TAU VALA TALA I MUA | KAUTU HE ATUA—KO E HEIGOA E KAKANO MA HAAU?

Kautu he Atua—To Aoga Fēfē ki a Koe?

Liga maama e koe mai he tau vala tala kua mole e kakano lahi he Kautu he Atua ke he Tau Fakamoli a Iehova. Ti liga ofoofogia a koe he falu monuina anoiha he Kautu he Atua ne kua fakatutala i ai. He magaaho taha, liga manamanatu a koe to mooli nakai e tau maveheaga ia.

Hako a koe ke mataala he nakai talitonu ke he tau mena oti kua logona e koe. (Tau Fakatai 14:15) He falu puhala, ko e mataala haau ka liga fakatatai ke he tau Perea i tuai.a He mogo fakamua ne tala age e tala mitaki he Kautu ke he tau Perea, ne talia e lautolu e mena ne logona e lautolu, ka e nakai ha kua manako a lautolu ke mooli ai. Ka e, kumikumi fakamakutu e lautolu e tau Tohiaga Tapu “po ke moli e tau mena ia.” (Gahua 17:11) He taha fakamaamaaga foki, kua fakatatai he tau Perea e tala mitaki ne logona e lautolu mo e mena ne talahau he Tohiaga Tapu. Nakai leva, ne talitonu a lautolu ko e tala mitaki kua fakavē katoatoa ke he Kupu he Atua.

Kua uiina mafanatia he Tau Fakamoli a Iehova a koe ke taute pihia foki. Puhala he ha mautolu a fakaholoaga fakaako Tohi Tapu nakai totogi, kua foaki atu e mautolu ki a koe e magaaho ke fakatatai e taofiaga he Tau Fakamoli a Iehova hagaao ke he Kautu he Atua mo e tau mena ne fakaako he Tohi Tapu.

Lafi ke he kumikumiaga haau ke he Kautu he Atua, maeke he fakaako haau he Tohi Tapu ke lagomatai a koe ke moua e tau tali ke he falu he tau hūhū aoga lahi he moui.

Tutupu mai a tautolu i fe?
Ko e heigoa e kakano he moui?
Ko e ha ne fakaatā he Atua e matematekelea?
Ko e heigoa ka tupu ki a tautolu ka mamate?
To moumou kia e lalolagi?
Ko e heigoa e kei ke he fiafia he moui he magafaoa?

Mua atu, ko e fakaako he Tohi Tapu ka lagomatai a koe ke “fakatata atu . . . ke he Atua.” (Iakopo 4:8) Fakahiku, ko e fakatata lahi haau ke he Atua, to kitia lahi e koe e puhala ka foaki mai he Kautu he Atua e tau mena mitaki ma haau—nakai ni he mogonei ka e tukulagi. Ne pehē a Iesu he liogi ke he Matua haana: “Ko e moui tukulagi foki hanai, kia iloa e lautolu a koe, ko e Atua moli tokotaha ni, katoa mo ia ne fakafano mai e koe, ko Iesu Keriso haia.”—Ioane 17:3.

Maeke e Tau Fakamoli a Iehova ke fakaaoga e tohi nei ke fakaako e Tohi Tapu mo koe.

Ke ole ma e fakaako Tohi Tapu fakatagata ne nakai totogi, ole ke he taha he Tau Fakamoli a Iehova po ke fakapuke e ole he www.pr418.com. (Kikite OLE FAKAAKO TOHI TAPU he lau he kaina)

a Ko Perea ko e maaga i Maketonia i tuai.

Kakano he Kautu he Atua ki a Ia

Nakaila leva ia, ko e tama fifine hogofulu tau ne higoa ko Folake ne kotofa ke tohi e tala ma e aoga ke he matakupu “Ko e Mena Uho Ki a Au he Lalolagi Nei.” Fifili e Folake ke tohi e kakano kua fiafia a ia ke tala age ke he falu hagaao ke he Kautu he Atua.

“Ko e Kautu he Atua ko e fakatufono mooli,” he fakamaama e Folake. “Ka e nakai kitia ai, ti nakai maeke a koe ke kitia—pete foki ka tau tioata a koe!”

Ne tohi e Folake hagaao ke he tau monuina he Kautu ne amaamanaki lahi a ia ki ai. He talahau falu lekua ka fakamafola he Kautu, ne tohi e ia, “Momoko au ka kitia e tau tagata nakai fai kaina ne nonofo he tau puhalatū” ti pihia mo e “tau tama ne matehoge he tau faahi kehekehe he lalolagi.” Lafi e ia, “Liu au fiafia ka totou e Isaia 65:21.” Hagaao ke he tau tagata ka nonofo i lalo he pule he Kautu he Atua, ne mavehe he kupu ia: “To ta fale e lautolu, mo e nonofo ai a lautolu; to to e lautolu e tau ulu vine, mo e kai ai e lautolu ha lautolu a tau fua.”

Pehē a Folake kua amanaki foki a ia ke he magaaho ka utakehe he Atua e tau gagao oti kana, puhala he Kautu haana. He tala haana, ne fatiaki e ia e Fakakiteaga 21:4, ne pehē “to holoholo kehe he Atua e tau hihina mata oti mai he tau mata ha lautolu; ti nakai tuai fai mate, po ke fakatutuku, po ke tagi, ti nakai tuai fai matematekelea.” Fakahiku e ia he liu talahau ko e tutala hagaao ki a Iehova mo e haana Kautu ko e mena ne uho lahi ki a ia he lalolagi nei. Maaliali ai, kua uho lahi e Kautu he Atua ke he loto he tama fifine tote nei!