Ko Hai ne Fakafano Atu e “Fetu”?

▪ Kua kitia nakai e koe e tau fakatino he fanauaga po ke tau taute tala ne fakakite e tau patuiki, po ke tau tagata pulotu tokotolu, ne ahiahi atu ke he tama mukemuke fanau foou ko Iesu ne takoto he fale povi? Hagaao ke he tala, fakaaoga he Atua e fetu ke takitaki a lautolu ke he fale ne toka ai e tau manu i Petelehema. He falu motu, tokologa e tau tama ne ako manatu e tau higoa he tau patuiki tokotolu—Melchior, Caspar, mo Baltazar. Ka e tatai nakai e tala mahuiga ia mo e mena ne talahau mooli he Tohi Tapu? Nakai. Ke he tau puhala loga, kua nakai hakotika e tala nei.

Fakamua, ko hai e tau tagata taane ia? Ke he tohi Heleni fakamua, nakai ui he Tohi Tapu a lautolu ko e tau patuiki po ke tau tagata pulotu. Ko lautolu ko e tau makoi, po ke tau tagata kitekite aolagi. Ko lautolu ko e tau tagata taute mooli he tau taofiaga pouliuli hagaao ke he taulatua ne fakavē ke he tau fetu. Kua nakai fakakite mai he fakamauaga he Tohi Tapu e tau higoa mo e numera he tau tagata ahiahi atu.

Uaaki, mogo fe ne ahiahi atu e tau tagata taane ia? Nakai he mogo ne mukemuke a Iesu he fale povi. Iloa fēfē e tautolu e mena ia? Ko e tagata tohia he Evagelia ko Mataio ne pehē: “Kua huhū atu a lautolu ki fale; kua kitia ai e lautolu e tama tote fakalataha mo Maria hana matua fifine.” (Mataio 2:11) Mailoga la nakai tama mukemuke fanau foou agaia a Iesu, ka ko e “tama tote.” Kua nakai liu a Maria mo Iosefa ke momohe he fale ne toka ai e tau manu; ka kua nonofo a lautolu he fale he mogoia.

Toluaki, ko hai ne fakafano atu e “fetu” ia ke takitaki e tau tagata kitekite ke he tau aolagi? Ne fa mahani e tau takitaki lotu ke fakaako ko e Atua ne fakafano atu e “fetu.” Ko ia mooli kia? Manatu, mena nakai takitaki mua he “fetu” e tau tagata kitekite ke he tau aolagi ki Petelehema. Ka e takitaki atu ai a lautolu ke he Patuiki ko Herota i Ierusalema. Ne fakakite e lautolu ke he tagata kelipopo tagata ia ne mahekeheke mo e maō lahi kua fanau tuai a Iesu ti age foki e kakano malolō ke vihiatia e tama ka eke mo “patuiki he tau tagata Iutaia.” (Mataio 2:2) He taute lagatau, ne tala age a Herota ki a lautolu ke liliu age ke talahau ki a ia e matakavi tonu ne ha ha ai e tama nei, he pehē kua manako a ia ke fakaheke foki e tama. Ati takitaki mogoia he “fetu” e tau tagata kitekite ke he tau aolagi ki a Iosefa mo Maria. Ti o atu ai e tau tagata kitekite ke he tau aolagi ke he puhala ne liga fakamahaikava e tama tote ane mai nakai fakalago mai e Atua. Fiafia ai, kua fakalago mai a Ia. Ne ita lahi a Herota he mogo ne nakai fai tala ne liuaki mai he tau tagata kitekite ke he tau aolagi ki a ia, ti poaki e ia ke tamate e tau tama taane ikiiki oti ne ua mo e ki lalo hifo e tau tau he moui ne nonofo ai mo e viko takai i Petelehema.—Mataio 2:16.

Ne hagaao a Iehova ki a Iesu he mogo fakamui ko e “haku a tama fakahele hanā, kua fiafia na au kia ia.” (Mataio 3:17) Manamanatu: To fifili kia he Matua tututonu e tau tagata pouliuli ne kitekite ke he tau aolagi—ne taute e tau lagatau taulatua ne nakai fakagofua he Fakatufono haana—mo tau fekafekau haana? (Teutaronome 18:10) To fakaaoga kia e ia e fetu ke takitaki a lautolu ke he tagata kelipopo tagata ne mua atu e hagahagakelea mo e malolō he motu, ne lago mooli e fekau ne fakaohooho e vihiatia mahekeheke ha Herota? To fakaaoga foki kia he Atua e fetu ia mo e tau tagata kitekite ke he tau aolagi ke fakakite e matakavi ne takoto e tama taane tote lahi?

Ke fakatai: Kua fakafano atu he takitaki kautau mitaki e kautau makaka lahi haana ke he matagahua hagahagakelea he matakavi he fī. To fakakite kia e ia ke he fī e matakavi he kautau ia? Nakai pihia! Tatai foki, na fakafano mai e Iehova e Tama haana ke he lalolagi hagahagakelea nei. To fakakite age kia e ia ke he patuiki kelea ko Herota e matakavi kua takoto ai e Tama Haana ko e tama tote lolelole? Nakai fakaai!

Ko hai mogoia ne fakafano atu e “fetu,” po ke mena ne tuga e fetu? Ko hai ne fiafia lahi mahaki ke kitia e tama tote ko Iesu ka kelipopo, ke taofi a ia neke lahi ti fakamooli e matagahua haana he lalolagi? Ko hai ne lali ke fakahehē e tau tagata mo e fakalaulahi e tau fakavai, mo e favale, mo e kelipopo tagata? Ne fakakite e Iesu ko ia nei “ko e pikopiko a ia, mo e matua he pikopiko,” ko ia ko e “keli tagata a ia tali mai he kamataaga”—ko Satani ko e Tiapolo.—Ioane 8:44.