Kia Eke mo Tau Tagata he Kautu!

“Kia eke mo tau tagata he māga.”—FILIPI 1:27, matahui tala NW.

TO TALI FĒFĒ E KOE?

Ko hai ka eke mo tau tagata he Kautu?

Ko e heigoa kua lata ia tautolu ke taute hagaao ke he vagahau, tupumaiaga, mo e tau matafakatufono he Kautu?

Fakakite fēfē he tau tagata he Kautu kua fiafia a lautolu ke he tau tuaga he Atua?

1, 2. Ko e ha e fakatonuaga ha Paulo ke he fakapotopotoaga i Filipi kua aoga pauaki?

KUA fakamalolō he aposetolo ko Paulo e fakapotopotoaga i Filipi ke “lata e tau mahani . . . mo e [tala] mitaki.” (Totou Filipi 1:27.) Ko e talahauaga Heleni ne fakaaoga e Paulo ma e kupu “mahani” kua liga kakano foki “kia eke mo tau tagata he māga.” Ko e talahauaga ia kua kakano pauaki ma e fakapotopotoaga i Filipi. Ko e ha? Ha kua tuga ko Filipi e taha he tau matakau fifili he tau taone ne fakaatā e tau tagata ne nonofo i ai ke tuga e tau tagata Roma. Ko e tau tagata Roma ne nonofo i Filipi mo e Pule Atu Motu Roma ne matalahi he tuaga ha lautolu mo e moua e puipuiaga pauaki i lalo he fakatufono Roma.

² Ko e tau tagata he fakapotopotoaga i Filipi ne fai kakano lahi ke matalahi. Fakamanatu e Paulo ki a lautolu ko e tau Kerisiano fakauku ko e māga ha lautolu kua “ha ha he lagi ia.” (Filipi 3:20) Ko lautolu ne nonofo ai, nakai ko e pule he tagata, ka ko e Kautu he Atua. Tuga ia, ne moua e lautolu e puipuiaga mo e tau aoga nakai fai fakatataiaga.—Efeso 2:19-22.

3. (a) Ko hai kua moua e magaaho ke eke mo tau tagata he Kautu? (e) Ko e heigoa ha tautolu ka fakatutala he vala tala nei?

³ Ko e tomatoma ha Paulo “kia eke mo tau tagata he māga” kua hagaao pauaki ki a lautolu ka pule mo Keriso ke he lagi. (Filipi 3:20) Ka e fakalaulahi atu, maeke ai ke hagaao ki a lautolu ka eke mo tau tagata he lalolagi he Kautu he Atua. Ko e ha? Ha ko e tau Kerisiano tukulele oti kua fekafekau foki ke he Patuiki ia ko Iehova, ti lata ke momoui fakatatau ke he tau tuaga ia foki. (Efeso 4:4-6) He vahā nei, kua eketaha e tau tagata ke maeke ke nonofo he motu monuina. Lata lahi foki ia tautolu ke ofania e magaaho ke eke mo tau tagata he Kautu! Ke fakahokulo e loto fakaaue ha tautolu ke he kotofaaga ia, kia fakatutala a tautolu ke he falu tataiaga he tau poakiaga ke lata mo e tagata he fakatufono he lalolagi mo e tagata he Kautu he Atua. To kumikumi mogoia a tautolu ke he tolu e mena kua lata ia tautolu ke taute kaeke ke fakatumau e tautolu e fakalilifu ke eke mo tau tagata he Kautu.

TAU POAKIAGA MA E TAU TAGATA HE MOTU

4. Ko e heigoa e vagahau mitaki, ti “vagahau” fēfē ai e tautolu?

⁴ Fakaako e vagahau. Manako e falu fakatufono he lalolagi ki a lautolu kua ole ke nonofo he motu ke vagahau e vagahau he motu ia. Pete foki ka age e fakaatāaga ke nofo he motu, liga eketaha e tau tagata ke he tau tau loga ke iloa mitaki e vagahau foou. Liga mafiti a lautolu ke iloa e tau puhala he vagahau ka e liga fai magaaho ke fakaako a lautolu ke fakaleo fakahako e tau kupu. Pihia foki, kua manako ke he tau tagata he Kautu he Atua ke fakaako e mena ne fakahigoa he Tohi Tapu ko e “vagahau mitaki.” (Totou Sefanaia 3:9.) Ko e heigoa e vagahau ia? Ko e kupu mooli hagaao ke he Atua mo e hagaao ke he tau finagalo haana ne moua he Tohi Tapu. Fakaaoga e tautolu e vagahau mitaki ka fakatatau e tau mahani ha tautolu mo e tau fakatufono mo e tau matapatu fakaakoaga he Atua. Ko e tau tagata he Kautu he Atua kua liga iloa mafiti e tau fakaakoaga aoga he Tohi Tapu ti papatiso. Pihia foki he mole e papatiso ha lautolu, kua latatonu a lautolu ke eketaha ke “vagahau” fakamitaki e vagahau mitaki. He puhala fe? Igatia a tautolu mo e fakakati e vehā he vahāloto he mena ne iloa e tautolu hagaao ke he tau matapatu fakaakoaga he Tohi Tapu mo e mena ne taute e tautolu.

5. Ko e ha kua lata ia tautolu ke fakaako e tau mena oti kua maeke ia tautolu hagaao ke he tupumaiaga he fakatokatokaaga ha Iehova?

⁵ Fakaako e tupumaiaga. Ko e tagata ne manako ke eke mo tagata he fakatufono he lalolagi kua liga lata ke fakaako taha mena hagaao ke he tupumaiaga he fakatufono ia. Pihia foki, ko lautolu kua manako ke eke mo tau tagata he Kautu kua lata ia lautolu ke fakaako e tau mena oti hagaao ke he Kautu he Atua. Manamanatu ke he fifitakiaga ne fakatoka he tau tama taane ha Koru, ne fekafekau i Isaraela i tuai. Ne fiafia lahi a lautolu ki a Ierusalema mo e matakavi he tapuakiaga mo e totou ai ke he tupumaiaga he taone. Nakai ko e tau maka mo e tau puga ne fiafia lahi a lautolu ki ai ka ko e mena ne hukui he taone mo e matakavi he tapuakiaga. Ko Ierusalema “ko e maga he Patuiki to atu,” ko Iehova, ha ko e matapatu a ia he tapuakiaga meā. Ko e matakavi ia ne fakaako e Fakatufono ha Iehova. Ko e tau tagata ne pule he Patuiki ha Ierusalema ne fakakite e Iehova e fakaalofa totonu haana. (Totou Salamo 48:1, 2, 9, 12, 13.) Tuga a lautolu, ha ha nakai ia koe e manako ke fakaako mo e iloa e tupumaiaga he fakatokatokaaga ha Iehova he lalolagi? Ko e lahi haau a fakaako hagaao ke he fakatokatokaaga he Atua mo e puhala ne lalago e Iehova e tau tagata haana, to mooli lahi e Kautu he Atua ki a koe. Ko e manako haau ke fakamatala e tala mitaki he Kautu ka tupu lahi pauaki.—Iere. 9:24; Luka 4:43.

6. Ko e ha kua tonu ai kua manako a Iehova ki a tautolu ke fakaako mo e omaoma e tau matafakatufono mo e tau matapatu fakaakoaga he Kautu?

⁶ Iloa e tau matafakatufono. Ko e tau fakatufono he lalolagi kua manako ke he tau tagata ha lautolu ke fakaako mo e omaoma e tau matafakatufono he motu. Ti tuga kua tonu ai, kua manako a Iehova ki a tautolu ke fakaako mo e omaoma e tau matafakatufono mo e tau matapatu fakaakoaga kua takitaki e tau tagata oti he Kautu. (Isaia 2:3; Ioane 15:10; 1 Ioa. 5:3) Ko e tau matafakatufono he tagata kua fa keukeu mo e liga nakai tonu. Kehe mamao, “kua hakohako e fakatufono a Iehova.” (Sala. 19:7) Fiafia nakai a tautolu ke he matafakatufono he Atua mo e totou e Kupu haana he tau aho takitaha? (Sala. 1:1, 2) Ko e puhala ni ke iloa e tautolu e matafakatufono he Atua ke fakaako ai e tautolu. Nakai fai tagata ka taute ai ma tautolu.

TAU TAGATA HE KAUTU KUA FIAFIA KE HE TAU TUTŪAGA HE ATUA

7. Ko e tau tagata he Kautu kua momoui ke he tau tuaga tokoluga fe?

⁷ Ke fakatumau ke eke mo tau tagata he Kautu, kua nakai ni lata ia tautolu ke iloa e tau tuaga he Atua ka e ke fiafia foki ki ai. Tokologa e tagata he fakatufono he lalolagi ne pehē kua talia e lautolu e tau matafakatufono mo e tau tuaga he motu ne nonofo ai a lautolu. Ka e, he mogo ne mailoga e lautolu e poakiaga ke tauhele mo e logona na nakai fai tagata kua kitia, ne moumou e lautolu e matafakatufono. Fa mahani, ko e tau tagata nei kua “fakafiafia tagata.” (Kolo. 3:22) Ko e tau tagata he Kautu kua momoui ke he tau tuaga tokoluga. Kua omaoma fiafia a tautolu ke he tau matafakatufono he Atua, pete ne nakai fai tagata ne kitia. Ko e ha? Ha kua fakaalofa a tautolu ki a Ia e Fakatū Matafakatufono.—Isaia 33:22; totou Luka 10:27.

8, 9. Maeke fēfē a koe ke iloa kua fiafia mooli a koe ke he tau matafakatufono he Atua?

⁸ Maeke fēfē a koe ke iloa kua fiafia mooli a koe ke he tau matafakatufono he Atua? Kumikumi e puhala ka fehagai atu a koe he mogo ka moua e koe e fakatonuaga hagaao ke he logonaaga fakatagata—ma e fakatai, ke he tau mena tui mo e tauteuteaga. Fakamua ato eke mo tagata he Kautu, liga loto a koe ke tauteute fakafulufagu po ke fakataki. He tupu e fakaalofa haau ke he Atua, fakaako a koe ke tauteute he puhala kua fakaheke a ia. (1 Timo. 2:9, 10; 1 Pete. 3:3, 4) Liga logona hifo e koe kua fakalatalata e puhala tauteute haau mogonei. Ka e kua ka tala atu e motua ki a koe kua fakatupetupe lahi mahaki he puhala tauteute haau e falu tagata fakailoa he fakapotopotoaga? To tali atu fēfē a koe? To totoko, ita, po ke ulu kafilo a koe? Ko e fakavēaga he matafakatufono he Kautu he Atua ke fifitaki he tau tagata oti he motu e Keriso. (1 Pete. 2:21) Hagaao ke he fifitakiaga ha Iesu, ne tohi he aposetolo ko Paulo: “Ka kia takitokotaha a tautolu mo e fakafiafia a ia ne katofia mo ia, kia mitaki ai a ia, to fakamafanatia ai. Ha ko Keriso ni, nakai fakafiafia e ia hana finagalo.” (Roma 15:2, 3) Ma e mafola he fakapotopotoaga, ko e Kerisiano motua kua makai ke fakatokatoka atu ka e nakai ita ke lata mo e tau loto manamanatu he falu.—Roma 14:19-21.

⁹ Manamanatu ke he ua foki e mataulu tala kua aoga lahi: ha tautolu a aga ke he mahani fakataane mo e fifine ti pihia foki mo e onoonoaga ha tautolu ke he fakamauaga. Ko lautolu ne nakai ko e tau tagata he Kautu he Atua kua liga tiaki e mahani fakasotoma, ne onoono ke he tau fakatino telefua ko e mena fakafiafia nakai hagahaga kelea, mo e manatu ko e faivao mo e tau vevehe ko e tau mena fakatagata hokoia. Ko e tau tagata he Kautu ne tiaki e tau aga fakatagata nakai manamanatu ia. Pete ne tokologa e Kerisiano he mogo fakamua ne kelea e puhala moui, kua onoono a lautolu mogonei ke he mahani fakataane mo e fifine mo e fakamauaga ko e tau mena fakaalofa mai he Atua. Ne tokiofa e lautolu e tau tuaga tokoluga ha Iehova mo e talia katoatoa ko lautolu kua matutaki ke taute e tau mahani feuaki kua nakai lata ke eke mo tau tagata he Kautu. (1 Kori. 6:9-11) Ka e mailoga foki e lautolu kua fakavai e loto. (Iere. 17:9) Ti loto fakaaue a lautolu he moua e tau hatakiaga pauaki kua lagomatai a lautolu ke fakatumau e tau mahani mitaki lahi.

TAU TAGATA HE KAUTU KUA LOTO FAKAAUE KE HE TAU HATAKIAGA

10, 11. Ko e heigoa e tau hatakiaga magaaho tonu ne fakatoka mai he Kautu he Atua, ti fēfē e logonaaga haau hagaao ke he tau hatakiaga pihia?

¹⁰ Maeke he tau fakatufono he lalolagi ke foaki e tau hatakiaga malolō tino hagaao ke he tau mena kai mo e tau vai fakaekekafo. Maaliali ai, nakai kelea oti e tau mena kai mo e tau vai fakaekekafo. Kaeke ke fakatupu he taha mena pauaki e fakahagahaga kelea, kua fakatoka mai he fakatufono e tau hatakiaga lagotatai ke puipui e tau tagata ne nonofo he motu. Ka nakai taute pihia he fakatufono, to tokihala ai ha kua fakaheu ai. Pihia foki, kua fakatoka mai he Kautu he Atua e tau hatakiaga magaaho tonu hagaao ke he tau mahani pauaki mo e tau hagahaga kelea fakaagaaga. Tuga anei, ko e Internet kua aoga lahi ke fakaaoga ke he puhala matutaki, fakaako, mo e fakafiafia. Kua fakaaoga he fakatokatokaaga he Atua e Internet mo e loga e fua mitaki ne moua mai ai. Ka e loga e faahi he Internet ne hagahaga kelea ke he tuaga he mahani mo e fakaagaaga. Ko e tau faahi Web ne fakaohooho e tau ata telefua ne fakalagā e hagahaga kelea pauaki ke he malolō fakaagaaga he tau tagata he Kautu. Totou tau tuai he hataki he vahega fekafekau fakamoli a tautolu hagaao ke he tau faahi pihia. Ko e fakaaue ha ia ha tautolu ma e tau hatakiaga malolō fakaagaaga nei!

¹¹ He tau tau e kua mole, ha ha i ai foki e faahi ne mahuiga lahi—ko e taha ne aoga kaeke ke fakaaoga mo e fakailoilo lahi. Ka ko e tau faahi nei, ne higoa ko e matutaki fakakapitiga (social networking) he tau faahi Web, ne maeke foki ke moumou. Maeke ai ke fakatapakupaku e tagata ke he tau feoakiaga kelea. (1 Kori. 15:33) Ko e mena ia ati fakatoka mai he fakatokatokaaga he Atua e tau hatakiaga lagotatai hagaao ke he fakaaoga he tau faahi pihia. Kua totou nakai e koe e tau vala tala ne taute fakailoa he fekafekau fakamoli hagaao ke he fakaaoga he tau faahi matutaki fakakapitiga? Ko e goagoa ha ia ke fakaaoga e tau faahi pihia ka e nakai totou e vala tala ia!a Kua tatai ai mo e inu e vai ekekafo maō ka e nakai totou e hatakiaga he leipolo he lupo.

12. Ko e ha kua goagoa ke fakaheu e tau hatakiaga?

¹² Ko lautolu kua fakaheu e tau hatakiaga ne fakatoka mai he fekafekau fakamoli kua fakahagahaga kelea pauaki ki a lautolu mo e tau fakahele ha lautolu. Falu ne hufia he onoono ke he tau ata telefua po ke taute e mahani feuaki ti fakahiku ke manamanatu kua nakai kitia e Iehova e tau mena ne taute e lautolu. Ko e goagoa ha ia ke talitonu kua maeke a tautolu ke ufiufi e mahani ha tautolu mai ia Iehova! (Fakatai 15:3; totou Heperu 4:13.) Manako e Atua ke lagomatai a lautolu ia mo e fakalagalaga e tau hukui haana he lalolagi ke lali ke lalago a lautolu. (Kala. 6:1) Pete ia, tuga ni e tau fakatufono he lalolagi ne utakehe e fakaatāaga he tagata ne nofo he motu ha kua taute e tau mahani pauaki, to utakehe foki e Iehova e fakaatāaga ha lautolu kua nakai fakatokihala he moumou e tau tuaga haana.b (1 Kori. 5:11-13) Ka e fakaalofa noa a ia. Ko lautolu kua fakatokihala mo e hiki e mahani ha lautolu ka liu moua e tuaga mitaki mo Iehova mo e fakatumau ke eke mo tau tagata he Kautu. (2 Kori. 2:5-8) Ko e lilifu mooli ke fekafekau ke he Patuiki fakaalofa pihia!

TAU TAGATA HE KAUTU KUA TOKIOFA E FAKAAKOAGA

13. Fakakite fēfē he tau tagata he Kautu e uho he fakaakoaga?

¹³ Loga e fakatufono he lalolagi ne gahua malolō ke fakaako e tau tagata ha lautolu he motu. Ne fakatokatoka e lautolu e tau aoga kua fakaholo ki mua e iloa ke totou mo e fakaako e tau puhala gahua mitaki. Kua loto fakaaue e tau tagata he Kautu ke he tau aoga fakatufono nei mo e fakamakutu he fakaako ke totou, tohi, mo e lalago fakatupe a lautolu. Kua uho lahi foki ki a lautolu e fakaakoaga kua moua e lautolu ko e tau tagata he Kautu he Atua. Puhala he fakapotopotoaga Kerisiano, kua fakaholo ki mua e Iehova e iloa ke totou. Kua fakamalolō ke he tau matua ke totou ke he tau tama ikiiki ha lautolu. He tau mahina takitaha, kua taute fakailoa he fekafekau fakamoli e loga he tau lau he tohi fakavē ke he Tohi Tapu he Ko e Kolo Toko mo e Awake! Ko e Kolo Toko kua moua ke he vagahau Niue ti ka totou e koe gahoa e lau he aho he mahina, to fakatumau a koe ke fakatatau mo e halavaka aoga nei he fakaakoaga he Kautu.

14. (a) Ko e heigoa e fakamahaniaga kua moua e tautolu? (e) Ko e heigoa e tau manatu kua fiafia a koe ke fakagahua he Tapuakiaga Magafaoa he afiafi?

¹⁴ He tau faahi tapu takitaha, ko e tau tagata he Kautu kua moua e fakamahaniaga he tau feleveiaaga fakapotopotoaga ha lautolu. Ma e fakatai, ko e Aoga Fekafekau Fakateokarasi kua mole tuai e ono e hogofulu tau he lagomatai e tau tagata fakaako ke eke mo tau faiaoga lauia mitaki he Kupu he Atua. Kua hū nakai a koe he aoga nei? He tau tau e kua mole ko e fekafekau fakamoli kua fakatoka pauaki e Tapuakiaga Magafaoa he afiafi he faahi tapu. Ko e fakaholoaga nei kua fakamalolō e pipiaga he magafaoa. Kua maeke nakai a koe ke fakagahua e tau manatu ne lomi he tau tohi ha tautolu?c

15. Ko e heigoa taha he tau kotofaga lilifu ue atu kua moua e tautolu?

¹⁵ Ko e tau tagata he tau fakatufono he lalolagi to fakakite e lalagoaga ke he faahi fakapolitika, ti ō foki he taha gutuhala ke he taha gutuhala ke taute pihia. He tuaga fakalaulahi, ko e tau tagata he Kautu kua lalago fakamakai e Kautu he Atua ke he tau puhalatū mo e mai he taha gutuhala ke he taha gutuhala. Kua fitā he totoku he vala tala fakaako fakamua he Ko e Kolo Toko, ne fakapuloa e Kautu a Iehova, ko e senolo kua mua atu e tufatufa mogonei ke he lalolagi! Ko e taha he tau kotofaaga lilifu ue atu kua moua e tautolu ko e tala age ke he falu hagaao ke he Kautu he Atua. Fakalataha fakamakai nakai a koe he gahua fakamatala?—Mata. 28:19, 20.

16. Maeke fēfē a koe ke fakamooli ko koe ko e tagata mitaki he Kautu he Atua?

¹⁶ Nakai leva ko e Kautu he Atua hokoia e fakatufono ka pule ke he lalolagi. To takitaki ai e tau faahi oti he moui he tau aho takitaha, nakai ni fakaagaaga ka e pihia foki ke he tau mena fakamotu. To eke nakai a koe mo tagata mitaki he Kautu he Atua he magaaho ia? Ko e magaaho anei ke fakamooli to pihia a koe. Ke he tau fifiliaga oti ne taute e koe he tau aho takitaha, taute e tau mena oti ke he fakahekeaga ha Iehova ti fakamooli kua eke a koe mo tagata mitaki he Kautu he Atua.—1 Kori. 10:31.

[Tau Matahui Tala]

[Blurb he lau 14]

Muitua nakai e koe e tau hatakiaga ne fakavē ke he Tohi Tapu hagaao ke he Internet?

[Fakatino he lau 12]

Tuga e tau tama taane ha Koru, moua nakai e koe e fiafia ke he tapuakiaga meā mo e tupumaiaga i ai?

[Fakatino he lau 15]

Ko e haau a Tapuakiaga Magafaoa he afiafi ka lahi e mena ka taute a koe mo e tau fakahele haau ke eke mo tau tagata mitaki he Kautu