Loto Fakaaue Nakai a Koe ke he Levekiaga Pauaki ha Iehova?

1, 2. Kehe fēfē e puhala ne kitekite a Iehova ki a tautolu ke he puhala he tau pokiata peleōafi?

KE HE tau motu loga, ne tuku hake he tau pule e tau pokiata ke fakakia aki e tau peleōafi mo e fakamau aki e tau pakia. Ne fakamau foki e lautolu e tau tagata fakaholo ne fakapehia e tau tagata ō hui he puhalatū mo e lali ke fehola ka e nakai lagomatai e tau tagata pakia. Ko e tau fakamauaga nei ne lagomatai e tau pule ke moua mo e tapaki a lautolu nei. Ha ko e tau pokiata oti nei, ne uka lahi fakahaga ma e tau tagata kolokolovao ke hao he taute hehē.

² Pehē e Tohi Tapu ko e fofoga ha Iehova kua “ha ha he tau mena oti.” (Fakatai 15:3) Kakano kia e mena nei kua kitekite tumau ni a ia ki a tautolu ke kitia kaeke kua moumou e tautolu e tau fakatufono haana? Kua fakatali kia a ia ke fakahala a tautolu he mogo ni ka taute e tautolu e tau hepehepe? Nakai pihia! (Iere. 16:17; Hepe. 4:13) Ne kitekite a Iehova ki a tautolu ha kua fakaalofa a ia ki a tautolu ti manako ki a tautolu ke haohao mitaki mo e fiafia.​—1 Pete. 3:12.

3. Ko e heigoa e lima e puhala ne leveki e Iehova a tautolu?

³ Hokulo lahi fēfē e maamaaga ha tautolu ke he fakaalofa he Atua ki a tautolu? To fakatutala a tautolu ke he lima e puhala kua leveki e Iehova a tautolu. (1) Hataki e ia a tautolu ato taute e tautolu e mena kelea. (2) Fakahako e ia a tautolu ka hepe e puhala ne ō ai. (3) Takitaki e ia a tautolu aki e tau matapatu fakaakoaga he Tohi Tapu. (4) Lagomatai e ia a tautolu ka fehagai a tautolu mo e tau kamatamata. (5) Taui po ke, palepale e ia a tautolu he taute e mena hako.

HATAKI E IEHOVA A TAUTOLU

4. Ko e ha ne hataki he Atua a Kaino ato agahala a ia?

⁴ Fakamua, to fakatutala a tautolu ke he tau puhala kua hataki e Iehova a tautolu ato taute e tautolu e mena kelea. (1 Nofo. 28:9) Ma e fakatai, ne “ita lahi” a Kaino he nakai talia e Iehova a ia. (Totou Kenese 4:3-7.) Ne hataki e Iehova a Kaino ka nakai “mahani mitaki” a ia, to agahala a ia. Tuga kua “takoto tuai e hala ke he gutuhala,” ke moua a ia. Ne hūhū a Iehova ki a ia: “To pule foki a koe kia ia.” Ne manako a Iehova ki a Kaino ke ‘moua e fiafia.’ Ka fanogonogo a Kaino ke he hatakiaga, to matutaki a ia ke moua e fakafetuiaga mitaki mo e Atua.

5. He tau puhala fe kua hataki e Iehova a tautolu?

⁵ Pihia foki a tautolu he vahā nei. Maeke a Iehova ke kitia ko hai mooli a tautolu i loto. Iloa e ia e tau manatu mo e tau manako ha tautolu, mo e nakai maeke a tautolu ke fufū ha mena mai ia ia. Fakaalofa a ia ki a tautolu mo e manako ki a tautolu ke taute e mena kua hako, ka e nakai omoi e ia a tautolu. Ti ka kitia e ia ha mena kelea i loto ha tautolu, kua hataki e ia a tautolu. Fēfē? Ka totou tumau e tautolu e Tohi Tapu, ka totou e tautolu e tau tohi ha tautolu, ti ka ō a tautolu ke he tau feleveiaaga, kua maeke a tautolu ke logona e tau hatakiaga he Atua. Kua totou po ke logona nakai e koe taha mena kua lagomatai a koe ke fahia mai he lekua ne ko Iehova ni ne iloa? Ko e tau hatakiaga nei mai ia Iehova kua hau he mogo tonu ne lata mo tautolu.

6, 7. (a) Ko e heigoa e fakamooliaga kua fakaalofa a Iehova ki a tautolu takitokotaha ko e tau fekafekau haana? (e) Maeke fēfē a koe ke aoga mai he levekiaga haana ko Iehova?

⁶ Ko e tau hatakiaga oti he Tohi Tapu kua fakakite mooli kua fakaalofa a Iehova ki a tautolu takitokotaha. Mooli ko e Tohi Tapu, tau tohi ha tautolu, mo e tau feleveiaaga ha tautolu kua aoga ke he tau tagata tokologa. Ka e ole a Iehova ki a koe ke fanogonogo ke he tau hatakiaga haana he Tohi Tapu ke maeke a koe ke taute e mena kua hako. Fakakite he mena nei kua fakaalofa a ia ki a koe.

⁷ Aoga fēfē a tautolu mai he tau hatakiaga he Atua? Kua lata ia tautolu ke talitonu fakamua kua fakaalofa mooli a ia ki a tautolu ti fakagahua e Kupu haana ki a tautolu. Ti ka fai manatu a tautolu kua nakai fakafiafia e Atua, kua lata ia tautolu ke moumou fakamafiti. (Totou Isaia 55:6, 7.) Ka mafiti a tautolu ke fanogonogo, to kalo kehe a tautolu mai he loga e loto mamahi. Ka e kua ka nakai fanogonogo a tautolu? Fakaalofa agaia kia a Iehova ki a tautolu?

FAKAHAKO HE MATUA FAKAALOFA HA TAUTOLU A TAUTOLU

8, 9. Ka foaki mai he taha e fakatonuaga i loto he Tohi Tapu ki a tautolu, fakakite fēfē he mena nei kua leveki e Iehova a tautolu? Fakatai.

⁸ Ka fakatonu e Iehova a tautolu, iloa e tautolu kua leveki e ia a tautolu. (Totou Heperu 12:5, 6.) Mooli kua nakai fiafia a tautolu he moua e fakatonu, akonaki, po ke fakahako. (Hepe. 12:11) Ka foaki mai he taha e fakatonuaga mai he Tohi Tapu ki a tautolu, kua aoga lahi ke maama e kakano ne taute e ia e mena nei. Nakai taute e ia pihia ha kua manako a ia ke fakamamahi e tau logonaaga ha tautolu ka e kitia e ia kua hagahaga kelea e fakafetuiaga ha tautolu mo Iehova. Makai a ia ke fakatoka e magaaho mo e laliaga ke fakakite ki a tautolu mai he Tohi Tapu e puhala ke liliu a tautolu ki a Iehova. Fakalilifu e tautolu e fakatonuaga nei ha ko Iehova ko e Punaaga he Tohi Tapu.

⁹ Ma e fakatai, taha e matakainaga taane ne hufia he tau fakatino telefua ato hau a ia ke he kupu mooli. He iloa e ia e kupu mooli, ne fakamamutu e ia e aga. Fakamui, ne fakatau e ia e selafoni foou, ti liu a ia ke he aga tuai haana ti kamata ke kitekite fakatino telefua he tau faahi Initanete. (Iako. 1:14, 15) Kua kitia maali ko e manako tuai ma e tau fakatino telefua ne velagia agaia i loto haana, tuga e tau malala he afi. Taha aho, ne age e ia e telefoni haana ke he motua ke fakaaoga, ti hake mai e tau faahi telefua he telefoni. Ne fakatonu mafiti he motua e matakainaga taane. Ne fanogonogo e matakainaga ke he fakatonuaga ti fakahiku ke fahia mai he aga kelea nei. Kitia e Iehova e tau agahala fufū ha tautolu ti fakahako a tautolu ato malona e fakafetuiaga ha tautolu mo ia. Kua fakaaue a tautolu ke he levekiaga ha Iehova ki a tautolu.

PUHALA NE TAKITAKI HE TAU MATAPATU FAKAAKOAGA HE TOHI TAPU A TAUTOLU

10, 11. (a) “Manatu” fēfē e tautolu e takitakiaga he Atua? (e) Talahau e mena tupu he magafaoa ne muitua fakailoilo ke he takitakiaga ha Iehova?

¹⁰ Ne lologo e salamo ki a Iehova: “To takitaki e koe au he hāu a pule.” (Sala. 73:24) Maeke ia tautolu ke “manatu” e fakatonuaga ha Iehova he kumikumi ke he Kupu haana. He puhala nei, maeke ia tautolu ke moua e puhala kua manamanatu a ia ki ai, muitua ke he takitakiaga haana, mo e matutaki ke fakafetui mitaki mo ia. Lagomatai foki he fakatonuaga ha Iehova ki a tautolu ke leveki a tautolu mo e ha tautolu a magafaoa.​—Fakatai 3:6.

¹¹ Ma e fakatai, ko e tagata gahua fonua, haana hoana, mo e ha laua a magafaoa lahi ne nonofo he faama totogi i Filipaina. Ko ia mo e hoana haana ko e tau paionia tumau. Ofo ai, ko e tagata ne pule ke he faama ne fakafano atu e tohi ki a lautolu ke tala age kua nakai lata a lautolu ke matutaki ke nonofo i ai. Ne ofo a lautolu ti fakamui ne iloa e lautolu kua fai tagata ne fatipiko fakakelea ke he mahani fakamooli ha lautolu. Ne tupetupe e matakainaga taane ke he mena ke nonofo ai a lautolu. Ka e mauokafua a ia ki a Iehova mo e pehē: “To leveki mai a Iehova. Leveki tumau e ia e tau manako ha mautolu, pete ne tau mena tutupu.” Ne muitua he magafaoa e tau matapatu fakaakoaga he Tohi Tapu, ti kua fakalilifu mo e mafola a lautolu pete ne tau ekefakakelea. Fai aho he mole, ko e tagata ne pule ke he faama ne tala age ki a lautolu kua maeke a lautolu ke nonofo. Kua nava lahi e tagata ne pule ke he faama mo e puhala ne tali atu a lautolu ke he tau ekefakakelea ti hiki e manatu haana ti age foki e vala kelekele ke fakaaoga ai. (Totou 1 Peteru 2:12.) Kua maaliali ka muitua a tautolu ke he tau matapatu fakaakoaga he Tohi Tapu, to takitaki e Iehova a tautolu he tau magaaho uka.

KAPITIGA KUA LAGOMATAI A TAUTOLU KE FAKAUKA KE HE TAU KAMATAMATA

12, 13. Magaaho fe ka uka ke talitonu kua leveki he Atua a tautolu?

¹² Ha ko e tau fekafekau ha Iehova, ne fehagai a tautolu mo e tau kamatamata loga, ti loga ne liga leva lahi, tuga e gagao, favaleaga, po ke totokoaga mai he tau tagata he magafaoa. Taha he tau mena ne mua e uka ke fakauka ko e taufetoko kelea lahi mahaki mo e taha he fakapotopotoaga ha ko e kehekehe he tau aga fakatagata.

¹³ Ma e fakatai, ko e mena ne talahau he matakainaga ne liga fakamamahi mooli a koe. Liga manatu a koe: ‘Nakai lata e mena nei ke tupu he fakatokatokaaga he Atua!’ Ka ko e matakainaga ne fakamamahi a koe kua age ki ai loga e matagahua he fakapotopotoaga, ti manatu e falu kua mitaki lahi mahaki a ia. Liga hūhū a koe: ‘Maeke fēfē e mena nei? Nakai kia kitia e Iehova? Nakai kia fai mena ne taute e ia?’​—Sala. 13:1, 2; Hapa. 1:2, 3.

14. Ko e ha ne liga fakaatā e Iehova e tau matakainaga taane ha tautolu ke fakatonu malolō a tautolu?

¹⁴ Kua lahi atu e mena ne kitia e Iehova ke he mena ne kitia e tautolu, ti liga fakaatā e ia e tuaga ma e tau kakano aoga. Ma e fakatai, fai tagata ne liga talahau e fakatonuaga ki a tautolu kua logona hifo e tautolu kua nakai lata, ti mamahi e tau logonaaga ha tautolu. Ka e liga kehe e mena ne kitia he Atua. Ka kua lata mooli kia a tautolu ke moua e fakatonuaga? Ko e tala ke he moui he Matakainaga ko Karl Klein, ne pehē na fakatonu malolō he Matakainaga ko Rutherford a ia taha magaaho. Fai magaaho he mole, he feleveia fiafia e Matakainaga ko Rutherford mo ia, ne uka lahi e Matakainaga ko Klein ke tali. Kitia he Matakainaga ko Rutherford kua mamahi agaia a Matakainaga ko Klein mai he fakatonuaga. Hataki he Matakainaga ko Rutherford e Matakainaga ko Klein: “Kia fakaeneene. Hane mui mai e Tiapolo ki a koe.” Kua lagomatai mooli he fakatonuaga nei e Matakainaga ko Klein. He eke a ia he mogo fakamui mo matakainaga he Kau Fakatufono, pehē a ia kua fakaako e ia ko e tau matakainaga taane ha tautolu ne tonuhia ke fakatonu a tautolu ti ka vihiatia e tautolu a lautolu ma e mena nei, to moua he Tiapolo a tautolu.a

15. Ko e heigoa kua lata ia tautolu ke tokaloto ka fehagai a tautolu mo e tau kamatamata?

¹⁵ Manako a tautolu ke oti mafiti e tau kamatamata. Ka e aoga ke fakaako a tautolu ke fakauka. Fakatatai e tau kamatamata ki a koe he nakai holo ha ko e apiapi he puhalatū lavelave he tau peleōafi. Maeke a koe ke tū fakatekiteki he puhalatū ato kamata e tau peleōafi ke holo. Ka e ohooho a koe ti fifili ke kumi taha puhalatū foki. Ka e galo e hala haau ti mule he hoko atu ke he mena ne fano ki ai a koe. Ane mai fakauka a koe mo e nofo he puhalatū he kamataaga, to liga hoko a koe he magaaho tonu. Pihia foki ka fehagai a tautolu mo e tau kamatamata. Ka fakauka mo e muitua e tautolu e tau matapatu fakaakoaga he Tohi Tapu, to lagomatai e Iehova a tautolu ke fakauka.

16. Ko e ha kua liga fakaatā e Iehova a tautolu ke matematekelea he tau kamatamata?

¹⁶ Liga fakaatā e Iehova e tau kamatamata ha kua manako a ia ki a tautolu ke fakaako mai ai. (Totou 1 Peteru 5:6-10.) Kia nakai manamanatu a tautolu kua fakatupu he Atua e tau kamatamata ha tautolu. (Iako. 1:13) Ko e ‘fi haau ko e Tiapolo,’ ne fakatupu e laulahi he tau matematekelea. Ka kua aoga ke iloa ko Iehova ne kitia e matematekelea ha tautolu ti fakaalofa a ia ki a tautolu. To mailoga mooli e ia ko e tau kamatamata ha tautolu kua nakai tumau tukulagi. To matutaki ai ke he “tau aho gahoa.” Kia mauokafua kua leveki e Iehova a koe mo e to foaki ki a koe e malolō ke fakauka ke hoko ke he fakaotiaga.​—2 Kori. 4:7-9.

KO E TAUI MAI IA IEHOVA

17. Ko e ha kua kumikumi e Iehova e tau loto he tau tagata oti?

¹⁷ Kua kumikumi e Iehova e tau loto he tau tagata oti ke kitia ko hai mooli ne fakaalofa ki a ia. Ko e perofeta ko Hanani ne tala age ke he Patuiki ko Asa: “Ko e tau fofoga a Iehova kua o tafeliuaki ai ke he lalolagi oti, ke lagomatai kia lautolu kua katoatoa ha lautolu a tau loto kia ia.” (2 Nofo. 16:9) To “lagomatai” e Iehova a koe, kakano to puipui e ia a koe mo e taui ki a koe.

18. Ko e ha kua lata ke mauokafua a tautolu to taui e Iehova a tautolu ka taute e tautolu e mena mitaki? (Kikite fakatino he kamataaga.)

¹⁸ Manako a Iehova ke “fakaalofa” ki a tautolu, kakano kua manako a ia ke taui a tautolu. Ka manako a tautolu ke he monuina haana, kua lata ia tautolu ke “manako ke he mitaki,” ‘kumi e mitaki,’ ti “eke e tau mena mitaki.” (Amosa 5:14, 15; 1 Pete. 3:11, 12) Kua taui e Iehova a lautolu ne tututonu, pete ne nakai fai tagata kua kitia e tau gahua mitaki ha lautolu. (Sala. 34:15) Kitia e tautolu e mena nei mai he fakafifitakiaga he tau fifine fakafanau tokoua ha Isaraela ko Sipela mo Pua. Ne poaki a Farao ki a laua ke tamate e tau tama mukemuke taane Isaraela oti ka fanau. Ne omaoma e tau fifine nei ke he Atua ka e nakai ki a Farao, ti fakahao e laua e tau tama mukemuke. Ne kitia e Iehova e tau gahua mitaki ha Sipela mo Pua ti taui a laua he fai tama foki a laua. (Esoto 1:15-17, 20, 21) Falu magaaho ne liga logona hifo a tautolu kua nakai fai tagata ne kitia e tau mena mitaki ne taute e tautolu, ka e kitia e Iehova e tau gahua mitaki oti kua taute e tautolu. To taui e ia a tautolu.​—Mata. 6:4, 6; 1 Timo. 5:25; Hepe. 6:10.

19. Ko e heigoa e mena ne tupu ke he taha matakainaga fifine?

¹⁹ Liga logona hifo e tautolu he falu mogo kua nakai mailoga e Iehova e tau laliaga ha tautolu he gahua fakamatala, ka e mailoga e ia. Ko e matakainaga fifine Hungary i Austria ne moua e kaina he fifine ne vagahau Hungary. Ne fano mafiti e matakainaga fifine ke he fale ia, ka e nakai fai tagata i kaina. Kua liu tumau a ia ke taha mo e hafa e tau ti toka e tau pepa, tau tohi, mo e numera telefoni haana. Falu magaaho ne logona hifo e ia kua fai tagata i kaina, ka e nakai hafagi e gutuhala. Taha e aho ne fano e matakainaga ke he fale, ne hafagi he fifine totonu e gutuhala mo e ui: “Fakamolemole hau ki loto. Totou e au e tau mena oti ne tamai e koe mo e fakatali au ia koe.” Ko e fifine nei ne fa e moua e tuluiaga chemotherapy ti nakai fia loto ke tutala ke he tau tagata. Ne talia e ia e fakaako Tohi Tapu. Ne logona hifo he matakainaga fifine kua mailoga e Iehova mo e taui e tau laliaga haana.

20. Fēfē e logonaaga haau ke he fiafia haana ko Iehova ki a koe?

²⁰ He fakaako e tautolu he vala tala nei, ne kitia e Iehova e tau mena oti kua taute e tautolu mo e kumikumi e tau loto he tau tagata oti. Nakai logona hifo e tautolu kua lali a ia ke kumi kelea ki a tautolu po ke fakamau e tau hehē takitaha ha tautolu. Ka kua fakatata a tautolu ki a Iehova ha kua iloa e tautolu kua leveki e ia a tautolu ti manako mooli a ia ke lagomatai mo e taui a tautolu ma e mitaki ne taute e tautolu.