Kua Fakaata Nakai e Koe e Lilifu ha Iehova?
‘Ko tautolu kua fakaata ke he lilifu ha Iehova.’—2 KORI. 3:18.
TO TALI FĒFĒ E KOE?
Pete e tuaga agahala ha tautolu, maeke fēfē a tautolu ke fakalilifu a Iehova?
Maeke fēfē e tau liogi mo e ha ha i ai ha tautolu ke he tau feleveiaaga faka-Kerisiano ke lagomatai a tautolu ke fakaheke e lilifu he Atua?
Ko e heigoa ka lagomatai a tautolu ke fakatumau ke fakalilifu a Iehova?
1, 2. Ko e ha kua iloilo a tautolu ke amanaki ke fifitaki e tau mahani a Iehova?
KE HE taha puhala ni, kua tatai oti a tautolu mo e tau mamatua ha tautolu. Ko e mena ia, kua nakai ofo ke logona e taha ne pehē ke he tama taane, ‘Tatai ni a koe mo e matua taane haau.’ Liga tala age ke he tama fifine, ‘Manatu e au e matua fifine haau ia koe.’ Ti fa fifitaki he tau tama e tau mena ne kitia e lautolu he tau matua ha lautolu. Ka e kua a tautolu? Maeke nakai a tautolu ke fifitaki ha tautolu a Matua he lagi, ko Iehova? Pete ne nakai kitia e tautolu a ia, maeke a tautolu ke moua e tau mahani uho haana he fakaako e haana Kupu, he manamanatu ke he tau tufugatiaaga, mo e manamanatu fakahokulo ke he tau Tohiaga Tapu mo e mua atu ke he tau kupu mo e tau gahua he Tama he Atua, ko Iesu Keriso. (Ioane 1:18; Roma 1:20) Kua maeke ia tautolu ke fakaata e lilifu a Iehova.
2 Ato tufuga a Atamu mo Eva, ne mauokafua e Atua to maeke a ia ke taute e finagalo ma laua, fakaata e tau mahani haana, mo e tamai ki a ia e fakahekeaga. (Totou Kenese 1:26, 27.) He taute e mahani faka-Atua, kua lata ia tautolu ke fakatātā e tau mahani Haana ne tufuga a tautolu. Ka taute pihia e tautolu, kua moua e tautolu e kotofaaga monuina he fakaata e lilifu he Atua pete ne aga motu ha tautolu, fakaakoaga ha tautolu, po ke feakiaga he lanu ha tautolu. Ko e ha? Kakano kua “nakai fakamailoga tagata e Atua. Ka ko e tau tagata he tau motu oti kana ne matakutaku kia ia mo e mahani tututonu, kua talia ai e ia.”—Gahua 10:34, 35.
3. Ko e heigoa e tau logonaaga ka moua he tau Kerisiano he fekafekau a lautolu ki a Iehova?
3 Ko e tau Kerisiano fakauku ne fakaata e lilifu a Iehova. Ko e mena ia ko e aposetolo ko Paulo ne fakauku he agaaga ne tohi: “Ka ko tautolu oti, kua kitekite ke he fakaata mo e mata nakai ufia ke he lilifu he Iki [Iehova], kua faliu a tautolu mo e fakatino na, ko e lilifu ke hoko ke he lilifu.” (2 Kori. 3:18) He hifo mai e perofeta ko Mose mai he Mouga ko Sinai mo e tau lapamaka ne toka ai e Tau Fakatufono Hogofulu, kua kikila e fofoga haana ha kua vagahau a Iehova mo ia. (Esoto 34:29, 30) Pete ne nakai tupu e mena ia ke he tau Kerisiano ti nakai kikila e tau fofoga ha lautolu, kua matala a lautolu ke he fiafia he tala age ke he falu hagaao ki a Iehova, haana tau mahani, mo e finagalo homo ue atu haana ma e tau tagata. Tuga e tau fakaata lapatoa ne kikila he tau vahā i tuai, ko lautolu ne fakauku mo e tau hoa he lalolagi ha lautolu kua fakaata e lilifu a Iehova ke he tau momoui mo e fekafekauaga ha lautolu. (2 Kori. 4:1) Kua fakaata nakai e koe e lilifu a Iehova he haau a mahani Atua mo e he gahua haau ko e tagata fakailoa tumau he Kautu?
MANAKO A TAUTOLU KE FAKAATA E LILIFU A IEHOVA
4, 5. (a) Tuga a Paulo, ko e heigoa e taufetului kua moua e tautolu? (e) Lauia fēfē a tautolu he agahala?
4 Ha ko e tau fekafekau a Iehova, kua manako mooli a tautolu ke fakalilifu mo e fakaheke ha tautolu a Tufuga he tau mena oti ne taute e tautolu. Ka e fa mahani ai, ko e tau mena ne manako a tautolu ke taute kua nakai taute e tautolu. Ne taufetului a Paulo mo e lekua fakatagata haana. (Totou Roma 7:21-25.) He fakamaama e kakano kua taufetului pihia a tautolu, ne tohi e Paulo: “Nukua hala e tau tagata oti kana, to nakai hoko ke he fakahekeaga mai he Atua.” (Roma 3:23) E, mai he tufaaga he agahala a Atamu, ne lauia e tau tagata ke he pule vale he Patuiki Agahala.—Roma 5:12; 6:12.
5 Ko e heigoa e agahala? Ko e ha mena ne totoko ke he aga, tau puhala, tau tuaga, mo e finagalo a Iehova. Kua moumou he agahala e fakafetuiaga he tagata mo e Atua. Kua fakatupu he agahala a tautolu ke nakai hokotia ke he katoatoaaga, tuga ni e tagata fana fiti ka fana e matatao ka e nakai lautonu e mena ne fana ki ai. Maeke a tautolu ke agahala he taute pauaki po ke kua hehē ai. (Nume. 15:27-31) Ko e agahala ne lauia lahi mahaki e tau tagata mo e taute e kaupāaga he vahāloto ha lautolu mo e ha lautolu a Tufuga. (Sala. 51:5; Isaia 59:2; Kolo. 1:21) Ti ko e tau tagata tokologa kua nakai lagotatai katoatoa mo Iehova ti nakai hokotia ke he magaaho uho ke fakaata e lilifu he Atua. Nakai fakauaua, ko e agahala kua mua ue atu e kelea ne kua lauia lahi e tau tagata.
6. Pete ne tuaga agahala ha tautolu, maeke fēfē a tautolu ke fakalilifu e Atua?
6 Pete ne tuaga agahala ha tautolu, kua eke a Iehova mo ‘Atua hana e amaamanaki.’ (Roma 15:13) Ne foaki e ia e tau puhala ke utakehe e agahala—ko e poa lukutoto ha Iesu Keriso. He fakagahuahua e tua ke he poa ia, kua nakai ‘fakatupatupa a tautolu ke he hala,’ ka ko tautolu he tuaga ke fakaata e lilifu a Iehova. (Roma 5:19; 6:6; Ioane 3:16) He fakatumau e fakafetuiaga talia nei mo e Atua kua mavehe mai ai e monuina ha Iehova ki a tautolu mogonei ti pihia mo e tau aoga he mitaki katoatoa mo e moui tukulagi anoiha. Pete ni ko e tau tagata agahala agaia a tautolu, ko e monuina mooli ke onoono mai e Atua ki a tautolu takitaha kua maeke ke fakaata e lilifu haana!
FAKAATA E LILIFU HE ATUA
7. Ko e heigoa kua latatonu ke fakakite aki a tautolu ke maeke ke fakaata e lilifu he Atua?
7 Ke ha ha he tuaga mitaki ke fakaata e lilifu he Atua, lata ia tautolu ke mailoga fakamooli e tau tuaga agahala ha tautolu. (2 Nofo. 6:36) Kua lata a tautolu ke fakakite e tau fatuakiloto agahala ha tautolu ti gahua ke tautaofi ai ke maeke a tautolu ke holo ki mua ke hokotia ke fakaheke mooli e Atua. Ma e fakatai, ka mokulu a tautolu ke he agahala kelea muitui he kitekite ke he tau ata telefua, kua lata ia tautolu ke fehagai mo e manatu kua latatonu a tautolu ke moua e lagomatai fakaagaaga—ti taute taha mena ke moua ai. (Iako. 5:14, 15) Ko e lakaaga fakamua anei ke taute he gahua ke moua e moui kua fakaheke katoa e Atua. Ha ko e tau tagata tapuaki ha Iehova, kua latatonu a tautolu ke kumikumi tumau ke mailoga kua fakatatau mooli a tautolu ke he tau tuaga tututonu haana. (Fakatai 28:18; 1 Kori. 10:12) Ko e heigoa ni e tau tuaga agahala ha tautolu, kua latatonu ia tautolu ke tautaofi ai ke maeke a tautolu ke fakaheke e lilifu he Atua.
8. Pete he hepehepe a tautolu, ko e heigoa kua lata ke taute e tautolu?
8 Ko Iesu ni e tagata ne moui mo e mate ka e nakai kaumahala ke fakafiafia e Atua mo e fakaata Haana a lilifu. Pete kua hepehepe a tautolu, nakai tatai ai mo Iesu, kua maeke ti lata ia tautolu ke eketaha ke muitua e fifitakiaga haana. (1 Pete. 2:21) Kua fuafua e Iehova e laliaga ne foaki e tautolu fakalataha mo e holo ki mua ne taute e tautolu, ti fakamonuina e ia e eketaha fakamakamaka ha tautolu ke fakalilifu a ia.
9. Ko e heigoa e matagahua ne taute he Tohi Tapu ke he tau momoui he tau Kerisiano kua manako ke fakalautatai mo e tau poakiaga he Atua?
9 Ko e Kupu tohia a Iehova ka fakakikila e puhala ma tautolu ke holo ki mua. Ko e kumikumi fakamatafeiga ke he tau Tohiaga Tapu mo e manamanatu fakahokulo ke he totouaga he Tohi Tapu kua aoga lahi. (Sala. 1:1-3) Ko e totou e tau Tohiaga Tapu he tau aho takitaha ka lagomatai a tautolu ke holo ki mua. (Totou Iakopo 1:22-25.) Ko e iloilo ke he Tohi Tapu ko e fakavēaga ma e tua ha tautolu mo e tau puhala he fakamalolō e fifiliaga ha tautolu ke kalo mai he agahala kelea lahi mahaki mo e ke fakafiafia a Iehova.—Sala. 119:11, 47, 48.
10. Maeke fēfē e liogi ke lagomatai a tautolu ke fekafekau fakalahi ki a Iehova?
10 Ke fakaata e lilifu he Atua, kua lata foki ia tautolu ke “fakamakamaka ke he liogi.” (Roma 12:12) Maeke mo e kua lata a tautolu ke liogi ke lagomatai e Iehova a tautolu ke fekafekau ki a ia he puhala kua talia. Ke he fakahikuaga ia, maeke a tautolu ke ole fakatonu ki a ia ma e agaaga tapu, ma e lahi he tua, ma e malolō ke totoko e kamatamata, mo e lotomatala ke “fakatokatoka fakahako e kupu moli.” (2 Timo. 2:15; Mata. 6:13; Luka 11:13; 17:5) He falanaki e tama ke he matua taane haana, ti kua lata ia tautolu ke falanaki ke he ha tautolu a Matua he lagi ko Iehova. Ka ole a tautolu ki a ia ke lagomatai a tautolu ke fekafekau fakalahi ki a ia, maeke a tautolu ke mauokafua to taute pihia e ia. Kia nakai logona hifo e tautolu kua fakatauhele e tautolu a ia! Ka e, he liogi kua lata ia tautolu ke fakaheke a ia, fakaaue ki a ia, kumi e takitakiaga haana, mua atu i lalo he kamatamata, ti ole ki a ia ke lagomatai a tautolu ke fekafekau ki a ia he tau puhala kua fakalilifu e higoa tapu haana.—Sala. 86:12; Iako. 1:5-7.
11. Lagomatai fēfē he tau feleveiaaga fakapotopotoaga a tautolu ke fakaata e lilifu he Atua?
11 Ne tuku atu he Atua e levekiaga he tau mamoe uho haana ke he “fekafekau fakamoli mo e loto matala.” (Mata. 24:45-47; Sala. 100:3) Ko e vahega fekafekau kua fiafia lahi ke he puhala kua fakaata he tau matakainaga Kerisiano e lilifu a Iehova. Ko e foliga ha tautolu ko e tau fekafekau Kerisiano kua hikihiki he tau feleveiaaga ha tautolu, tuga ni he liga hikihiki he tagata tuitui e tau mena tui ha tautolu ke maeke ke mitaki e onoonoaga ha tautolu. (Hepe. 10:24, 25) Ko e mena ia kia hohoko tuai atu, kaeke ke fakamahani a tautolu ke hohoko mule, to tonoa e tautolu falu ‘hikihikiaga’ fakaagaaga kua lata ke fakaholo ki mua e foliga ha tautolu ko e tau fekafekau ha Iehova.
KIA FIFITAKI A TAUTOLU KE HE ATUA
12. Maeke fēfē a tautolu ke fifitaki e Atua?
12 Ka fakaata e tautolu e lilifu a Iehova, kua latatonu ke ‘fifitaki a tautolu ke he Atua.’ (Efeso 5:1) Taha puhala ke fifitaki a Iehova ko e moua e onoonoaga haana hagaao ke he tau matakupu. He eketaha ke momoui ke he falu puhala ne nakai fakalilifu a ia mo e fakahagahaga kelea ki a tautolu. Ha ko e lalolagi ne takatakai a tautolu kua ha ha he fakaohoohoaga haana ne mahani kelea ko Satani ko e Tiapolo, kua latatonu ia tautolu ke gahua fakamalolō ke vihiatia e tau mena ne vihiatia e Iehova mo e fakaalofa hokulo ke he tau mena ne fakaalofa a Ia ki ai. (Sala. 97:10; 1 Ioa. 5:19) Kua lata ia tautolu ke fifili mai he loto ko e puhala tonu ni ke fekafekau e Atua ko e taute e tau mena oti kana ke he lilifu haana.—Totou 1 Korinito 10:31.
13. Ko e ha kua lata ia tautolu ke vihiatia e agahala, ti ko e heigoa ka omoomoi a tautolu ke taute?
13 Kua vihiatia e Iehova e agahala, ti kua lata foki ia tautolu. Mooli, kua lata ia tautolu ke fakamamao ligo mai he taute e tau mena hepe mo e nakai lali ke tata a tautolu ke he mena hepe ka e nakai agahala. Tuga anei, kua lata ia tautolu ke puipui mai he mokulu ke he tiaki taofiaga, ko e agahala ka taute a tautolu ke nakai lata ke fakalilifu e Atua. (Teu. 13:6-9) Ko e mena ia kia nakai fai mena a tautolu ke taute mo e tau tagata tiaki taofiaga po ke ha tagata kua talahau ke eke mo matakainaga ka e nakai fakalilifu e Atua. Kua lata foki e mena nei kaeke ko e tagata he magafaoa. (1 Kori. 5:11) Nakai aoga ki a tautolu he lali ke fakaheu e tau totokoaga he tau tagata tiaki taofiaga po ko lautolu kua tuhituhi ke he fakatokatokaaga ha Iehova. Ti kua hagahaga kelea fakaagaaga mo e nakai tonu ke fakakiakia ke he tau vala tala ha lautolu, pete kua tohi po ke kua moua ke he Internet.—Totou Isaia 5:20; Mataio 7:6.
14. He gahua ke fakaata e lilifu he Atua, ko e heigoa e mahani kua lata ke maaliali ki a tautolu, ti ko e ha?
14 He fakatātā e fakaalofa ko e puhala mua ue atu ma tautolu ke fifitaki ha tautolu a Matua he lagi. E, tuga a ia kua lata a tautolu ke fakaalofa. (1 Ioa. 4:16-19) Ti ko e fakaalofa ne ha ha ia tautolu kua fakakite ko tautolu ko e tau tutaki ha Iesu mo e tau fekafekau ha Iehova. (Ioane 13:34, 35) Pete ne tuaga agahala ne moua pauaki e tautolu ne liga fakatauhele he falu a magaaho, kua latatonu ia tautolu ke tuku he mafoa mo e eketaha ke fakaalofa he tau magaaho oti kana. He feaki e fakaalofa mo e falu mahani Atua foki ka puipui a tautolu mai he tau mena nakai totonu mo e agahala.—2 Pete. 1:5-7.
15. Maeke fēfē e fakaalofa ke lauia e fakafetuiaga ha tautolu mo e falu?
15 Kua fakaohooho he fakaalofa a tautolu ke manako ke taute e tau mena mitaki ma e falu tagata. (Roma 13:8-10) Ma e fakatai, ko e fakaalofa ke he hoa ha tautolu ka fakatumau e mohega he fakamauaga ke meā he kelea. Ko e fakaalofa ke he tau motua, fakalataha mo e fakalilifu ke he tau gahua ha lautolu, ka lagomatai a tautolu ke omaoma mo e muitua ke he tau takitakiaga ha lautolu. Ko e tau fanau kua fakaalofa ke he tau matua ha lautolu kua omaoma mo e fakalilifu a lautolu mo e nakai vagahau kelea hagaao ki a lautolu. Ka fakaalofa a tautolu ke he tau tagata, to nakai onoono hifo a tautolu ki a lautolu po ke vagahau nakai fakalilifu ki a lautolu. (Iako. 3:9) Ko e tau motua ne fakaalofa ke he tau mamoe he Atua to taute a lautolu mo e fakaalofa.—Gahua 20:28, 29.
16. To lagomatai fēfē a tautolu ke fakakite e fakaalofa he ha tautolu a gahua he fonua?
16 Ko e tuaga he fakaalofa kua lata foki ke maaliali ke he ha tautolu a gahua he fonua. Ha ko e fakaalofa mua ue atu ha tautolu ki a Iehova, to nakai fakaatā e tautolu a tautolu ke maueue he mahani fakateaga po ke tali kelea he falu tagata he kaina. Ka e, to fakatumau a tautolu ke fakamatala e tala mitaki. To fakalagalaga he fakaalofa a tautolu ke mautauteute mitaki mo e lali ke lauia lahi ke he gahua he fonua. Ka fakaalofa mooli a tautolu ke he Atua mo e ha tautolu a katofia, to nakai onoono a tautolu ke he gahua fakamatala he Kautu ko e matagahua. Ka to manamanatu a tautolu ke he monuina lahi ia mo e to taute fiafia ai e tautolu.—Mata. 10:7.
FAKATUMAU KE FAKALILIFU A IEHOVA
17. Ko e ha kua aoga a tautolu mai he fakakite kua nakai hoko a tautolu ke he lilifu he Atua?
17 Kua nakai fai logonaaga e laulahi he lalolagi ke he hagahagakelea he agahala, ka e maeke a tautolu. Kua taute he mena nei a tautolu ke mataala ke he lata ke totoko ke he tau fatuakiloto agahala ha tautolu. He fakakite e tuaga agahala ha tautolu kua fakaatā a tautolu ke fakamahani e tau loto manamanatu ha tautolu ke maeke a tautolu ke omoomoi ke mahani tonu ka fakalagā e agahala ke kamata ke tupu he tau manamanatuaga mo e tau loto ha tautolu. (Roma 7:22, 23) Mooli, liga lolelole a tautolu, ka e maeke he Atua ke fakamalolō a tautolu ke taute e mena kua hako ke he ha tuaga.—2 Kori. 12:10.
18, 19. (a) Ko e heigoa ka fakamalolō a tautolu ke kautū ke he totokoaga ha tautolu ke he tau matakau agaaga kelea? (e) Ko e heigoa kua lata ke fifili a tautolu ki ai?
18 Ka fakaheke e tautolu a Iehova, kua latatonu a tautolu ke totoko foki e tau matakau agaaga kelea. Ko e tapulu tau fakaagaaga ne foaki he Atua kua fakamalolō a tautolu ke taute mo e kautū e mena nei. (Efeso 6:11-13) Nakai oti e tau laliaga ha Satani ke fofō a Iehova he lilifu kua lata tokotaha a Ia ke moua. Kua matutaki foki e Tiapolo ke taute e tau laliaga oti ke moumou e fakafetuiaga ha tautolu mo Iehova. Ka ko e kelea ha ia ki a Satani ka fakatumau a tautolu mo e tau miliona foki he tau tagata taane, tau fifine, mo e tau fanau nakai mitaki katoatoa ke mahani fakamooli mo e fakaheke e Atua! Ko e mena ia, kia matutaki a tautolu ke fakalilifu a Iehova, tuga e tau mena momoui he lagi ne fakailoa: “Ko e Iki [Iehova] na e, kua lata ni a koe ke tuku atu ki ai e fakahekeaga, mo e lilifu, mo e malolo; ha kua eke e koe e tau mena oti, ha ko e hau a finagalo foki ne ha ha i ai a lautolu, mo e eke ai a lautolu.”—Fakakite. 4:11.
19 Kia eke mo fifiliaga ha tautolu ke fakatumau e fakaheke ki a Iehova, pete ne mena ka tupu. Kua fiafia mooli a ia ke he tau tagata tokologa ne mahani fakamooli hane taute e tau mena oti ke fifitaki a ia mo e fakaata e lilifu haana. (Fakatai 27:11) Kia tatai e tau logonaaga ha tautolu tuga ha Tavita, ne lologo: “[Iehova] na e, haku Atua, to fakaaue atu au kia koe mo e haku a loto katoa, to fakalilifu tukulagi e au hāu a higoa.” (Sala. 86:12) Ko e manako mooli ha tautolu ke he taha aho ka fakaata e tautolu e lilifu ha Iehova ke he puhala mitaki katoatoa mo e maeke ke fakaheke a ia tukulagi! To moua he tau tagata omaoma nei e fiafia. Kua fakaata nakai e koe e lilifu ha Iehova ko e Atua mogonei, mo e amaamanakiaga ke taute pihia tukulagi tukumuitea?
[Tau Fakatino he lau 27]
Kua fakaata nakai e koe e lilifu a Iehova ke he tau puhala nei?