TAU VALA TALA I MUA | TOHI TAPU—KO E TALA HE KAUTŪAGA
Hao Mai e Tohi Tapu he Popo
KO E MENA NE TUPU: Ko e tau vala he akau mo e tau kili manu ne fakaaoga lahi he tau tagata tohia Tohi Tapu mo e tau tohikupu ke tohitohi.a (2 Timoteo 4:13) Fakahagahaga kelea fēfē he tau koloa tohitohi nei e haoaga he Tohi Tapu?
Mukamuka e tau koloa tohitohi ne moua mai he akau ke mahē, maaki mo e molūlū. “Ko e lautohi ne taute mai he akau ne hoko ni ki mui ti popo mo e toe hifo e tau kavekave mo e tau efu,” he talahau he tau Egyptologist ko Richard Parkinson mo Stephen Quirke. “Ka tuku e viko tohi he tau mena ke leveki, ne fa polopolokau po ke popo he pahahū, ti kai foki he tau kumā po ke tau moko, mua atu ke he tau lō tea, ka tanu ai.” Ko e falu tohi kili akau he magaaho ne moua ai, ne kua tokanoa he laā po ke pahahū, ti mafiti ke malona.
Maō e kili manu ka fakatatai ke he kili akau, ka e popo fakahaga foki ka nakai leveki po ke toka he tau mena ne makalili lahi mahaki po ke vela lahi mahaki, mo e pahahū po ke toka he laā.b Ne kai foki he tau moko ikiiki e tau kili manu. He pihia, ko e tau fakamauaga tuai, ne talahau he tohi Everyday Writing in the Graeco-Roman East, “kua fa lavea ke leva e mau.” Ti ka popo e Tohi Tapu, to liga galo foki e fekau i loto.
PUHALA NE HAO E TOHI TAPU: Ko e fakatufono Iutaia ne poaki ke he tau patuiki ke “tohi ai e ia mana e tohi he fakatufono nai,” ko e tau tohi fakamua ne lima he Tohi Tapu. (Teutaronome 17:18) Lafi ki ai, ne loga e tau fakamauaga tuai ne talaga he tau tohikupu pulotu, ti hoko ke he senetenari fakamua V.N., kua moua e tau Tohiaga Tapu ke he tau sunako i Isaraela mo e hoko atu foki ke he motu mamao ko Maketonia! (Luka 4:16, 17; Gahua 17:11) Hao fēfē e falu fakamauaga tuai ke hoko mai ke he vahā nei?
Tau fakamauaga tuai ne iloa ko e Tau Vakai he Tahi Mate ne loga e tau tau ne hao ai ha kua tuku i loto he tau siā ne toka he tau ana he matakavi mafana
“Ne mahuiga ke he tau Iutaia ke tuku e tau tohi vakai he Tohiaga Tapu i loto he tau siā ke puipui ai,” he talahau he pulotu he New Testament ko Philip W. Comfort. Muitua foki he tau Kerisiano e aga ia. Ko e mena ia, ne loga e tau fakamauaga tuai he Tohi Tapu ne moua he tau siā kelekele, mo e he tau poko pouli ikiiki mo e tau ana he tau matakavi ne to lahi e magomago.
KO E FUA NE MOUA: Totou afe e tau vala he tau fakamauaga tuai he Tohi Tapu—falu ne molea e 2,000 tau—ne hao ti hoko mai ke he vahā nei. Nakai fai tohi tuai pihia ne loga e tau fakamauaga tali mai i tuai.
a Ko e papyrus ko e koloa tohitohi ne taute mai he uho akau ne tupu he vai, pihia foki e higoa he akau ia. Moua mai e taha koloa tohitohi he tau kili manu.
b Ma e fakatai, ko e lagaki ne fakamooli ai e U.S. Declaration of Independence na tohi he kili manu. Mogonei, nakai la katoa e 250 e tau, kua fitā e maaki mo e ai maeke ke kitia e tau matatohi.