Fakailoa Fakamalolo e Lautolu e Kupu he Atua!
Ko e loto malolō ti pihia ne fakamalolo ke lata mo e totokoaga. Ko e tau mahani nei kua fakatātā he tau Kerisiano mooli, ti fakakite he tau tohi tuga e “Bearing Thorough Witness” About God’s Kingdom mo e Jehovah’s Witnesses—Proclaimers of God’s Kingdom. Tuga e tau matakainaga tua ha tautolu he senetenari fakamua, kua ono atu a tautolu ki a Iehova he liogi ma e haana a agaaga mo e lagomatai ke talahau atu e kupu haana mo e fakamalolo.—Gahua 4:23-31.
Hagaao ke he gahua fakamatala ha tautolu he tauaga fakamua he lalolagi, taha e matakainaga taane ne tohi: “Kua tufa hakahakau he tau fekafekau he Atua e tau volume ne fitu he Studies in the Scriptures, ne mataulu The Finished Mystery. Kua hokotia ke he tufatufaaga lahi mahaki. Ne fakatoka mai e Kingdom News Nu. 1 he 1918. Ti hoko mai e Kingdom News Nu. 2, ne fakamaama e kakano kua utakehe he tau pule e tohi The Finished Mystery. Ti mui mai ai e Kingdom News Nu. 3. Ko e tau tohi nei ne tufatufa fakalaulahi he vahega fakamooli ne fakauku. Ne lata ke tua mo e loto malolō ke tufa e Kingdom News.”
He vahā nei, kua fa moua he tau tagata fakailoa foou he Kautu e fakamahani ke he gahua he fonua, ka e nakai pihia tumau. He manatu ke he mena ne tupu fakamua ki a ia he gahua he fonua he 1922, taha e matakainaga taane Polani he Tau Faahi Kaufakalataha ne tohi: “He nakai iloa e puhala ke foaki e tau tohi mo e nakai mitaki e vagahau Peritania, ne tū tokotaha au i mua he ofisa he ekekafo mo e nokonoko. Ne hafagi he nosi e gutuhala. To nakai nimo e au e mena ia ne tupu, ha kua fiafia mo e hopoate au. He hafagi e au e kato kavei haaku, ne mokulu mai oti e tau pepa haaku ke he tau hui he nosi. Nakai iloa e au e mena ne talahau e au, ka e toka e au e pepa mo ia. He mogo ne fano kehe au, ne moua e au e loto malolō mo e logona hifo e fakamonuina ha Iehova. Ne toka e au e tau tohi ikiiki loga he aho ia he puhalatū pisinisi ia.”
“Kavi ke he 1933, tokologa e matakainaga taane ne fakaaoga e tau motokā fakailoa ke fakailoa e ogo he Kautu,” he ui he matakainaga fifine. He taha mogo, ne fakamatala a ia mo e hoa Fakamoli he tau atu mouga ha California, U.S.A. “Ne tahake fakatokoluga he matakainaga taane e motokā fakailoa ke he atu mouga, ti nonofo a mautolu i lalo he taone,” he manatu e ia. “He kamata a ia ke fakatagi e ogo ne kua tapaki, kua teitei ni ke taogo tuga na hifo mai he lagi. Ne lali lahi e tau tagata he taone ke kumi e matakainaga taane, ka e nakai moua e lautolu. He oti e leo ne tapaki ai, ne o atu a mautolu ke he tau tagata ti fakamatala ki a lautolu. Ne gahua au mo e ua foki e motokā fakailoa ti tala atu ki a mutolu na tokologa e tagata ne nakai loto ke fanogonogo ke he ogo. Ka e maeke ni ia lautolu ke fanogonogo ke he tau lauga ne fakatagi mai ai he tau motokā fakailoa ke he tau kaina ha lautolu. Maeke ia mautolu ke kitia ko Iehova ne fakatupu e puhala hako ke fakaaoga he magaaho hako. Ko e puhala ne manako ke loto malolō katoa a mautolu, ka e fakamooli tumau e finagalo ia, ti kua fakaheke e higoa a Iehova.”
He atu tau 1930, mo e mataulu he 1940, ko e tau lapakofe fakatagi mo e tau lauga Tohi Tapu ne tapaki nukua fakaaoga he gahua he fonua ha mautolu. Ne manatu he taha fifine Kerisiano: “Ko e matakainaga fifine fuata ne gahua he taha gutuhala ke he taha gutuhala mo e lapakofe fakatagi. He oti e fakatagi e ia e leo tapaki ke he taha gutuhala, ko e tagata taane he fale ne ita lahi mahaki ti tele kehe e ia e lapakofe fakatagi mai he kaupā. Nakai taha he tau leo tapaki ne malona. Tokotolu e tagata taane hane kai a lautolu he tulaki ne tū kua kitia e mena ne tupu, ne uiina e matakainaga fifine ke fakatagi e leo tapaki ki a lautolu, ti moua e tau tohi mai ia ia. Ne fakatotoka he mena ia e ekefakakelea.” Ko e loto malolō ke fakauka ke he tau kamatamata pihia.
Ne lafi foki he matakainaga fifine ia: “Ne liu au manatu e kamataaga he gahua mekasini he puhalatū he 1940. Ke he kamataaga, ne ha ha i ai e tau vala tala foleni fakalaini. He o takitaha ai, ne o atu e tau matakainaga taane mo e fifine ke he taha faahi he puhala o hui ne fua ai e lautolu e tau fakamailoga ne totou “Ko e Lotu ko e Matahele mo e Fakavaia” mo e “Fekafekau ke he Atua mo Keriso ko e Patuiki.” He magaaho taha, ne age noa e tau tuleke ke he tau tagata. Ne lata ke loto malolō ke taute e tau puhala nei he gahua, ka e eke e lautolu e finagalo he fakatumau e higoa a Iehova mo e tau tagata ki mua he fofoga he toloaga.”
“He taute e gahua mekasini he tau taone ikiiki ne uka lahi,” he ui he taha matakainaga fifine. “Tupu e mena nei he totoko malolō ke he Tau Fakamoli. . . . Kua lata mooli ke loto malolō he tū ke he matahoe mo e totō e tau mekasini mo e hea atu e tau talahauaga ne tala mai ke fakaaoga e mautolu. Ka e, lavea a mautolu ke tonoa e Aho Faiumu. He falu mogo ne fa kapitiga e tau tagata. Ha ha i ai e tau magaaho ne agaagai e tau matakau ita, ti falu mogo ne fakamatomo a mautolu ke kalo mai he matakau vale.”
Pete ne favaleaga ne tupu he Felakutaki II he Lalolagi, ne taute fakamalolo he Tau Fakamoli a Iehova ha lautolu a gahua he fonua. He matagahua ne 43 e aho mai ia Tesemo 1, 1940, ke hoko ki a Ianuari 12, 1941, kavi ke he 50,000 tagata fakailoa he Tau Faahi Kaufakalataha ne tufatufa ke teitei valu e miliona he tau tohi ikiiki.
Tokologa a lautolu ne kua momotua he fakatokatokaaga he Atua ne manatu lahi e tau paleko kua mole ne eketaha ki a lautolu ke fakamalolo. Ne manatu he falu he tau tau loga, ne fatiaki e lautolu e talahauaga ne fakakite e aga loto malolō ha lautolu, Fofota atu e tauaga ke he gutuhala! Ko e puhala he ogo ne foaki he Atua ka fakahoko ai ato moumou e fakatokaaga kelea nei ne kitia agaia e tautolu. Ka ko e lagomatai faka-Atua to fakatumau a tautolu ke fakapuloa e kupu a Iehova he tua mo e loto malolō.
[Blurb he lau 9]
Lata tumau e loto malolō ke taute e gahua fakamatala he Kautu