He Kumi ke he Tau Tali

“Teitei e tau tagata oti ke fai manatu ko hai a [Iesu]. Pete ne tuaga he tua po ke fakauaua ha tautolu, kua fa hūhū hifo a tautolu, ‘Ko hai e tagata nei?’”—TAGATA TOHIA KO STAN GUTHRIE.

KUA fia iloa e tau tagata hagaao ki a Iesu. Ko e tau tohi hagaao ki a ia ne lahi e fakatau he tau tagata. Ko e tau kifaga hagaao ki a ia kua talahaua lahi e kautūaga. Ka kua mau agaia ni e tau hūhū hagaao ki a Iesu. Kua kehekehe e tau manatu he tau tagata hagaao ki a Iesu.

He falu tau kua mole, tokoua e tagata tohi tala ne uiina e tau tagata ke tuku e tali he Internet ke he hūhū “Ko hai a Iesu?” Kua putoia he tau tali e tau mena nei:

● “Tuga e rapai (faiaoga) a ia ne taute e moui haana mo fifitakiaga he fakaalofa hofihofi.”

● “Ko ia ko e tagata noa ne ofoofogia lahi e puhala moui.”

● “Nakai fai fakamooliaga na moui a Iesu.”

● “Ko Iesu ko e Tama he Atua ne fanau mai, mate, ti fakaliu tu mai he mate ke fakahao a tautolu mai he tau agahala ha tautolu. Kua moui a ia he vahā nei, ti to liu mai a Ia ke he lalolagi.”

● “Talitonu au ko Iesu Keriso ko e tama fuataha he Atua, ko e tagata moui katoatoa mo e tapu katoatoa he mogo taha.”

● “Ko e tala fakatai a Iesu ma e tau fanau lalahi.”

Maaliali ai, ha kua kehekehe lahi pihia e tau manatu kua nakai hako oti. Fai vala tala mooli nakai ne maeke ke talahau e tau tali mauokafua ke he tau hūhū ha tautolu hagaao ki a Iesu? Ko lautolu ne lolomi e senolo nei kua talitonu ko e Tohi Tapu ko e Kupu he Atua ti ko e tohi ia ni kua tala mai ki a tautolu e tala mooli katoa hagaao ki a Iesu.a—2 Timoteo 3:16.

He vala tala ne mui mai, to fakatutala a tautolu ke he tau tali he Tohi Tapu ke he falu hūhū aga mau hagaao ki a Iesu. Ne talahau ni e ia ko e puhala ke he moui kua hafagi ki a lautolu oti ne fakagahuahua e tua ki a ia. (Ioane 3:16) Uiina e mautolu a koe ke kumikumi ke he tau tali ti fifili e koe kua lata nakai ia koe ke fakaako fakalahi hagaao ki a Iesu mo e puhala ke fakagahuahua e tua ki a ia.

[Matahui Tala]