TAU HŪHŪ TOHI TAPU KUA TALI

Maeke nakai ke moui tukulagi?

Ko e tagata fakamua ko Atamu, ne leva e moui. Ka e fakahiku ni, ne fuakau a ia ti mate. Tali mai he mogoia, ne loga e tau puhala ne lali e tagata ke taute ke ua fuakau. Ka e nakai fai tagata ne maeke ke hao mai he mate. Ko e ha? Ne fuakau a Atamu ti mate he agahala a ia he nakai omaoma ke he Atua. Kua fuakau a tautolu ha kua moua e agahala mai ia Atamu ti ko e fakahala he agahala ia, ko e mate.​—Totou Kenese 5:5; Roma 5:12.

Ke moua e tautolu e moui tukulagi, kua lata ke fai tagata ke taui aki ma tautolu. (Iopu 33:24, 25) Ko e taui ko e totogi ne foaki ke fakatokanoa e tagata, ma tautolu, kua lata a tautolu ke fakatokanoa mai he mate. (Esoto 21:29, 30) Ne foaki e Iesu e taui he mogo ne mate a ia ma tautolu.​—Totou Ioane 3:16.

Moua fēfē e tautolu e moui tukulagi?

To nakai fakatokanoa e tau tagata oti kana mai he gagao mo e fuakau. Mooli ai, ko e tau tagata ne nakai omaoma ke he Atua, tuga a Atamu, to nakai moua e moui. Ko lautolu ni kua fakamagalo e tau agahala ka moua e moui tukulagi.​—Totou Isaia 33:24; 35:3-6.

Ke moua e fakamagaloaga, kua lata ia tautolu ke fai mena ka taute. Lata ia tautolu ke iloa e Atua he fakaako haana Kupu ko e Tohi Tapu. Fakaako ai a tautolu ke he puhala ke moua e moui mitaki mo e moua foki e taliaaga he Atua mo e moui tukulagi.​—Totou Ioane 17:3; Gahua 3:19.