Kua Foaki Fakamakai e Lautolu a Lautolu​—I Maikoronesia

KUA tupu hake a Katherine i United States ti papatiso he 16 e tau ke eke mo taha he Tau Fakamoli a Iehova. Ne eketaha fakamakamaka a ia ke he gahua he fonua ka e tote e taliaaga ke he fekau he Kautu he matakavi ne fakamatala a ia. Pehē a ia: “Totou au hagaao ke he tau tala ke he tau tagata ne liogi ke he Atua ke fakafano mai taha ke lagomatai a lautolu ke iloa a Ia. Fa manako au ke moua e tagata pihia, ka e nakai moua ai.”

He mole e fakamatala ke he tau tau loga he matakavi taha ia, kamata a Katherine ke manamanatu ke hiki ke he matakavi ne lahi e fakateliga he tau tagata ke he fekau he Kautu. Ka e manamanatu a ia, to maeke la nakai a ia ke taute. Lagataha laia he moui haana ne fano kehe mai he magafaoa haana, ke ua ni e faahi tapu, ti manamanatu tumau a ia ki kaina. Ka e kautū e manako haana mai he loto ke moua e fiafia ke lagomatai a lautolu kua kumi ki a Iehova. He mole e manamanatu ke he falu matakavi ka hiki a ia ki ai, ne tohi a ia ke he la i Guam mo e moua e tau vala tala ne lata mo ia. Ia Iulai 2007, he 26 e tau he moui, ne hiki atu a Katherine ki Saipan, ko e aelani he Moana Pasifika, kavi ke he 10,000 e kilomita mai he kaina haana. Fakahiku fēfē e hiki haana?

TALI KE HE UA E LIOGI

Nakai leva he hoko atu ke he fakapotopotoaga foou, ne feleveia a Katherine mo Doris, ko e fifine ne 40 tumā e tau, ne talia e fakaakoaga he Tohi Tapu. He oti e fakaako e laua e tau veveheaga tolu fakamua he tohi Fakaako he Tohi Tapu, ne tupetupe a Katherine. “Ko e tagata fakaako mitaki a Doris, ti ai fia loto au ke moumou e tuaga ia,” he ui e ia. “Nakaila taute au ha fakaako Tohi Tapu ne matutaki tumau ti logona hifo kua lata a Doris ke fakaako mo e taha matakainaga fifine ne lahi atu e lotomatala, liga taha ni he atu haana.” Ne ole a Katherine ki a Iehova he liogi ke lagomatai a ia ke moua e matakainaga fifine kua hako ke age e tagata fakaako Tohi Tapu haana ki ai. Ti fifili a ia ke tala age ki a Doris e hikiaga he faiaoga fakaako.

“Ato tahake mai e au e manatu nei,” he ui e Katherine, “ne tala mai a Doris ki a au kua manako a ia ke tutala mo au hagaao ke he lekua. Mole e fanogonogo ki a ia, ne tala age au ki a ia e puhala ne lagomatai e Iehova au ke fehagai mo e tuaga pihia he moui. Fakaaue a ia ki a au.” Ti tala age a Doris ki a Katherine: “Kua fakaaoga e Iehova a koe ke lagomatai au. Ko e aho fakamua ne hau a koe ke he kaina haaku, kua totou tulā he totou e au e Tohi Tapu haaku. Tagi au he ole ke he Atua ke fakafano mai taha ke lagomatai au ke maama e Tohi Tapu. Ti nokonoko e koe e gutuhala haaku. Kua tali e Iehova e liogi haaku!” Mokulu e tau hihina mata ha Katherine he talahau e tala he magaaho tupetupe ia. Pehē a ia: “Ko e tau kupu ha Doris e tali ke he liogi haaku. Fakakite e Iehova ki a au kua maeke ia au ke matutaki e fakaako.”

Ne papatiso a Doris he 2010, ti mogonei kua loga e fakaako Tohi Tapu ni haana ne taute. Ui e Katherine: “Ko e fiafia ha ia haaku ha kua fakamooli e manako haaku kua leva ke lagomatai taha ne loto fakamooli ke eke mo fekafekau ha Iehova!” Mogonei, ne fekafekau fiafia a Katherine ko e paionia pauaki he aelani he Pasifika ko Kosrae.

TOLU E PALEKO​—PUHALA KE FEHAGAI KI AI

Molea e teau he tau matakainaga mai he tau motu kehe (ne 19 ke he 79 e tau tau) ne kua fekafekau he tau matakavi ne manako lagomatai lahi mahaki i Maikoronesia. Ko e tau logonaaga he tau tagata gahua makutu nei ne kua fakakite e Erica, ne hiki atu ki Guam he 2006 he 19 e tau he moui. Pehē a ia: “Fiafia lahi ha ia he paionia he matakavi ne manako lahi e tau tagata ke he kupu mooli. Fakaaue lahi au he lagomatai e Iehova au ke taute e matagahua nei. Ko e puhala ne mua ue atu he moui!” Mogonei, fiafia a Erica ke fekafekau ko e paionia pauaki i Ebeye he Marshall Islands. Mooli, ko e fekafekau he motu kehe kua ha ha ai foki e tau paleko. Kia manamanatu a tautolu ke he tolu e paleko ia ti kitia e puhala kua fehagai ki ai a lautolu ne hiki atu ki Maikoronesia.

Puhala moui. He mole e hoko atu ke he aelani ha Palau he 2007, ko Simon ne 22 e tau he moui ne mafiti ke iloa kua tote e totogi haana ke he totogi haana ne moua he motu ne hau a ia ko Igilani. “Maeke au ke fakaako ke ua fakatau ha mena ne loto au ki ai. Mogonei, ne fifili fakamitaki e au e tau mena kai ke fakatau, ti kumi viko au ke he tau fale koloa ke moua e tau mena tau laukauka. Ka malona taha mena, kumi e au e tau vala kua fitā e fakaaoga ti lali ke moua e taha tagata ke lagomatai au ke taute ai.” Lauia fēfē a ia he lata ke fakamukamuka e puhala moui? Pehē a Simon: “Lagomatai ai au ke iloa e mena ne aoga mooli he moui mo e puhala ke ai loga e koloa. Kitia mooli e lima fakaalofa he Atua ki a au he tau tuaga loga. He fitu e tau kua fekafekau au hinei, fai mena kai tumau au mo e mena ke mohe ai.” Mooli, lalago e Iehova a lautolu ne fakamukamuka e tau momoui ha kua manako a lautolu ke kumi fakamua e Kautu.​—Mata. 6:32, 33.

Manamanatu tumau ki kaina. Pehē a Erica: “Tata lahi au ke he magafaoa haaku, ti tupetupe au neke lauia e fekafekauaga haaku ha kua manamanatu tumau ki kaina.” Ko e heigoa ne taute e ia ke mau amaamanaki ki ai? “Ato hiki, ne totou e au e tau vala tala he Kolo Toko ke he manamanatu tumau ki kaina. Tauteute mooli he mena nei e loto haaku ke fehagai mo e paleko ia. He taha vala tala, ne fakamafana he matua fifine haana tama fifine hagaao ke he fakaalofa ha Iehova, he pehē, ‘Mua atu e leveki ha Iehova ki a koe ke he levekiaga haaku.’ Fakamalolō mooli he fakamafanaaga ia au.” Ko Hannah mo e haana taane ko Patrick ne fekafekau i Majuro he Marshall Islands. Ne fahia a Hannah ke he manamanatu tumau ki kaina he hagaaki ke he tau matakainaga he fakapotopotoaga ha laua. Pehē a ia: “Matutaki au ke fakaaue ki a Iehova ma e tau matakainaga ha tautolu he lalolagi katoa ha ko lautolu foki ko e magafaoa haaku. Ane mai nakai fai lalagoaga fakaalofa mai ia lautolu, to nakai maeke au ke fekafekau ke he matakavi ne manako lahi ke he lagomatai.”

Mahani ki ai. “He hoko atu a koe ke he motu foou, loga e mena ne nakai tatai,” he talahau e Simon. “Falu mogo misi e au e tau vaiga mo e maama oti ai.” Pehē a Erica: “He mogo fakamua, logona hifo e au e logonaaga nakai felauaki, ka e lagomatai he mena ia au ke manamanatu e kakano mooli haaku he hiki. Nakai hiki au ke moua e tau aoga fakatagata ka e ke lahi e mena ke taute ma Iehova.” Lafi e ia: “Fai magaaho, feaki e au e tau tuaga kapitiga homo ue atu, ne tokiofa e au.” Ne gahua lahi a Simon ke fakaako e vagahau Palau, ke maeke ia ia ke ‘fakalahi haana loto’ ke he tau matakainaga he matakavi. (2 Kori. 6:13) Ko e tau laliaga haana ke fakaako e vagahau ne kua fakatata lahi a ia ke he tau matakainaga. Ē, he mogo ka gahua auloa a lautolu ne o mai foou mo e tau matakainaga he matakavi, ne helehele he tau matakau ua ia e taui he moua e tau tuaga kapitiga tata he fakapotopotoaga. Ko e heigoa falu taui ne moua e lautolu ne foaki fakamakai e lautolu a lautolu ke fekafekau he matakavi ne manako lahi ke he lagomatai?

‘FAKALAHI E HELEHELE’

Ne talahau he aposetolo ko Paulo: “Ka ko ia kua fakalahi hana saito kua gana, to fakalahi foki hana helehele mai.” (2 Kori. 9:6) Ko e matapatu fakaakoaga ne fakakite he talahauaga nei kua hagaao mooli ki a lautolu ne fakalahi atu e fekafekauaga ha lautolu. Ko e heigoa e tau fua ne moua e lautolu he ‘fakalahi e helehele’ i Maikoronesia?

I Maikoronesia, loga agaia e tau magaaho ke kamata e tau fakaako Tohi Tapu mo e ke kitia mata e puhala ne holo ki mua fakaagaaga e tau tagata he fakaako mo e fakagahua e kupu mooli he Tohi Tapu. Ko Patrick mo Hannah ne fakamatala foki i Angaur, ko e aelani tote ne 320 e tagata. He mole ua e mahina he fakamatala i ai, ne feleveia a laua mo e matua fifine tokotaha. Ne talia mafiti e ia e fakaako Tohi Tapu, hufia ke he kupu mooli, ti taute e tau hikiaga lalahi ke he moui haana. Ui e Hannah: “He oti e tau fakaako takitaha, he ō kehe he kaina haana he tau pasikala ha maua, ne feonoaki a maua ti talahau: ‘Fakaaue ma Iehova!’” Lafi e Hannah: “Iloa e au to futia mai e Iehova e fifine nei ki a ia he ha puhala, ka e ha kua fekafekau a maua he matakavi ne manako lahi ke he lagomatai kua maeke ia maua ke moua mo e lagomatai a lautolu nei ne tuga e tau mamoe ke iloa a Iehova. Taha anei he tau mena tutupu lauia mitaki he moui katoa ha maua!” He talahau e Erica, “ka lagomatai e koe e taha ke iloa a Iehova, to helehele e koe e olioli ne nakai fai fakatataiaga!”

MAEKE NAKAI A KOE KE FAI VALA?

Laulahi he tau motu, kua manako ke loga foki e tagata fakamatala he Kautu. To eke nakai a koe mo taha ia lautolu kua hiki ke he tau matakavi ne manako lagomatai? Ole ki a Iehova he liogi ke fakamalolō e manako haau ke fakalahi e fekafekauaga haau. Fakatutala e matakupu mo e tau motua he fakapotopotoaga, mo e leveki takaiaga, po ke mo lautolu ne kotofa ke fekafekau he motu ne manako lagomatai. Ka kamata a koe ke taute e tau pulega, tohi ke he la ne leveki e matakavi kua manako a koe ke fekafekau i ai, ti ole foki ma e tau vala tala.a Liga maeke foki a koe ke fakalataha mo e tokoafe he tau matakainaga ne fuata mo e momotua, nofo tokotaha po ke mau, kua foaki fakamakai e lautolu a lautolu mo e kamata e fiafia he ‘fakalahi e helehele.’