Tokologa Ka Hao Mai he Fakaotiaga​—Maeke Foki a Koe

Kua fakailoa mai he Tohi Tapu ki a tautolu ko e fakaotiaga to putoia e moumouaga: “Ha ko e vaha ia ke lahi ai e matematekelea, nakai pihia taha mena tali mai he kamataaga he lalolagi, kua hoko ni ke he vaha nai . . . Aua he fakaku e vaha ia, po kua nakai fakamoui taha.” (Mataio 24:21, 22) Ka e mavehe mai e Atua ki a tautolu to tokologa e tau tagata ka fakahao: “Ha ne mole atu foki e lalolagi . . . ka ko e tagata kua eke e finagalo he Atua to tumau a ia tukulagi.”​—1 Ioane 2:17.

Ka manako a koe ke hao mai he lalolagi hane mole atu mo e ‘tumau tukulagi,’ ko e heigoa haau kua lata ke taute? Lata kia a koe ke kamata ke tatanaki e tau koloa po ke taute falu fakatokatokaaga? Nakai. Kua fakamalolō fakalahi mai he Tohi Tapu a tautolu ke kehe e tau mena ka tuku fakamua. Totou e tautolu: “Ko e hanai, to fakaotioti e tau mena oti ia, po ke fefe ha mutolu a mahani ke lata ai ke he tau mahani mitaki mo e tau mahani Atua; Kua fakatalitali mo e foli atu kia hoko mai e aho he Atua.” (2 Peteru 3:10-12) Fakakite he tau kupu nei ko e “tau mena oti ia” ka fakaotioti kua putoia e tau pule he lalolagi matahavala nei mo lautolu oti kana kua talia e pule ia ka e nakai ko e pule he Atua. Maaliali ai, ka tatanaki e tautolu e tau koloa he tino, to nakai fakahao he tau mena ia a tautolu mai he moumouaga.

Mooli ai, ko e fakahaoaga ha tautolu kua putoia e fakamooli ki a Iehova ko e Atua mo e fakaako hagaao ke he tau mahani mo e tau gahua kua fakafiafia a ia. (Sefanaia 2:3) He nakai muitua ke he tau tagata tokologa he vahā nei ne fakateaga ke he tau fakamailoga maaliali ne fakakite mooli kua nonofo a tautolu he magahala aoga lahi, kua lata ia tautolu ke “foli atu [ke manatu] kia hoko mai e aho he Atua.” Maeke e Tau Fakamoli a Iehova ke fakakite atu ki a koe he Tohi Tapu e puhala ke maeke a koe ke hao he aho ia ka hoko mai.