TAU HŪHŪ TOHI TAPU KUA TALI

Koēnaia kia e moui nei?

Manamanatu nakai a koe na fai mena foki he moui nei, nakai ni ke fefeua, gahua, faitaane mo e faihoana, feaki he magafaoa, ti fuakau? (Iopu 14:1, 2) Fakakite he Tohi Tapu kua manamanatu foki e tau tagata pulotu ke he mena nei.​​—Totou Fakamatalaaga 2:11.

Fai kakano nakai e moui? Fakamua, kua lata ia tautolu ke hūhū, Kamata fēfē e moui? Tokologa kua talitonu ha i ai e Tufuga pulotu ne taute e tau mena oti, he onoono a lautolu ke he talagaaga ofoofogia he uhoniu mo e tino katoa ha tautolu. (Totou Salamo 139:14.) Kaeke ke pihia, liga fai kakano a ia ne tufuga a tautolu! He fakaako e kakano ia to lafi ke he aoga he moui ha tautolu.

Ko e ha ne tufuga e tau tagata?

Fakamonuina he Atua e hoa mau fakamua mo e age ki a laua e kotofaaga uho lahi. Ne finagalo e ia ma laua ke fakapuke e lalolagi, eke e lalolagi mo parataiso, mo e momoui tukulagi.​​—Totou Kenese 1:28, 31.

Ne fakatuai e finagalo he Atua he magaaho ne fakafualoto e tau tagata ke he pule haana. Ka e nakai tiaki he Atua a tautolu​​—po ke finagalo haana. Fakamafana he Tohi Tapu a tautolu kua gahua agaia e Atua ke fakahao e tau tagata ne tua ki a Ia mo e fakamooli e finagalo haana ke lata mo e lalolagi! Ti manako e Atua ke iloa e koe e moui tuga ne finagalo e ia ki ai! (Totou Salamo 37:29.) Fakaako mai he Tohi Tapu e puhala kua maeke ia koe ke aoga mai he finagalo he Atua.