau misionare Fakamoli ke o kehe mai he motu he 1976, ne iloa tonuhia e au to nakai liliu mai a lautolu.

PUHALA NE HIKI HE TOHI TAPU E MOUI HAAKU:

Ne fakaoti e totokoaga he 1990. Kua ofo lahi au he nakai leva ti liu kitia e tau misionare Fakamoli. Ne kamata au ke manamanatu kua liga haia e Atua mo e tau tagata nei. Kavi ke he magaaho ia, ne hiki e gahuaaga haaku. Taha he tau tagata foou ne fakatau gahua mo au ko e Fakamoli, ti nakai moumou magaaho a ia ka e talahau e tau taofiaga haana. Ne fakakite mai e ia ki a au e tau kupu Tohi Tapu ne fakamaama ko Iehova ko e Atua he fakaalofa mo e fakafili tonu. (Teutaronome 32:4; 1 Ioane 4:8) Kua fiafia au ke he tau mahani ia. Ati manako au ke fakaako fakalahi atu hagaao ki a Iehova, ti talia e au e foaki ke fakaako e Tohi Tapu.

Nakai leva ne kamata au ke fina atu he tau feleveiaaga he Tau Fakamoli a Iehova. Ne nava au he fakaalofa mooli ne kitia e au​—kua nakai fakaigati ha ko e lanu po ke tuaga he vahega ne tupu hake ai. He lahi e lafi haaku mo e Tau Fakamoli, ne maaliali fakahaga ai ko e tau tagata nei ko e tau tutaki mooli ha Iesu.​​—Ioane 13:35.

Ne fifili au kaeke ke manako au ke fekafekau ki a Iehova, kua lata ia au ke toka e Lotu Katolika. Nakai ko e lakaaga mukamuka a ia ke taute, ha kua matakutaku au ke he tau manatu he falu. He mole e tau magaaho loga mo e lagomatai ni ha Iehova, ne moua e au e fakamalolō ti fakaoti mai he lotu.

Ka kua fai hiki lahi foki ne kua lata ia au ke taute. Ko e fakaako haaku ke he Tohi Tapu kua iloa e au nakai talia he Atua e hoana loga. (Kenese 2:18-24; Mataio 19:4-6) Ke he fofoga haana, ko e fakamauaga fakamua ni haaku kua talia. Ti tohi matafakatufono e au e fakamauaga nei ti fekau e tau hoana haaku ne toe ke o, mo e fakatokatoka ma e tau levekiaga tino ha lautolu. Fai magaaho he mole, ne ua he tau hoana fakamua haaku ne eke mo Tau Fakamoli a Iehova.

PUHALA NE AOGA KI A AU:

Pete he tumau ni e hoana haaku ko e Katolika, kua fakalilifu e ia e fifiliaga haaku ke fekafekau ki a Iehova. Ne logona hifo tokoua e maua kua eke tuai au mo taane mitaki.

Ne fa manamanatu au na maeke ia au ke fakaholo ki mua e maaga haaku he puhala he tau mena politika, ka kua nakai kautū e tau laliaga ia. Kua kitia e au mogonei ko e Kautu he Atua ni e tali ke he tau lekua he tagata. (Mataio 6:9, 10) Fakaaue lahi au ki a Iehova he fakakite ki a au e puhala ke takitaki ke he moui fiafia mooli.

“Ne nakai mukamuka ke taute e tau hikiaga kua lata.”​​—ALEX LEMOS SILVA

• TAU NE FANAU: 1977

• MOTU NE FANAU AI: PARASILI

• MOUI FAKAMUA: AKOAKO PENETEKOSO

MOUI HAAKU KUA MOLE:

Ne feaki hake au he tau maaga tua ha Itu, he São Paulo State. Ne talahaua e faahi nei he taone he matahavala lahi.

Ne tō lahi e vale haaku mo e mahani kelea. Lafi ki ai, ne putoia au he feutaaki nakai matafakatufono he tau tulaki. Fai magaaho he mole, ne mailoga e au ko e puhala moui pihia to takitaki atu au ke he fale puipui po ke tanuaga, ti fakaoti ai e au. Ne fakalataha atu mogoia au ke he Lotu Penetekoso, ti fakahiku ne eke au mo akoako.

Logona hifo e au to liga lagomatai mooli e au e tau tagata ha ko e gahua haaku he lotu. Ne hokotia foki au ke fakapuloa e fakaholoaga fakalotu he letiō ti iloa lahi ai he matakavi. Ka e talitonu fakahaga au ko e fakaholoaga he lotu katoa kua nakai manamanatu ke he tuaga he tau tagata i ai​​—ne tote hifo foki e manamanatu ke fakaheke e Atua. Logona hifo e au ko e foliaga hokoia he lotu ke ati tupe. Ne fifili au ke fakaoti mai he lotu.

PUHALA NE HIKI HE TOHI TAPU E MOUI HAAKU:

Magaaho ne kamata au ke fakaako e Tohi Tapu mo e Tau Fakamoli a Iehova, ne maeke ia au ke kitia vave kua kehe a lautolu mai he tau lotu ne toe. Ki a au, ua e mena ne maaliali lahi. Fakamua, ko e Tau Fakamoli a Iehova ne nakai tutala hokoia ke fakaalofa ke he Atua mo e katofia; ne fakakite ai e lautolu. Ke uaaki, ne nakai putoia a lautolu he tau mena politika po ke latau. (Isaia 2:4) Ko e tau mena ua ia ne mauokafua au kua moua tuai e au e lotu mooli​—ko e hala lautote ke pu atu ke he moui tukulagi.​—Mataio 7:13, 14.

Mailoga e au kaeke kua manako au ke fakafiafia e Atua, kua lata ia au ke taute e falu hikiaga lalahi. Lata ia au ke onoono fakalahi ke he magafaoa haaku. Lata foki au ke lahi e mahani fakatokolalo. Nakai mukamuka ke taute e tau hikiaga kua lata, ka ko e lagomatai ha Iehova, ne kautū ai au. Ne nava e hoana haaku ha ko e tau hikiaga nei. Na kamata a ia ke fakaako Tohi Tapu mua ia au, ka kua mafiti e holo ki mua haana mogonei he tau fakaakoaga haana. Nakai leva ti iloa tokoua e maua kua manako a maua ke eke mo Tau Fakamoli a Iehova. Taha ne aho ne papatiso a maua.

PUHALA NE AOGA KI A AU:

Kua fiafia au mo e hoana haaku ke lagomatai e tau tama tokotolu ha maua ke feaki e kapitiga tata mo Iehova. Ko e magafaoa fiafia a mautolu. Fakaaue au ki a Iehova ha kua futiaki mai e ia au ke he kupu mooli he Kupu haana ko e Tohi Tapu. Ne hiki mooli ai e tau momoui he tau tagata! Ko e fakamooliaga moui au.

“Logona hifo e au e meā, moui, mo e katoatoa.”​​—VICTORIA TONG

• TAU NE FANAU: 1957

• MOTU NE FANAU AI: AUSETALIA

• MOUI FAKAMUA: KELEA E VAHĀ TAMA

MOUI HAAKU KUA MOLE:

Ne tupu hake au i Newcastle, i New South Wales. Ko au e uluaki he tokofitu e tama ne fanau ke he matua taane favale mo e konahia, mo e ke he matua fifine favale. Ne ekefakakelea he matua fifine haaku au ke he tino mo e tau kupu. Ne tala mai tumau a ia ki a au ko e tama kelea au mo e to fakakikiveka au ke he afi tote. Ko e tau ekefakakelea pihia ne fakamatakutaku au.

Ko e tau pakia ne fakalauia mai he matua fifine haaku au ne fa taute au ke ai fano he aoga. He 11 e tau, ne utakehe mai au he tau matua haaku ti toka mua he fale leveki he fakatufono ti uta fakamui ke he fale pope. He tū e 14 e tau haaku, ne hola au he fale pope. Ne nakai fia liu au ki kaina, ti nofo au he tau puhalatū he Kings Cross, he taha taone ha Sydney.

He nofo he tau puhalatū, ne putoia au ke he tau tulaki, kava, tau mena fakatelefua, mo e fakataka. Taha e mena ne tupu ne fakamatakutaku lahi au. Ne nofo au he poko he tagata ne pule ke he kalapu koli pō. He taha afiafi, tokoua e tagata taane ne o mai ke kitia a ia. Ne fekau e ia au ke fano ke he poko mohe, ka e maeke ia au ke logona e fakatutalaaga ha lautolu. Kua pulega e tagata ne pule ke he kalapu ke sela au ke he tau tagata nei. Amanaki a lautolu ke fufū au he toga lau koloa ti uta au ki Sapanī ke gahua he fale kava. Ne hopoate au ti hopo hifo he kaupā mo e poi ke kumi lagomatai.

Ne moua e au e tagata taane ne ahiahi mai ki Sydney, ti fakamaama age e au e tuaga haaku, he amanaki to mai e ia taha tupe. Ka e nakai pihia, ne uiina e ia au ke he mena ne nofo a ia ke maeke ia au ke koukou mo e kai taha mena. Ko e fakahikuaga ne nakai fano kehe au. Taha e tau he mole ne mau a maua.

PUHALA NE HIKI HE TOHI TAPU E MOUI HAAKU:

Magaaho ne kamata au ke fakaako e Tohi Tapu mo e Tau Fakamoli a Iehova, ne kehekehe e tau logonaaga haaku. Ne ita au he iloa ko Satani ne fakatupu e kelea muitui; na fakaako tumau ki a au ko e Atua ne fakamatematekelea a tautolu. Logona hifo e au e fakatotoka lahi he mogoia ha kua iloa e au mena nakai fakahala e ia e tau tagata ke he afi tote, ko e fakaakoaga ne fakamatakutaku au kua leva lahi he manatu e au.

Ne nava au ke he puhala ne fakavē he Tau Fakamoli e tau fifiliaga oti ha lautolu ke he Tohi Tapu. Ne momoui a lautolu fakatatau ke he tua ha lautolu. Ko e tagata kafilo au, ti pete ni e tau mena ne talahau mo e taute e au, ne fakaalofa mo e fakalilifu he Tau Fakamoli au.

Ko e taufetului lahi mahaki haaku ko e tau logonaaga fakateaga. Ne fakateaga mooli e tau logonaaga haaku hagaao ki a au ni, ti leva e nofo au mo e tau logonaaga nei he mole e papatiso haaku ko e taha he Tau Fakamoli a Iehova. Iloa e au na ofania e au a Iehova, ka e talitonu au na nakai maeke a ia ke ofania ha tagata tuga au.

Ko e mena ne hiki au, ne tupu he kavi ke he 15 e tau he mole e papatiso haaku. He lauga he Fale he Kautu he Tau Fakamoli a Iehova, ne hagaao e tagata lauga ke he Iakopo 1:23, 24. Ne fakatatai he tau kupu ia e Kupu he Atua ke he fakaata ne maeke ia tautolu ke kitia a tautolu ke he puhala ne kitia e Iehova a tautolu. Ne kamata au ke manamanatu na kehe kia e mena ne kitia e au hagaao ki a au ke he mena ne kitia e Iehova. Fakamua, ne totoko e au e manatu foou nei. Ne manatu agaia ni au kua lahi mahaki e amaamanaki haaku ke fakaalofa mai a Iehova ki a au.

Fai aho he mole, ne totou e au e kupu Tohi Tapu ne hiki e moui haaku. Ko e kupu tohi he Isaia 1:18, ne fatiaki a Iehova he pehē: “Kia o mai a a mutolu, ke pulega a tautolu, pete he tuga e ie kula ha mutolu a tau hala, to hina ia po ke kiona.” Ne logona hifo e au kua tuga na vagahau mai a Iehova ki a au, he pehē: “Hau ā ma Vicky, kia fakatokatoka fakahako e tau mena he vahāloto ha taua. Iloa e au a koe, iloa e au e tau agahala haau, iloa e au e loto haau​—ti ofania e au a koe.”

Ne nakai maeke au ke mohe he po ia. Kua fakauaua agaia au na maeke a Iehova ke ofania au, ka e kamata au ke manamanatu hagaao ke he poa lukutoto ha Iesu. Ofo noa ni, kua mailoga e au kua leva lahi tuai e fakauka a Iehova ki a au, he fakakite ki a au na ofania e ia au ke he tau puhala loga. Ka kua tuga na pehē au ki a ia: “Nakai lahi e ofania haau ke hoko mai ki a au. Ko e poa he Tama haau kua nakai lahi ke ufiufi au.” Ne tuga kua liuaki age ni au he lukutoto ki a Iehova. Ka ko e mogonei kua moua tuai e au, he manamanatu fakahokulo ke he mena fakaalofa he lukutoto, ti kamata au ke logona hifo e ofania mai ia Iehova.

PUHALA NE AOGA KI A AU:

Kua logona hifo e au e meā, moui, mo e katoatoa. Kua holo ki mua e fakamauaga haaku, ti fiafia au ha kua maeke ia au ke fakaaoga e tau mena ne tupu ki a au ke lagomatai e falu. Kua hau fakahaga au ke logona e tata lahi atu ki a Iehova.

“Ko e tali anei ke he liogi haaku.”​—SERGEY BOTANKIN

• TAU NE FANAU: 1974

• MOTU NE FANAU AI: RUSIA

• MOUI FAKAMUA: TAGATA FIAFIA KE HE TAU LOLOGO HEAVY-METAL

MOUI HAAKU KUA MOLE:

Ne fanau au i Votkinsk, ko e matakavi ne fanau e tagata talahaua he fati lologo ko Pyotr Ilich Tchaikovsky. Na mativa e magafaoa ha mautolu. Loga e tau mahani mitaki he matua taane haaku, ka ko e tagata inu kava a ia ti uka tumau e takatakaiaga he loto kaina.

Nakai ko e tama lotomatala lahi au, ti fai tau he mole ne tupu ia au e logonaaga fakateaga lahi mahaki. Ne vevehe kehe mo e tuahā au ke he falu. Ne fakatupetupe lahi mahaki e fano he aoga. Ke fakatai, ka talahau e au e tala, ne fa uka lahi au ke fakamaama foki e tau manatu mukamuka ne fa maeke ia au ke talahau he falu mogo. He hoko au ke he aoga tokoluga, taha e tau ne pehē e lau ripoti haaku: “Nakai loga e kupu, nakai maeke ke talahau e tau manatu haana.” Ne mamahi lahi au he tau kupu ia ti au atu foki e fakateaga e logonaaga haaku. Kamata au ke manamanatu hagaao ke he kakano he moui haaku.

He tau tau fuata mui haaku, ne kamata au ke inu kava. Mogo fakamua, ne taute he inu au ke mitaki e logonaaga. Ka ko e mogo ne inu lahi mahaki au, ne fakatauhele he loto manamanatu haaku au. Tuga kua nakai fai kakano e moui haaku. Ne kamata au ke au atu e logonaaga fakaatukehe, falu magaaho ne loga e aho ne hū au i kaina. Ne kamata au ke manamanatu ke taupega.

Magaaho ne 20 e tau haaku, ne hoko mai e fakatotokaaga foou ka e ku. Ne moua e au e leo kofe lologo heavy-metal. Ne logona hifo e au e malolō ha ko e leo kofe ti kumi e au falu ne fanogonogo ki ai. Ne fakaloloa e au e ulu haaku, huki e tau teliga, mo e tauteute tuga e tau tagata lologo ne nava e au. Ne kamata fakahaga au ke fakahanoa mo e aga vale, ti fa taufetoko mo e magafaoa haaku.

Manatu au ko e fanogonogo ke he tau leo kofe lologo heavy-metal ka taute au ke fiafia, ka e nakai pihia e mena ne tupu. Ne eke au mo tagata kehe! Ti ko e mogo ne iloa e au falu mena kelea hagaao ke he tau tagata talahaua he lologo ne nava au ki ai, ne logona hifo e au e fakahehē.

Ne liu foki au manamanatu ke taupega​—ti manamanatu lahi ki ai mogonei. Ko e mena ni ne taofi au ko e manatu ke he puhala ka lauia e matua fifine haaku. Ne ofania lahi mahaki e ia au, ti lahi mahaki e mena haana ne kua taute ma haaku. Ko e tuaga mamahi lahi mahaki. Nakai manako au ke moui, ka e nakai maeke au ke fakaoti e moui haaku.

Ke tauhele aki e manatu nā ia au, ne kamata au ke totou e tau tohi Rusia tuai. Taha e tala ne putoia e toa ne gahua he lotu. Ne amanaki ni au ti logona hifo e manako lahi mahaki ke taute taha mena ma e Atua mo e falu tagata. Liligi e au e loto haaku ki a Iehova he liogi, ko e mena ne nakaila taute ia e au fakamua. Ne ole au ke he Atua ke fakakite mai e puhala ke maeke au ke moua e moui fai kakano. He liogi ia, ne logona hifo e au e fakatotokaaga ofoofogia. Ka e mua atu e ofoofogia ke he mena mogonei ka tupu. Ua ni e tulā he mole, taha he Tau Fakamoli a Iehova ne nokonoko he gutuhala haaku ti foaki ki a au e fakaako Tohi Tapu. Ne talitonu au ko e tali anei ke he liogi haaku. Ko e aho fakamua a ia he moui foou mo e fiafia ma haaku.

PUHALA NE HIKI HE TOHI TAPU E MOUI HAAKU:

Pete ni he uka lahi, ne tolo e au ke he vao e tau mena oti haaku ne matutaki ke he tau leo kofe lologo heavy-metal. Ka e leva e manatu e au e tau lologo ia. Ka lavea au ke fano he matakavi ne ta e tau lologo pihia, ne mafiti au ke manatu e moui fakamua haaku. Nakai manako au ke fio e tau manatu nakai mitaki ia aki e tau mena mitaki oti kua kamata mogonei ke vakavaka he manamanatuaga mo e loto haaku. Ti kalo kehe pauaki au he tau matakavi pihia. Ko e ha magaaho ka kamatamata au ke hagaaki ke he moui haaku kua mole, ne liogi fakamakamaka au. Ko e taute pihia kua lagomatai au ke logona e “monuina [mafola] foki mai he Atua kua mua ue atu ke he tau mena oti kua manamanatu ki ai.”​​—Filipi 4:7.

He fakaako e au e Tohi Tapu, ne iloa e au na fai kotofaaga e tau Kerisiano ke talahau e tua ha lautolu ke he falu. (Mataio 28:19, 20) Ne manatu moolioli au kua nakai fakaai au ke taute pihia. He magaaho taha, ko e tau mena foou haaku ne iloa kua tamai ki a au e fiafia lahi mo e mafola e loto. Iloa e au kua lata foki he falu ke iloa e tau kupu mooli nei. Pete ne matakutaku au, ne kamata au ke tutala ke he falu hagaao ke he tau mena haaku ne fakaako. Ne ofo lahi au, ko e tutala ke he falu hagaao ke he Tohi Tapu kua fakamalagaki mooli e mauokafua fakatagata haaku. Kua fakamalolō foki ai e tau taofiaga foou nei he loto haaku.

PUHALA NE AOGA KI A AU:

Kua fai hoana au mogonei ti fiafia mo e moua e olioli he lagomatai e tokologa he tau tagata ke iloa e Tohi Tapu, putoia e mahakitaga haaku mo e matua fifine haaku. Ko e fekafekau ke he Atua mo e lagomatai e falu ke iloa a ia kua foaki ke he moui haaku e fai kakano mooli.