Manatu Nakai e Koe?

Kua loto fakaaue nakai a koe he totou ke he tau fufuta foou he Ko e Kolo Toko? Lali la mogoia ke kitia ko e maeke nakai a koe ke tali e tau hūhū i lalo:

• Ko Kehena Kia ko e Matakavi he Afi Fakakikiveka?

Nakai. Ko e manatu ke tugi moui e tau tagata kua fakalialia ki a Iehova. Mua atu, ko e manatu he fakakikiveka e tau tagata mamate kua fekehekeheaki mo e aga fakaalofa hofihofi he Atua. Ne fakaaoga e Iesu e kupu “Kehena” ke fakamailoga e moumouaga katoa ne fua mai he fakafiliaga velagia he Atua. Ti ko e “Kehena” kua kakano pihia foki ke he “loloto afi,” ne talahau he tohi ha Fakakiteaga. Kua fakamailoga he tau mena ua ia e moumouaga tukulagi ne nakai maeke ke fai liu tu mai.​—7/1, lau 31.

• Ko e heigoa falu he tau manatu ma e tapuakiaga magafaoa?

Falu ne tauteute ma e tau feleveiaaga he fakapotopotoaga. Falu ne totou, fakatutala, mo e fakataitai e tau tala he Tohi Tapu mua atu ma e aoga he fanau ikiiki. Ko e takatakaiaga totoka mitaki kua fa lagomatai lahi ke fakaohooho e fakatutalaaga mo e feutaaki he tau manatu, ka taute e magaaho ia ke tokaloto he tau tagata oti.​—8/15, lau 6

• Maeke Kia a Ia ne Mitaki Katoatoa ke Galo e Mitaki Katoatoa?

E. Ne fai mitaki katoatoa ne foaki he Atua ke he tau mena momoui iloilo haana. Pete he tufuga mitaki katoatoa, ne lata a Atamu ke fakalilifu e tau kaupāaga fakatino ne tuku age he Tufuga haana ki a ia. Ma e fakatai, ane mai fakaheu e ia e fakatufono he fua lalolagi ti hopo hifo he kau afati tokoluga, to mate po ke pakia lahi a ia. Pihia foki, nakai fai mena momoui mitaki katoatoa​—tagata po ke agelu​—ka molea atu he tau kaupāaga he tau mahani ne fakatoka he Atua ka e nakai lauia a ia ke he tau fua mamahi.​—10/1, lau 6.

• Ko e heigoa e kakano he talahauaga he Atua ke he tau Levi: “Ko au ko e hāu a veveheaga”?

Igatia e falu magafaoa ha Isaraela mo e veveheaga he kelekele, ka ko e tau Levi kua eke a Iehova mo “veveheaga” ha lautolu. (Nume. 18:20) To nakai moua e lautolu e kelekele, ka e moua e lautolu e kotofaaga gahua uho lahi. To leveki agaia e Iehova e tau manako fakatino ha lautolu. He vahā nei, ko lautolu ne moua e lilifu he fakalaulahi e tau mena he Kautu ka mauokafua to leveki e tau mena fakatino ha lautolu he moui.​—9/15, lau 7-8, 13.

• Ko e heigoa ka lagomatai e Kerisiano ke fifili e falu fakafiafiaaga kua aoga po ke nakai?

Ke mailoga e tau fakafiafiaaga ke aoga mo e fiafia ke he fofoga he Atua, kua aoga ke hūhū: Ko e Heigoa kua Putoia Ai? Magaaho Fe ka Kumi Ai e Au? Ko Hai e Tau Feoakiaga Haaku?​—10/15, lau 9-12.

• Ko e heigoa haaku ka taute ka fai hūhū au hagaao ke he taha mena ne totou e au he Tohi Tapu po ke ka manako fakatonuaga au hagaao ke he lekua fakatagata?

Kua fakamalolō he Tau Fakatai 2:1-5 a tautolu takitokotaha ke “kumi fakamakutu” e loto matala mo e loto manamanatu. Kakano e mena nei kua lata ia tautolu ke eketaha he kumikumi e tau tali ke he tau hūhū faka-Tohi Tapu ha tautolu mo e kumi e tau tali ke he tau lekua fakatagata ha tautolu. Ka oti e kumikumi ti nakai moua e tautolu e takitakiaga po ke tali, maeke a tautolu ke o atu ke he matakainaga motua fakaagaaga, liga ke he taha he tau motua.​—10/15, lau 32.

• Maeke fēfē e tala ia Tau Fakatai 7:6-23 ke lagomatai a tautolu ke fakamamao he onoono ke he tau fakatino telefua?

Ko e vala tala ia ne talahau hagaao ke he fuata taane ne hifo he puhala ne nofo e fifine mahani faivao ne kua talahaua ai. Ne fakataki he fifine nei a ia. He vahā nei, kua lata ia tautolu ke fakamamao he tau faahi Internet ne ha ha i loto e tau fakatino telefua fakalialia ti kua aoga ai ke kumi e lagomatai he Atua he liogi ato fehagai mo e tau ata pihia he Internet.​—11/15, lau 9-10.