Aoga Kia e Tau Tali?
“To iloa foki e mutolu e mena moli, ko e mena moli foki ke toka noa ai a mutolu.”—IOANE 8:32.
KUA haia i loto he Tohi Tapu e tala mooli ka fakatokanoa a tautolu mai he fakagogoa po ke tau taofiaga hehē foki hagaao ki a Iesu. Ka e aoga mooli kia e tau mena ne talitonu a tautolu hagaao ki a ia? E, aoga ai. Kua aoga ai ki a Iehova. Aoga ai ki a Iesu. Ti lata foki ke aoga ai ki a tautolu.
● Ko e ha kua aoga ai ki a Iehova? Ke fakamukamuka ai, ha ko e “Atua ko e fakaalofa a ia.” (1 Ioane 4:8) Manako a Iehova ki a tautolu ke momoui fiafia tukulagi. Pehē a Iesu: “Nukua pihia e fakaalofa mai he Atua ke he lalolagi [he tau tagata], kua ta mai ai hana Tama fuataha, kia nakai mate taha ne tua kia ia, ka kia moua e ia e moui tukulagi.” (Ioane 3:16) Ne fakafano mai he Atua e Tama haana mo Laveakiaga ha tautolu mo e ke hafagi e puhala ma tautolu ke momoui tukulagi he Parataiso he lalolagi, fakatatau ke he finagalo Haana he kamataaga. (Kenese 1:28) Kua makai e Atua ke foaki e mena fakaalofa he moui tukulagi ki a lautolu ne iloa e kupu mooli hagaao ke he Tama haana mo e gahua fakatatau ki ai.—Roma 6:23.
● Ko e ha kua aoga ai ki a Iesu? Kua fakaalofa foki a Iesu ke he tau tagata. Ne fakakite e ia e fakaalofa foaki noa he makai ke tuku mai haana moui ma tautolu. (Ioane 15:13) Ne maama e ia kua foaki e ia e puhala hokoia ke he fakamouiaga. (Ioane 14:6) Lata nakai a tautolu ke ofo ha kua manako a Iesu ke kitia kua tokologa atu foki ka aoga mai he poa lukutoto haana? Ko e kakano haia ti poaki e ia e tau tutaki mooli haana ke fakaako e tau tagata he lalolagi katoa hagaao ke he finagalo he Atua.—Mataio 24:14; 28:19, 20.
● Ko e ha kua lata ai ke aoga ki a tautolu? Manamanatu fakakū la ke he tau mena kua aoga lahi ki a koe—malolō tino haau mo e magafaoa haau. Manako nakai a koe ma e tino malolō mo e moui mitaki ma haau mo e tau fakahelehele haau? Foaki e Iehova puhala ia Iesu ma haau mo e tau fakahelehele haau e amanakiaga ke he tino malolō mitaki katoatoa mo e moui nakai fai fakaotiaga he lalolagi foou, kua atāina mai he mamahi mo e matematekelea. (Salamo 37:11, 29; Fakakiteaga 21:3, 4) Mitaki nakai e amaamanakiaga ia ki a koe? Ka pihia, fai mena a koe kua lata ke taute.
Liu onoono foki ke he kupu tohi ne fatiaki mai mo e mataulu tala: “To iloa foki e mutolu e mena moli, ko e mena moli foki ke toka noa ai a mutolu.” Ko e tala mooli hagaao ki a Iesu mo e matagahua haana he fakamooli e finagalo he Atua ka fakatokanoa a tautolu mai he tupaaga kelea lahi mahaki—ko e līlīaga he agahala mo e mate. Ke maeke ke logona hifo e tokanoaaga ia, lata a koe ke “iloa . . . e mena moli.” He ha he ako fakalahi hagaao ke he kupu mooli nei mo e puhala kua maeke ia koe mo e tau fakahelehele haau ke aoga mai ai? To fiafia e Tau Fakamoli a Iehova ke lagomatai a koe.