Kautu he Atua​​—Ko e Kakano ki a Iesu

He kitia ke he vala tala fakamua, ne fakavē e moui ha Iesu ke he “ogoogo mo e fakamatala e vagahau mitaki he kautu.” (Luka 8:1) Ne fakamalolō lahi a ia, ti totou teau e tau maila ne fano hui ai he motu ko Isaraela ke fakaako e tau tagata hagaao ke he Kautu he Atua. Ne fakamau e fekafekauaga ha Iesu i loto he fā e tohi Evagelia, ti molea e laga 100 e hagaao ke he Kautu. Laulahi he tau hagaaoaga ia ko e tau kupu ha Iesu, ti liga ko e vala tote noa ni a ia he tau talahauaga oti haana ke he Kautu he Atua!​​—Ioane 21:25.

Ko e ha ne uho lahi e Kautu ki a Iesu he mogo ne nofo a ia he lalolagi? Taha mena, iloa e Iesu kua fifili he Atua a ia ke Pule ki ai. (Isaia 9:6; Luka 22:28-30) Ka kua nakai hagaaki a Iesu ke moua e pule malolō po ke lilifu ma haana ni. (Mataio 11:29; Mareko 10:17, 18) Ne fakapuloa e ia e Kautu ha ko e tau kakano ne mua atu ke he tau manako haana. Fakamua aki, fiafia a Iesu ke he Kautu he Atuaa ha ko e mena ka taute ma lautolu ne ofania e ia​​—haana Matua he lagi mo e haana tau tutaki tua fakamooli.

KO E HEIGOA HE KAUTU KA TAUTE MA E MATUA HA IESU

Fakaalofa hofihofi a Iesu ke he haana Matua he lagi. (Tau Fakatai 8:30; Ioane 14:31) Kua fiafia a ia ke he tau aga mitaki he Matua haana, tuga e Haana fakaalofa, Haana fakaalofa hofihofi, mo e Haana fakafili tonu. (Teutaronome 32:4; Isaia 49:15; 1 Ioane 4:8) Ti mooli ai, kua vihiatia e Iesu e tau pikopiko ne talahau ke he haana Matua​​—ko e tau pikopiko tuga kua fakateaga e Atua ke he matematekelea he tagata mo e manako e Atua ke matematekelea a tautolu. Taha kakano anei ati makai a Iesu ke fakapuloa e “vagahau mitaki he kautu”​​—iloa e ia to hoko e magaaho ke tokoluga ue atu e tuaga he higoa he haana Matua. (Mataio 4:23; 6:9, 10) To taute fēfē ai?

Puhala mai he Kautu, to taute e Iehova e tau hikiaga lalahi mo e mitaki ke lata mo e tau tagata. “To holoholo kehe he Atua e tau hihina mata oti” mai he tau mata he tau tagata tua fakamooli. To utakehe e Iehova e tau mena ne fakatupu e tau hihina mata ia, mo e to “nakai tuai fai mate, po ke fakatutuku, po ke tagi, ti nakai tuai fai matematekelea.” (Fakakiteaga 21:3, 4) Puhala mai he Kautu, to utakehe he Atua e tau matematekelea oti kana he tagata.b

Nakai ofo ai he makai pihia a Iesu ke tala age ke he tau tagata hagaao ke he Kautu! Iloa e ia to fakakite ai e malolō lahi mo e fakaalofa hofihofi mooli he haana Matua. (Iakopo 5:11) Iloa foki e Iesu to tamai he Kautu e tau mena aoga ke he tau tagata ne fakaalofa a ia ki ai​​—tau tagata tua fakamooli.

KO E HEIGOA HE KAUTU KA TAUTE MA E TAU TAGATA TUA FAKAMOOLI

He leva ato hau a Iesu ke he lalolagi, ne nofo a ia he lagi mo e haana Matua. Ne fakaaoga he Matua e Tama ke tufuga e tau mena oti kana​​—mai he tau mena ofoofogia lalahi he lagi ko e tau fetu ne loga lahi mo e tau putuputuaga fetu ke hoko ke he palaneta fulufuluola ha tautolu mo e tau mena momoui ne nonofo ai. (Kolose 1:15, 16) Mai he tau mena oti ia, ne “fiafia foki” a Iesu ke he tau tagata.​​—Tau Fakatai 8:31.

Ko e fakaalofa ke he tau tagata e matapatu he fekafekauaga ha Iesu. Mai he kamataaga, ne talahau fakamaaliali e ia kua hau a ia ke he lalolagi ke “fakamatala e vagahau mitaki” ki a lautolu kua nonofogati. (Luka 4:18) Ka e nakai tutala hokoia ni a Iesu ke lagomatai e tau tagata. Lagaloga ne fakakite e ia haana fakaalofa ma e tau tagata. Ma e fakatai, magaaho ne fakapotopoto mai e tau tagata tokologa ke fanogonogo ki a Iesu, “ti hofihofi ai hana fakaalofa kia lautolu, ati fakamalolo e ia e tau gagao ha lautolu.” (Mataio 14:14) Ko e tagata ne mamahi lahi ha ko e gagao ne fakakite e tua haana na maeke a Iesu ke fakamalolō a ia ka manako mooli ki ai, ti omoomoi a Iesu ha ko e fakaalofa. Ne fakamaulu e ia e tagata, ti tala age mo e fakaalofa hofihofi: “Na loto au ki ai, kia mea a koe.” (Luka 5:12, 13) He kitia e Iesu e kapitiga haana ko Maria ne momoko he mate e tugaane haana ko Lasalo, “ati mamahi ai hana finagalo,” “fakaatukehe,” ti “tagi” a Iesu. (Ioane 11:32-36) Ne taute e ia e mena ofoofogia lahi​​—liu a Iesu fakamoui mai a Lasalo pete kua fā tuai e aho he mate a Lasalo!​​—Ioane 11:38-44.

Ka e iloa e Iesu, ko e fakatotoka ne foaki e ia he mogoia na kū ni. Ne mailoga e ia ko lautolu oti ne fakamaulu e ia to liliu ke gagao mo lautolu oti ne fakaliu tu mai to liliu ke mamate. Ka e iloa foki e Iesu to fakaotioti tukulagi he Kautu he Atua e tau lekua ia. Ko e kakano ia ti nakai taute hokoia ni e Iesu e tau mana; ka e makutu foki a ia he fakamatala “e vagahau mitaki he kautu.” (Mataio 9:35) Ko e tau mana haana ne fakakite ko e vala tote ni he tau mena loga ka nakai leva ti tamai he Kautu he Atua ke he lalolagi katoa. Manamanatu la ke he tau maveheaga he Tohi Tapu hagaao ke he magaaho ia.

• 

  Nakai fai lekua e malolō tino.

  “Ti fakaala ai e tau mata he tau tagata mata pouli, to logona foki he tau teliga he tau tagata teliga tuli; Ti hopohopo ai e tagata kulikuli tuga ne aila, to kalaga fiafia foki e alelo he tagata kuhukuhu.” Lafi ki ai, “to nakai pehe mai foki taha kua nofo ai, Kua gagao au.”​​—Isaia 33:24; 35:5, 6.

• 

  Nakai tuai fai mate.

  “To eke ni e motu ma e tau tagata tututonu, to nonofo muatua ai a lautolu.”​​—Salamo 37:29.

  “To fakaoti tukulagi e ia e mate; to holoholo kehe foki he Iki ko Iehova e tau hihina mata mai he tau mata oti.”​​—Isaia 25:8.

• Ko lautolu ne mamate to liu momoui.

  “Ha ko e mena hoko ke he aho ke logona ai ke he hana leo a lautolu katoa ha he tau tukuaga, mo e o mai ai.”​​—Ioane 5:28, 29.

  “[To] liu foki tutu mai a lautolu kua mamate.”​​—Gahua 24:15.

• 

  To fai kaina mo e tau gahua.

  “To ta fale e lautolu, mo e nonofo ai a lautolu; to to e lautolu e tau ulu vine, mo e kai ai e lautolu ha lautolu a tau fua. Nakai ta fale e lautolu ke nonofo ai e falu, ti nakai to uluvine e lautolu ke kai ai e falu; . . to oti ai kia lautolu ne fifili e au e tau mena ne eke ai ke he tau lima ha lautolu.”​​—Isaia 65:21, 22.

• 

  Nakai fai felakutaki.

  “Kua fakahiku e ia e tau [felakutaki] ato hoko ke he fakatulakiaga he lalolagi.”​​—Salamo 46:9.

  “To nakai nikiti atu he taha motu e pelu ke he taha motu, to nakai liu ako tau foki e lautolu.”​​—Isaia 2:4.

• 

  Nakai tuai fai hoge.

  “Kua fua mai he kelekele hana tau fua; ko e Atua, ko e ha mautolu a Atua kua fakamonuina mai e ia a mautolu.”​​—Salamo 67:6.

  “To ha i ai e puke aloalolima he tau saito ke he motu, ki luga he fuga mouga.”​​—Salamo 72:16.

• Nakai tuai nonofogati.

  “Ha ko e mena nakai nimo fakaoti a lautolu ne nonofogati.”​​—Salamo 9:18.

  “Mena laveaki e ia a ia ne nofogati he hana kalaga mai; katoa mo ia kua matematekelea, mo ia kua nakai fai lagomatai. To fakaalofa a ia kia ia kua lolelole, mo ia kua nofogati; to fakamoui e ia a lautolu kua nonofogati.”​​—Salamo 72:12, 13.

Ka manamanatu a koe ke he tau maveheaga ia hagaao ke he Kautu he Atua, maeke nakai ia koe ke kitia e kakano ne uho lahi e Kautu ki a Iesu? He nofo a ia he lalolagi, ne makai lahi a ia ke tutala hagaao ke he Kautu he Atua ke he ha tagata ka fanogonogo, ha kua iloa e ia to fakaotioti he Kautu e tau lekua fakatupetupe oti kana ne kitia e tautolu he vahā nei.

Fiafia nakai a koe ke he tau maveheaga he Tohi Tapu hagaao ke he Kautu? Ka fiafia, to maeke fēfē ia koe ke iloa atu foki hagaao ke he Kautu ia? Ti ko e heigoa haau ka taute ke iloa mooli to moua e koe e tau monuina mai he Kautu ia? To tali he vala fakahiku he fufuta tala nei e tau hūhū ia.