Vala 4

Kua Fakailoa Mai he Atua ki a Tautolu e Hana a Finagalo

1, 2. Iloa fefe e tautolu kua foaki he Atua e tau tali ki a lautolu ne ole fakamakamaka?

KO E Atua fakaalofa kua fakakite fakamoli mai e hana a finagalo ki a lautolu ne kumi fakamakamaka ki a ia. Ne foaki e ia ke he tau tagata ne manako e tau tali ke he tau huhu tuga e, ko e ha ne fakaata ai e matematekelea.

² Kua fakakite mai he Tohi Tapu: “Kaeke ke kumi e koe a ia [Atua], ti moua e koe a ia.” “Ka e ha i ai e Atua ke he lagi kua fakakite mai e tau mena galo.” “To nakai ni eke he Iki ko Iehova ha mena, ka e fakakite ai e ia hana finagalo ke he hana tau fekafekau ko e tau perofeta.”—1 Nofoaga he Tau Patuiki 28:9; Tanielu 2:28; Amosa 3:7.

Ko Fe e Tau Tali?

3. I fe ke moua e tautolu ko e ha ne fakaata he Atua e matematekelea?

³ Ko e tau tali ke he tau huhu tuga ko e ha ne fakaata he Atua e matematekelea mo e mena ka taute e ia hagaao ki ai kua moua mai he fakamauaga ne omoomoi e ia ki a tautolu ke he ha tautolu ni a mitaki. Ko e fakamauaga ia ko e hana ni a Kupu, ko e Tohi Tapu. “Ko e tau Tohi Tapu oti kana mai he Agaga he Atua ia, kua aoga ni ke fakaako ai, ke fakatonu ai, ke akonaki ai, ke fakailoilo ai foki ke he tututonu, Kia katoatoa ai e mitaki he tagata he Atua, kia taute ni a ia ke he tau gahua mitaki oti kana.”—2 Timoteo 3:16, 17.

4, 5. Ko e heigoa ne eke ai e Tohi Tapu ko e tohi kua aoga lahi?

⁴ Ko e Tohi Tapu kua moli ni ko e tohi kua mua atu e aoga. Kua ha ha i ai e hakotika he fakamauaga tuai he tau tagata mo e kua liu muatua atu ke he kamataaga he tufugatia he tau tagata. Kua fou foki, kua ha ha i ai e tau perofetaaga kua fai mena ke taute aki e tau mena tutupu he vaha ha tautolu mo e he vaha tata lahi mai foki i mua.

⁵ Nakai fai tohi foki kua ha ha i ai e tau talahauaga hako pihia ma e fakamauaga tuai. Ma e fakatai, ko e gahoa ni e tau vala tala he tau tagata tohi he vaha i tuai ne kitia. Ka e loga e tau vala tala, falu nakai katoatoa mo e falu katoatoa kua kitia he Tohi Tapu: teitei 6,000 he Tau Tohiaga Tapu Heperu (39 e tohi he “Maveheaga Tuai”) mo e teitei 13,000 he Tau Tohiaga Tapu Kerisiano Heleni (27 e tau tohi he “Maveheaga Fou”).

6. Ko e ha kua tali tonu ai a tautolu he vaha nei ko e Tohi Tapu kua hagahaga tatai tuga he magaaho ne omoomoi ai he Atua?

⁶ Ko e Atua Malolo ue Atu, kua omoomoi e Tohi Tapu, mo e kitia ki ai kua mauokafua e tau vala tala kua tokamau ai ke he tau lolomiaga vala tala ia. Ti ko e tau Tohi Tapu ha tautolu he vaha nei kua matamata tatai ai ke he vala fakamua he tau tohi omoomoi. Ko e taha fakamoliaga ne lagomatai a tautolu ke fakaaue ke he mena nei ko e falu lolomiaga he tau vala tala he Tau Tohiaga Tapu Kerisiano Heleni kua liliu muatua ai he taha e teau tau ke he magaaho ne tohi ai e tau tohi ia fakamua. Ko e tote he tau lolomiaga he vala tala he tau tagata tohi tala fakatufono kua tumau agaia ni e kitia ke he tau aho ia mo e ha ha i ai falu tagata tohi tala kua gahoa ke he senetenari fakamua.

Mena Fakaalofa he Atua

7. Laulahi fefe e uta fanoaga he Tohi Tapu?

⁷ Ko e Tohi Tapu kua kaputia ai ke he lalolagi katoa he fakamauaga tuai. Kua tohia ai ke he tolu e piliona he tau lolomiaga. Nakai fai tohi foki kua tata ke he numela ia. Mo e ko e Tohi Tapu po ke vala i ai kua fakaliliu ai ke he 2,000 he tau vagahau. Ti kua, fakataitai ai ko e 98 e pasene he tau tagata he palaneta ha tautolu kua moua ai e Tohi Tapu.

8-10. Ko e heigoa falu kakano ko e ha e Tohi Tapu kua lata mo e ha tautolu a kumikumiaga?

⁸ Moli ko e tohi kua talahau ai kua mai ai he Atua mo e ha ha i ai e tau fakamoliaga ki fafo mo loto he hako he fakamoliaga kua aoga lahi ke he ha tautolu a kumikumiaga.a Kua fakamaama ai e finagalo he moui, mo e kakano he tau tuaga he lalolagi, mo e ko e heigoa he vaha mai i mua kua taofi mai. Nakai fai tohi ke taute e mena ia.

⁹ E, ko e Tohi Tapu ko e matutakiaga he Atua ke he magafaoa he tagata. Kua fakakite e ia e tohi ki ai ke he hana gahuahua malolo, po ke agaga, mo e falu he tau tagata toko 40 ke taute e fakamauaga. Ti kua, vagahau mai e Atua ki a tautolu puhala mai he hana a Kupu, ko e Tohi Tapu. Kua tohi he aposetolo ko Paulo: “Ha kua talia e mutolu e kupu he Atua ne fanogonogo mai ai a mutolu kia mautolu, ti talia ai e mutolu nakai ko e kupu he tau tagata, ka ko e kupu he Atua, (ko e moli ni haia).”—1 Tesalonia 2:13.

¹⁰ Ko e pelesiteni ko Abraham Lincoln, he Tau Fahi Kaufakalataha, kua fakahigoa e Tohi Tapu “ko e mena fakaalofa mua ue atu he Atua ko e age fakamua la ia ke he tagata . . . Ka e nakai la iloa ia e tautolu e mena hako mai he mena hepe.” Ti ko e mogonei, ko e heigoa he mena fakaalofa maaliali nei kua talahau ki a tautolu ko e kamata fefe e matematekelea, ko e ha ne fakaata ai he Atua, mo e ko e heigoa hana ka taute ki ai?

[Matahui Tala]

[Fakatino he lau 10]

Ko e Tohi Tapu, kua omoomoi he Atua, ko e hana a matutakiaga ke he magafaoa he tagata