Ko e Tala Kua Lata

Mua atu e Tohi Tapu ke he tau tohi fakalotu oti. Nakai fai tohi foki ne kua fakavē ki ai e tau taofiaga he tau tagata tokologa he magahala loa lahi. He taha faahi, kua nakai fai tohi ne lahi e kumikumi mo e loga e tau tala ne fakatūtū ki ai.

Ma e fakatai, kua fakauaua e falu tagata pulotu ko e mena hako nakai e tau Tohi Tapu he vahā nei ke tuga e tau tohiaga fakamua. “Ai iloa e mautolu kua hakotika nakai e puhala ne liu a mautolu tohi e tau kupu ke tuga he tohiaga fakamua,” he talahau he taha porofesa ne kumikumi ke he tau lotu. “Moua ni a mautolu he tau lagaki ne loga e tau mena hepe i loto, ti laulahi he tau mena ia kua leva e utakehe mai he tau tohiaga fakamua he tau puhala kehekehe ne afe mo afe.”

Ko e falu ne hūhū, na hakotika nakai e Tohi Tapu ha ko e feakiaga fakalotu ha lautolu. Ma e fakatai, ko Faizal, kua fakaako he haana magafaoa ne nakai ko e tau Kerisiano, ko e Tohi Tapu ko e tohi fakatapu ka kua fai hikiaga. “Ko e fua, kua tuahā au ke he tau tagata ne fia tutala ki a au hagaao ke he Tohi Tapu,” he talahau e ia. “Kakano ha kua nakai moua e lautolu e Tohi Tapu mai fakamua. Kua hiki tuai!”

Fai kehe kia kaeke kua hiki e Tohi Tapu po ke nakai? Manamanatu ke he tau hūhū nei: Falanaki nakai a koe ke he tau maveheaga mafanatia he Tohi Tapu ma e anoiha, ka ai iloa mooli e koe na tohi nakai e tau maveheaga ia he tohiaga fakamua? (Roma 15:4) To fakaaoga nakai e koe e tau matapatu fakaakoaga he Tohi Tapu ke taute e tau fifiliaga aoga ke he gahua tupe, magafaoa po ke tapuakiaga kaeke ko e tau Tohi Tapu foou ko e tau lagaki ai hako ne fakamau hifo he tau tagata?

Pete kua galo e tau tohiaga fakamua aki he Tohi Tapu, kua maeke a tautolu ke fakaaoga e tau lagaki tuai​—putoia e tau fakamauaga tuai ne loga lahi he Tohi Tapu. Maeke fēfē e tau fakamauaga tuai ia ke nakai popo, hao mai he totokoaga, mo e tau laliaga ke hiki e tau kupu? Maeke fēfē e haoaga he tau fakamauaga tuai ia ke atihake e haau a mauokafua na hakotika e Tohi Tapu he vahā nei ne moua e koe? Manamanatu ke he tau tali ma e tau hūhū ia he tala ka mui mai hagaao ke he kautūaga he Tohi Tapu.