“Mena Galo” ne Ako Mai he Fekafekauaga Tapu ha Maua

Ne talahau e Olivier Randriamora

“Kua iloa e au e nofogati, kua iloa foki e au e muhu mena; ko e tau mena oti ke nofo ai au, mo e tau mena oti ke hoko mai ai kia au, kua ako ai au [e “mena galo,” NW] kia makona mo e hoge, kia muhu mena mo e nofogati. Kua maeke ia au e tau mena oti kana ke he fakamalolo mai [a Ia] kia au.”—Filipi 4:12, 13.

KO E tau kupu nei he aposetolo ko Paulo ne kua leva tuai e aoga lahi ki a au mo e hoana haaku ko Oly. Tuga a Paulo, ne ako e maua e “mena galo” he falanaki katoatoa ki a Iehova he fekafekau ki a Ia i Matakasa.

He kamata e Tau Fakamoli a Iehova ke fakaako e Tohi Tapu mo e matua fifine ha Oly he 1982, ne fitā e toka mama a maua mo Oly ke mau. Ne talia foki e au e fakaako Tohi Tapu, ti fakalataha mai a Oly he mogo fakamui. Ne mau a maua he 1983, papatiso he 1985, ti kamata agataha ke paionia fakakū. Ia Iulai 1986, ne eke a maua mo tau paionia tumau.

Ia Sepetema 1987, ne kamata a maua ke fekafekau ko e tau paionia pauaki. Ko e kotofaaga fakamua ha maua ko e taone tote he faahi tokelau ki lalo i Matakasa, ne nakaila fai fakapotopotoaga ia. Kua kavi ke he 18 e matakau lalahi fakamotu ti loga foki e tau magafaoa i Matakasa, mo e kehekehe lahi mahaki e tau mahani mo e tau aga fakamotu. Ko e Malagasy e vagahau pauaki, ka e loga foki e tau puhala vagahau kehekehe i ai. Ti kamata a maua ke fakaako e vagahau ne fakaaoga he matakavi he kotofaaga foou ha maua, ti lagomatai he mena ia e maaga ke talia fiafia a maua.

He kamataaga, ne taute e au e lauga ma e tau tagata oti he tau Aho Tapu takitaha, ti ka oti ai ne patipati tumau a Oly. Ko maua tokoua ni i ai. Ne taute foki e maua e fakaholoaga katoa he Aoga Fekafekau Fakateokarasi, mo e fakaaoga e Oly e tagata fakataitai he kaina. Ko e fiafia ha ia ha maua ke he pulega totonu he leveki takaiaga ne ahiahi mai ke hikihiki e maua e tau feleveiaaga!

Ha kua nakai mitaki tumau e puhala moua he tau meli, ne nakai moua tumau e maua e tupe lagomatai ha maua he mahina. Ti iloa e maua ke nakai lahi e tau mena fakatino. He taha mogo, ne nakai lahi e tupe ha maua ma e puhala pasi ke fakalataha atu ke he toloaga takaiaga, ne fakahoko kavi ke he 130 e kilomita he mamao. Ne manatu e maua e falu fakatonuaga mitaki mai he matakainaga Fakamoli: “Tala age ki a Iehova e tau lekua ha mua. Ha ko e gahua haana kua taute e mua.” Ti liogi a maua mo e fifili ke ō hui. Ato ō a maua, ne ahiahi fakaofo mai e matakainaga taane ki a maua ti mai ai e mena fakaalofa tupe—kua latatonu ni ma e puhala pasi ha maua!

GAHUA TAKAIAGA

Ia Fepuari 1991, ne kotofa au ke eke mo leveki takaiaga. He mogoia, ko e matakau tote ha mautolu kua hoko tuai ke he 9 e tagata fakailoa, 3 kua papatiso, ti ko e evalesi he tau tagata ne fakalataha mai ke he tau feleveiaaga ko e 50. He mole e fakamahani, ne ahiahi atu a maua ke he takaiaga he maaga lahi ko Antananarivo. He 1993, ne hiki e kotofaaga ha maua ke he takaiaga he faahi uta he motu. Ne kehe mamao e tau puhala moui i ai ka fakatatai ke he taone.

Ke hoko ke he tau fakapotopotoaga mo e tau matakau mamao, ne ō hui a maua he falu magaaho ke kavi 145 e kilomita he tau mouga ne lahi e vao uhi. Ne nakai fakamamafa lahi e maua e tau katoleta ha maua. Mooli ai, ka putoia ke he lauga he leveki takaiaga e tau fakatātāaga ata hulu, ko e mena fa taute ai he magahala ia, kua mamafa e tau koloa ha maua. Ne uta e Oly e kifaga hulu, ka e uta e au e puha hila motokā ne 12 e malolō.

Ne fa ō a maua ke 40 e kilomita he aho ke hohoko ke he taha fakapotopotoaga. He o atu he hala, ne o hake mo e o hifo a maua he tau hala he mouga, ō he tau vaitafe, mo e he tau pelapela. He falu magaaho, ne momohe a maua he kauhala puhalatū, ka e fa lali a maua ke kumi e maaga ke maeke a maua ke moua taha mena ke momohe ka pō. Falu magaaho ne ole a maua ke he tau tagata kehe ke nonofo a maua mo lautolu he pō. He moua e mena ke nonofo ai, ne kamata a maua ke tunu e mena kai. Ne ole a Oly ke fakaaoga e ulo mo e fina atu ke he vaitafe po ke vainamo ne tata mai ke ahu vai. He magaaho ia foki, ne ole e au e toki ke tipi aki e tau gaafi mo kaitunu. Ne fai magaaho e tau mena oti ke taute. Fa lavea a maua ke fakatau e moa moui, ti tamate ni e maua mo e fakameā.

He oti e kai, ne liu a maua ahu vai foki mo koukou. Ne momohe a maua he falu mogo he peito. Ka uha, liga momohe a maua he fakapepeei ke he kaupā, he lali ke mōmō neke pala he tutulu e tuafale.

Ne lali tumau a maua ke fakamatala ke he tau tagata leveki ha maua. Ka hohoko a maua ke he matakavi ne o ki ai, ko e totonu mo e fakamokoi he tau matakainaga Kerisiano ha maua kua ofoofogia. Ko e loto fakaaue lahi ha lautolu ma e ahiahi ha maua ne mua hake ke he nakai tokotoko mitaki ne logona e maua he fenoga.

He nonofo he kaina he tau matakainaga Fakamoli, ne fiafia a maua ke lagomatai a lautolu ke he tau gahua fakakaina. Ko e mena nei, to atā mogoia a lautolu ke fakatauō mo maua he gahua he fonua. Ne nakai amanaki a maua ke he tau mena hagahaga mitaki po ke tau mena kai pauaki, ne nakai maeke e tau tagata leveki ha maua ke moua.

AHIAHI ATU KE HE TAU MATAKAU MAMAO

Ne fiafia a maua he ahiahi e tau matakau mamao, ti kua tuku mai he tau matakainaga ki a maua e fakaholoaga ne loga e tau matagahua. Ne lavea a maua ke “okioki fakatote.” (Mare. 6:31) He taha matakavi, ne uiina oti he hoa Fakamoli e ha laua a tau fakaako Tohi Tapu—toko 40 a lautolu—ke he kaina ha laua ke maeke a maua ke fai vala he fakaakoaga ha lautolu. Ne fakalataha a Oly mo e matakainaga fifine ne taute kavi ke he 20 e fakaakoaga, mo e fakalataha au mo e matakainaga taane ke lata mo e toko 20 foki. He oti e fakaako mo e taha tagata fakaako, ne kamata foki taha he mogoia ni. He taha vala he aho, ne okioki a mautolu ke taute e tau feleveiaaga he fakapotopotoaga, ka mole ia ti liu e tau fakaako Tohi Tapu ke kamata foki. Ko e malafoni he aho ne fa oti he matahola valu he afiafi!

He ahiahi atu a mautolu ke he taha matakau, ne o atu a mautolu oti ke he maaga ne tata mai he kavi matahola valu he mogo pogipogi. Ne tui oti a mautolu he tau mena tui tuai. He mole e fenoga loa he vaouhi, ne hohoko atu a mautolu ke he matakavi he liga pale laā. Ne tui e mautolu e tau mena tui meā ti kamata agataha ke fakamatala mai he taha fale ke he taha fale. Ne gahoa e kaina ka e tokologa e tau tagata fakailoa. Ne taute e mautolu e matakavi katoa ia he kavi ke he 30 e minuti. Ti o atu mogoia a mautolu ke he taha maaga foki. Kua oti e fakamatala i ai, ne hahaga atu ai a mautolu ke liliu ki kaina he fenoga loa. He magaaho fakamua, ko e puhala nei ne fakalolelole fakatote ki a mautolu. Kua lahi e magaaho mo e gahua ka e kavi ke he taha ni e tulā ne gahua he taha fale ke he taha fale. Pete ia, ne nakai gugū e Tau Fakamoli he matakavi. Ne tumau e hakahakau ha lautolu.

Taha e matakavi mamao i Taviranambo ne tata ke he tapunu mouga. Ne moua e mautolu i ai taha e magafaoa Fakamoli ne nonofo he fale ne taha e poko. Ko e taha fale he tapa ia ni ko e matakavi ma e feleveiaaga. Ne amanaki e tagata leveki ha mautolu ti hea fakatutū, “Tau Matakainaga!” Ne tali mai he taha tapunu mouga, “Oi!” Ne liu e tagata leveki ha mautolu hea foki, “Kua hoko mai tuai e leveki takaiaga!” Ko e tali, “E!” Ne tuga kua fakapuloa atu ni e fekau ke he falu ne mamao ligo atu foki. Nakai leva ti kamata e tau tagata ke fakapotopoto mai, ti magaaho ne kamata e feleveiaaga, kua molea e 100 ne fakalataha mai.

TAU PALEKO HE Ō FENOGA

He 1996 ne liu hiki e kotofaaga ha maua ke he takaiaga ne tata lahi ki Antananarivo, ko e lotouho he tau kaukau mouga. Ne ha ha foki he takaiaga nei e tau paleko kehe lahi foki. Ne nakai fai puhala ō fenoga ne holo tumau ke he tau matakavi he tau maaga tua. Ne fakatoka a maua ke ahiahi e matakavi i Beankàna (Besakay), kavi ke he 240 e kilomita mai i Antananarivo. He oti e fetutalaaki mo e tagata fakaholo, ne heke a maua he tulaki tote ne gutu atu ke he matakavi ia. Ne liga 30 foki e tagata ō fenoga i loto mo e i fafo he tulaki, falu kua tatakoto i luga he tuafale mo e falu kua gega i tua.

Tuga ni he fa tupu, ne nakai leva ti malona e tulaki, ti matutaki atu a mautolu he ō hui. He loga e tulā ne ō a mautolu he fenoga uka, ne hau e tulaki lahi. Kua fitā he tokologa e tagata mo e tau koloa i ai, ka e tū agaia ni e tagata fakaholo. Ne heheke a maua, ti tutū ni. Fai magaaho, ne hohoko a mautolu ke he vaitafe, ka kua nakaila oti e fakafoou he hala laupapa. Ne liu foki a maua ō hui ti fakahiku ai ne hohoko ke he maaga tote ne nonofo ai e falu paionia pauaki. Pete he nakai fakatoka ma e ha ahiahi, ne fakaaoga e maua e magaaho ke fakamatala mo laua he leo ke mau e hala laupapa mo e ke hau ai taha peleōafi.

Taha e faahi tapu he mole ato fai peleōafi ne hau, ti matutaki e fenoga ha maua. Loga e tau pokoluo lalahi he puhalatū. Ne lagaloga e lagomatai e maua ke poka e peleōafi he vai he hoko hake ke he tau matatuli, ne fa taututupe mo e veveli he mogo ka poka ai. He tau tulā he pogipogi kī, ne hohoko atu a maua ke he maaga tote ti hohopo mogoia a maua. He toka e puhalatū lahi, ne matutaki a maua ke ō hui he tau ulu alaisi, ne hake e vai pelapela ti hoko ke he kupu manava, he o atu ke he matakavi ha maua.

Ko e ahiahi atu fakamua a ia ha maua ke he matakavi ia, ti fifili a maua ke fakamatala ke he falu ne gahua he tau ulu alaisi mo e hūhū ko e nonofo i fe e tau Fakamoli he matakavi ia. Ko e fiafia ha ia ha maua ke iloa ko e tau tagata gahua ia, ko e tau matakainaga fakaagaaga ha maua!

FAKAMALOLŌ E FALU KE HŪ ATU KE HE FEKAFEKAUAGA MAU

Ke he tau tau kua mole, kua fiafia lahi a maua ke kitia e tau fua he fakamalolō e falu ke hū atu ke he fekafekauaga mau. He ahiahi atu ke he taha fakapotopotoaga ne hiva e paionia, ne fakamalolō e maua e tau paionia takitaha ke fakatoka e foliaga ke igatia mo e lagomatai ke taha e tagata fakailoa ke hū atu ke he gahua paionia. He ahiahi atu a maua he ono e mahina he mole, kua malagaki hake e numera he tau paionia tumau ke he 22. Tokoua e matakainaga fifine paionia ne fakamafana e tau matua taane ha laua, ko e tau motua tokoua, ke eke mo tau paionia tumau. Ne fakamafana foki he tau motua nei e motua ke toluaki ke fakalataha mo laua. Nakai leva, ne kotofa e motua ke toluaki ko e paionia pauaki. Fakamui, ne kamata a ia mo e hoana haana ke taute e gahua takaiaga. Ka e kua e tau motua tokoua ne toe? Ne eke taha mo leveki takaiaga, mo e taha ko e tagata gahua foaki noa ke talaga e Fale he Kautu.

Ne fakaaue a maua ki a Iehova he tau aho oti ma e haana lagomatai, he mailoga e maua kua nakai fakaai a maua ke taute ha mena taha ha ko e malolō ni ha maua. Mooli ne fa logona hifo e maua e mategugū mo e gagao, ka kua fiafia ai ka manamanatu ke he tau fua mitaki he fekafekauaga ha maua. Fakaholo ki mua e Iehova e haana gahua. Kua fiafia a maua ke fai vala tote i ai, he fekafekau he mogonei ko e tau paionia pauaki. E, kua fakaako e maua e “mena galo” he falanaki ki a Iehova, ko ia ne “fakamalolo mai” a maua.

[Blurb he lau 6]

Kua fakaako e maua e “mena galo” he falanaki ki a Iehova

[Mepe/Fakatino he lau 4]

Ko Matakasa ne fakahigoa ko e Big Red Island, ko e aelani ke fāaki e lahi he lalolagi. Kua kula e kelekele, mo e loga e tau mena momoui kehekehe i ai

[Tau Fakatino he lau 5]

Fiafia a maua he fai vala ke he tau fakaako Tohi Tapu

[Fakatino he lau 5]

Ko e ō fenoga e taha paleko lahi mahaki ne fehagai mo maua