Ko e Ha kua Lata ke Fiafia ke he Kautu he Atua?

Totou miliona e tau tagata he lalolagi katoa ne fakavē e amaamanakiaga ha lautolu ke he Kautu he Atua. Ne mumuitua a lautolu ke he fakafifitakiaga ne fakatoka e Iesu, ne fakaako e tau tutaki haana ke liogi: “Kia hoko mai hau a kautu. Kia eke hau a finagalo ke he lalolagi.”​​—Mataio 6:10.

Matakehe ai, pete he tokologa e tau tagata ne fiafia lahi ke he Kautu he Atua, laulahi he tau lotu ne tuga kua fakateaga ki ai. Hagaao ke he mena nei, ne mailoga he tagata fakamau tala tuai ko H. G. Wells e ofoofogia ke he peehiaga ha Iesu he “aoga lahi mahaki . . . he tau fakaakoaga hagaao ke he mena ne talahau e ia ko e Kautu he Lagi” ka e ui e Wells, ko e fakaakoaga nei kua “fakateaga lahi mahaki . . . ke he fakaakoaga he loga e tau lotu Kerisiano.”

He nakai tuga e tau lotu ia, ne peehi fakamalolō he Tau Fakamoli a Iehova e Kautu he Atua. Manamanatu la: Ko e matapatu senolo nei ha mautolu ne totou a koe ki ai kua lolomi ai ke he 220 e vagahau. Teitei 46 e miliona lagaki he tau fufuta takitaha ne lolomi, ti kua mua atu e loga he mekasini nei kua tufatufa ke he lalolagi katoa. Ti ko e heigoa e matapatu fekau he senolo nei? Mailoga e mataulu katoa: Ko e Kolo Toko Fakapuloaaga he Kautu a Iehova.a

Ko e ha e Tau Fakamoli a Iehova ne fakamalolō lahi ke fakapuloa po ke fakailoa e Kautu he Atua? Taha mena, kua talitonu a mautolu ko e Kautu he Atua e matapatu fekau he tohi ne mua atu e aoga he lalolagi​​—ko e Tohi Tapu. Lafi ki ai, kua mauokafua a mautolu ko e Kautu he Atua ni e tali moolioli ke he tau lekua ne fehagai mo e tau tagata he vahā nei.

He hagaaki ke he Kautu he Atua, kua eketaha e Tau Fakamoli a Iehova ke muitua ke he fakafifitakiaga ha Iesu. He ha ha he lalolagi, ne hagaaki e moui katoa mo e fekafekauaga haana ke he Kautu he Atua. (Luka 4:43) Ko e ha e Kautu ne uho lahi ki a Iesu? Ti ko e heigoa e kakano ma haau? Kua uiina e mautolu a koe ke manamanatu ke he tau tali he Tohi Tapu, ka fakatutala he tau vala tala ka mumui mai.