Tau Matua​—Fakaako e Tau Fanau ha Mua Mai he Vaha Tote

“KITIALA, ko e fanau ko e mena moua ia mai ia Iehova; ko lautolu kua fanau mai ko e taui ia mai ia ia,” he talahau he Tohi Tapu. (Sala. 127:3) Ko e magaaho fiafia ma e tau matua ka fanau e tama.

Lafi ke he fiafia, ha ha i ai foki he tau matua e tau matagahua aoga. Lata ia laua ke fagai fakamitaki e tama he tau aho takitaha ke maeke a ia ke tupu hake ko e fuata tino malolō. Ka e ke malolō e fakafetuiaga mo Iehova, lata foki a ia ke fakaako mo e fai takitakiaga mai he tau matua haana. Lata ia laua ke fakaako e tama ke he tau matapatu fakaakoaga mai he Kupu he Atua. (Fakatai 1:8) Magaaho fe kua lata ia laua ke kamata fakaako e tama, ti ko e heigoa kua lata ia laua ke fakaako ki a ia?

LATA E TAU MATUA MO E FAKAAKOAGA

Talahau he Tohi Tapu ki a tautolu hagaao ke he tagata ne higoa ko Manoa, ne nofo he taone ha Sorea i Isaraela. Ko Manoa mo e hoana haana ne nakai fai tama, ka e tala age e agelu ha Iehova ki a ia to fai tama agataha a laua. Pete ne fiafia lahi a Manoa mo e hoana haana ke logona e tala, ne manamanatu foki a laua ke he puhala ka feaki fakamitaki ha laua a tama. Ti liogi a Manoa: “Kua ole atu e au kia koe ma [Iehova] na e, ke liu mai ai kia maua e tagata he Atua ne fakafano mai e koe, mo e fakakite mai e ia kia maua e tau mena ke eke ai e maua ke he tama ka fanau mai.” (Fakafili 13:8) Ne fakaako e Manoa mo e hoana haana e tama ha laua ko Samisoni hagaao ke he fakatufono he Atua, ti tuga kua talia e ia e mena ne fakaako e ia. Talahau he Tohi Tapu ki a tautolu kua lagomatai he agaaga tapu ha Iehova a Samisoni ke taute e tau mena malolō lahi ko e taha he tau fakafili ha Isaraela.​—Fakafili 13:25; 14:5, 6; 15:14, 15.

Magaaho fe kua lata he tau matua ke kamata fakaako e tau fanau ha laua? Ne fakaako a Timoteo he haana matua fifine ko Eunike, mo e matua fifine tupuna haana ko Loi, hagaao ki a Iehova ‘tali mai he vaha tote.’ (2 Timo. 1:5; 3:15) Ti kamata a laua ke fakaako a Timoteo he vaha tote haana.

Kua pulotu ma e tau matua Kerisiano ke liogi ma e takitakiaga mo e ke pulega tuai ke kamata fakaako e tama ha laua ‘tali mai he vaha tote.’ “Ko e tau manatu he tagata ne malolo ke gahua kua hiku ia ke he muhu mena,” ne talahau he Tau Fakatai 21:5. Ato fanau e tama mukemuke ha laua, nakai fakauaua ai to tauteute fakamitaki e tau matua. To fakamau hifo e laua e tau mena oti kua lata ma e tama mukemuke. Ka e aoga lahi foki ma laua ke pulega e puhala ke fakaako e tama mukemuke ha laua hagaao ki a Iehova. Ko e foliaga ha laua kua lata ke kamata fakaako agataha e tama mukemuke ha laua ka fanau mai.

Ko e tohi ne fakamaama e puhala kua feaki e tau tama ke lalahi hake ke he vaha fuata kua pehē he tau mahina ne mole laia e fanau he tama mukemuke ko e magaaho mafiti lahi he uhoniu haana ke taute e tau matutakiaga foou. Ti aoga lahi ma e tau matua ke fakaaoga e magaaho nei ke fakaako e tama ha laua hagaao ki a Iehova mo e haana tau tutūaga!

Taha e matua fifine ko e paionia tumau foki ne pehē hagaao ke he tama fifine tote haana: ‘Kua uta e au a ia mo au he gahua he fonua tali mai he taha laia e mahina haana. Pete ne nakai maeke a ia ke maama e tau mena tutupu, ne talitonu e au kua fai aoga ki a ia he gahua mo au he fonua. He mogo ne ua e tau haana, ne mauokafua a ia he foaki e tau tuleke ki a lautolu ne feleveia e maua he gahua he fonua.’

Maeke he tau matua ke moua e tau fua mitaki he fakaako e tau fanau ha laua mai he vaha tote. Ka e iloa foki he tau matua kua nakai mukamuka tumau ke taute pihia.

‘FAKATAU E TAU MAGAAHO’

Ha ko e mena mukamuka lahi e tau fanau ke tauhele, to liga uka ke he tau matua ke fakaako a lautolu. Na fia iloa mena e tau fanau ti lali ai ke fakaako hagaao ke he lalolagi ne takai viko ia lautolu. Maeke fēfē e tau matua ke lagomatai e tama ha laua ke fanogonogo ke he mena ne fakaako e laua ki a ia?

Manamanatu ke he mena ne talahau e Mose. Ia Teutaronome 6:6, 7 ne pehē: “Kia ha i ai foki ke he hau a loto e tau kupu nai kua poaki atu ai e au kia koe ke he aho nai. Kia fakaako atu mau ia ke he hau a fanau, mo e vagahau ki ai, ka nofo a koe ke he hau a fale, ti pihia foki ka fano a koe ke he puhala, ti pihia foki ka takoto a koe, ti pihia foki ka matike ai a koe.” Ko e heigoa e kakano ma e tau matua ke “fakaako atu mau” e tau tutūaga he Atua ke he tama ha laua? Kakano kua lata ke fakatumau a laua ke fatiaki tumau e mena ne fakaako e laua ki a ia. Ko e tama tote kua tuga e akau tote ne lata ke fuifui tumau aki e vala vai tote. Tuga ni e tau tagata lalahi kua mukamuka ke fakaako ka logona e lautolu e manatu kua fatiaki lagaloga, ti pihia foki e tau tama kua mukamuka lahi ke fakaako ka fatiaki tumau e tau manatu ki a lautolu.

Lata e tau matua ke lahi e magaaho ke fakaako e tau tama ha laua ke he kupu mooli he Atua. Ka e uka e mena nei ha kua fa lavelave lahi e tau matua. Kua fakamalolō he aposetolo ko Paulo e tau Kerisiano ke fakatau e tau magaaho ma e tau mena kua aoga. (Efeso 5:15, 16) Maeke fēfē he tau matua ke taute e mena nei? Taha e matakainaga taane ko e motua ti ko e hoana ne lavelave lahi he paionia tumau kua pulega fakamitaki ke fakaaoga e magaaho kua lata ke fakaako e tama ha laua mo e magaaho kua lata ke lalago e fakapotopotoaga mo e gahua tupe. Fakatoka fēfē e laua e magaaho ke fakaako e tama fifine ha laua? Pehē e matua taane: ‘He tau pogipogi oti to fano au ke gahua, ne totou e au mo e hoana haaku ki a ia e Tohi Haaku he Tau Tala Tohi Tapu po ke Kumikumi e Tau Tohiaga Tapu he Tau Aho Takitaha. He mogo afiafi, ne eketaha a maua ke totou ki a ia to fano a ia ke mohe, ti ka ō a maua he gahua he fonua, kua uta e maua a ia. Nakai manako a maua ke tonoa ha magaaho ke fakaako a ia he vaha tote haana.’

‘TUGA NE TAU FANA E TAU FANAU’

Manako a tautolu ke he tau tama ha tautolu ke tutupu hake ke eke mo tau fuata kua aoga, ka ko e kakano ne mua atu he fakaako a lautolu ke iloa e lautolu ke fakaalofa ke he Atua he tau loto ha lautolu.​—Mare. 12:28-30.

Ia Salamo 127:4, ne pehē: “Tuga ne tau fana ke he lima he toa, pihia ni e tau fanau he tau fuata.” Kua fakatatai he Tohi Tapu e tau tama ha tautolu ke he tau fana kua lata ke loloku fakahako ke he matafana. Ko e tagata fanafiti ne fai fana he mogo kū ni ti nakai maeke a ia ke liuaki ai ka fakatoka mai e ia he fanafiti haana. He puhala taha, kua ha ha i ai e tau fanau mo e tau matua ke he magaaho kū ni ato fuata a lautolu. Ko e kakano haia kua aoga lahi ke fakaaoga e laua e magaaho ia ke fakaako e tau fanau ha laua ke muitua mo e fiafia ke he tau fakatufono he Atua.

Ne tohi he aposetolo ko Ioane hagaao ke he tau tagata ne lagomatai e ia ke eke mo tau tagata tapuaki ha Iehova. Ne pehē a Ioane: “Nakai fai fiafia au ke mua ke he mena nai, ka fanogonogo au, kua mahani e fanau haku kua lata [po ke, o fano] mo e kupu moli.” (3 Ioa. 4) Kua fakaaue foki e tau matua Kerisiano ka kitia e laua e tau fanau ha laua kua ‘o fano he kupu moli.’