Mena ne Fakaako e Iesu Hagaao ki a Ia

“Nakai fakauaua a Iesu hagaao ki a ia, matakavi ne hau ai a ia, kakano ati hau a ia ke he lalolagi ha tautolu, mo e mena ne fakatoka he vahā anoiha ma haana.”—TAGATA TOHIA HERBERT LOCKYER.

ATO maeke ke talia mo e tua a tautolu ke he tau mena ne fakaako e Iesu, kua lata ia tautolu ke fai mena ka iloa hagaao ki a ia. Ko hai mooli a Iesu? Hau a ia i fe? Ko e heigoa e amaamanakiaga haana he moui? I loto he tau Evagelia—ha Mataio, Mareko, Luka, mo Ioane—maeke ia tautolu ke logona e tau tali mai ni he gutu ha Iesu.

Moui a ia ato fanau ke he lalolagi Ne lagataha e pehē a Iesu: “Ha i ai au nei, ka e nakala tupu mai a Aperahamo.” (Ioane 8:58) Ne moui a Aperahamo kavi ke he 2,000 he tau tau ato fanau a Iesu. Ka kua moui fakamua atu foki a Iesu ato fanau e tupuna tua fakamooli ia ke he lalolagi. Ti moui i fe a Iesu he magaaho ia? “Ko e mena . . . hifo mai au he lagi” he fakamaama e ia.—Ioane 6:38.

Ko e Tama he Atua Tokologa e tau tama fakaagelu ha Iehova. Ka kua kehe pauaki a Iesu. Ne hagaao a ia ki a ia ko e “Tama fuataha he Atua.” (Ioane 3:18) Kakano he talahauaga ia ko Iesu hokoia ne tufuga tokotaha he Atua. Ko e Tama fuataha ko ia ne eke ai he Atua e tau mena oti kana.—Kolose 1:16.

“Ko e Tama he tagata” Ne lagaloga e fakaaoga e Iesu e talahauaga nei ke hagaao ni ki a ia. (Mataio 8:20) Ne fakakite e ia ko e mena nakai ko e agelu a ia ne faliu e tino po ke mena fakaagaaga ne fakafaliu. Ka ko ia ko e tagata mooli. Puhala mai he agaaga tapu haana, ne hiki he Atua e moui he Tama haana mai he lagi ke he lalolagi, he fakatupu e tama i loto he manava he tamaafine tote ko Maria. Ko e fua, ne fanau a Iesu ko e tagata mitaki katoatoa ne nakai fai agahala.—Mataio 1:18; Luka 1:35; Ioane 8:46.

Ko e Mesia ne mavehe “Kua iloa e au ka haele mai e Mesia,” he tala age he fifine Samaria ki a Iesu. Ne tali e ia: “Ko au haia, ha ne vagahau atu kia koe.” (Ioane 4:25, 26) Ko e kupu “Mesia,” tuga e kupu “Keriso,” kua kakano ko ‘Ia ne Fakauku.’ Ne fakauku, po ke kotofa he Atua a Iesu, ke taute e matagahua pauaki he fakamooli e tau maveheaga he Atua.

Haana matapatu gahua Ne lagataha e pehē a Iesu: “Ko e mena lata ke fakamatala e au e vagahau mitaki he kautu he Atua ke he falu a māga foki; ha ko e mena ia ne fakafano mai ai au.” (Luka 4:43) Pete ne loga e gahua mitaki ne taute e ia ma e tau tagata ne lata ke lagomatai, ko e fakamatala hagaao ke he Kautu he Atua e matapatu pauaki he moui haana. Ko e tau mena ne fakaako e ia hagaao ke he Kautu ia ka fakatutala he vala fakamui.

Maaliali ai, ne nakai ko e tagata noa ni a Iesu.a To kitia e tautolu ko e moui haana he lagi ne fakahokulo e kakano he tau kupu ne talahau e ia he lalolagi. Ti lata nakai a tautolu ke ofo ha kua fakamatala e ia e fekau ka lauia e tau momoui he tau miliona tagata he lalolagi katoa?

[Matahui Tala]