Tau Leveki Faifano—Faoa Gahua Auloa he Kupu Moli

I loto he fakapotopotoaga Kerisiano he senetenari fakamua, kua ha ha i ai e tau leveki faifano ne ahiahi atu ke he tau fakapotopotoaga ke ati hake a lautolu. Ne foaki ni e lautolu a lautolu, nakai he kumi ke moua e tau mena ma lautolu, ka ke liga lagomatai e lautolu a lautolu i loto he tau fakapotopotoaga ke o tumau ai ke lata mo e lilifu he Atua.—Gahua 11:23, 24; 14:21, 22; 15:32; 20:2, 31:35; Filipi 2:20-22, 29; 1 Tesalonia 2:5-12.

He vaha nei kua moua foki he tau fakapotopotoaga he Tau Fakamoli a Iehova e tau lagomataiaga he tau leveki faifano. Kua loga e tau tau ne mahani lahi e tau tagata tane nei ke he tau gahua fakamatala he Tau Fakamoli a Iehova mo e ke he gahua leveki. Kua fakaata e lautolu a lautolu mai he tau gahua tupe mo e tau matagahua he loto kaina ke maeke ai a lautolu ke foaki ne lautolu a lautolu ke taute e fekafekauaga mau. Ka ko lautolu kua mau, kua fa mahani e tau hoana ke kau auloa foki ke he fekafekauaga mau he o fakalataha mo e ha lautolu a tau tane.

Ne kotofa e tagata leveki he takaiaga ke leveki e takaiaga ne kua kavi ke 18 ke he 25 e tau fakapotopotoaga. Ne ahiahi lagaua a ia he tau ke he tau fakapotopotoaga takitaha i loto he takaiaga mo e ka mole e ua tau po ke tolu e tau kua kotofa ai ke he taha takaiaga kehe. Ke he puhala nei kua maeke e tau fakapotopotoaga ke moua e tau lagomatai mai he tau mena kehekehe ne fa mahani lahi ki ai a ia mo e tau iloilo kehekehe he tau tagata leveki he takaiaga.

Kua kitekite he leveki he takaiaga e tuaga fakaagaga he fakapotopotoaga mo e hana tau gahua. Kua taute e ia e falu lauga ke he fakapotopotoaga mo e feleveia fakalataha foki mo e tau momotua mo e tau fekafekau lagomatai ke tutala ko e maeke fefe a lautolu ke fakaholo ki mua ha lautolu a fekafekau ke he fakapotopotoaga.

He vaha he fahi tapu kua o fakalataha a ia mo e hana hoana, kaeke kua mau a ia, mo e Tau Fakamoli he matakavi, kua lagomatai a lautolu ke fakaholo ki mua ha lautolu a fekafekauaga he taha fale ke he taha fale. To ahiahi foki a ia mo e hana hoana ke he tau tagata fou ne talia fiafia ke fakamafana atu ki a lautolu ke he tua. Kua maeke a koe ke ole ma e ahiaga pihia.

Kua pihia foki e tau mena kua lata fakaagaga he tagata leveki fahi motu mo e tutuaga he tau mena ne fa mahani lahi ke iloa. Ne faifano a ia mai he taha takaiaga ke he taha takaiaga, kua fekafekau he tau fahi tapu takitaha ne kua matutaki ke he tau toloaga he takaiaga. Ne gahua foki a ia mo e hana hoana ke he fekafekauaga he fonua fakalataha mo e Tau Fakamoli i loto he taha mai he tau fakapotopotoaga he takaiaga ne ahiahi atu a ia ki ai. Ne leveki e ia e tau tauteuteaga fakahikuhiku he fakaholoaga ma e toloaga he takaiaga mo e taute falu lauga he toloaga, fakalataha mo e lauga ke he tau tagata.

Ka oti e ahiahiaga he tau tagata leveki ke he ha lautolu a tau fakapotopotoaga po ke takaiaga, ne fakaholo atu a lautolu ke he ahiahi atu ke he taha foki, kua muitua ke he fakatokaaga taha ato oti e tau fakapotopotoaga po ke tau takaiaga he ahiahi ki ai, kua kavi ke ono e tau mahina; ti liu foki a lautolu ke kamata foki.

Ke he tau motu loga kua fenoga atu e tau tagata leveki faifano he motoka po ke fakaaoga e tau puhala o fano kua taute ma e tau tagata. He falu motu kua liga fakaaoga e lautolu e pasikala taholi po ke fano hui foki. Kua lagomatai he Kaufakalatahaaga e tau mena ne fakamole ke he puhala holo he fenoga he leveki faifano mo e foaki foki ki a ia mo e hana hoana e lagomataiaga tupe tote ma e tau mena kua manako a laua ki ai. Ne fa mahani ke age he tau tagata he tau fakapotopotoaga takitaha ke he leveki faifano mo e hana a hoana e mena ke nonofo ai mo e tau mena kai.

Kua ui mai ai e fekafekauaga nei ma e agaga taute poa. Kua manako lahi e tau leveki faifano mo e ha lautolu a tau hoana ke foaki ha lautolu a fekafekauaga ke he tau fakapotopotoaga mo e nakai fakakavega mamafa a lautolu.—1 Tesalonia 2:9.

• Ko e heigoa e kakano he tau leveki faifano he senetenari fakamua he fakapotopotoaga Kerisiano?

• Kua eke fefe e tau leveki faifano he vaha nei ke lata mo e ata ke taute e fekafekauaga nei?

• Fakamaama e fekafekauaga he tau leveki he takaiaga mo e he fahi motu mo e moui fefe a lautolu.

[Fakatino he lau 20]

Lauga e leveki he fahi motu ke he toloaga he takaiaga

[Tau Fakatino he lau 21]

Kua tuku atu he tau tagata leveki he takaiaga e tau fakatonutonuaga ke he gahua fakamatala mai he taha fale ke he taha fale, kua tutala ke he tau momotua he fakapotopotoaga, ahiahi ke he tau fakaakoaga Tohi Tapu ha lautolu ne talia fiafia fou, mo e lauga ke he tau fakapotopotoaga