TAU VALA TALA I MUA | TAU FAKAKITEAGA OFOOFOGIA HE LAGI
Tau Hūhū Hagaao ki a Lautolu he Lagi
Kua fa manamanatu nakai a koe hagaao ke he lagi mo lautolu ne nonofo ai? Ka manamanatu, nakai ni ko koe ne pihia. Ke he tau tau loga, ne manamanatu teao e tau tagata ke he matakupu ia. Talitonu falu ko e lalolagi fakaagaaga ne nonofo ai e tau tupuna ti lata ni ke fakalilifu. Manamanatu falu ko e matakavi mafola ne fakahigoa ko e lagi, ne nonofo ai e tau agelu mo e tau tagata mitaki ne kua mamate. Ka e kitia he falu ko e lalolagi fakaagaaga ko e kaina he tau atua ne loga mo loga.
Tokologa e tagata ne talahau kua nakai maeke ia tautolu ke iloa ha mena taha hagaao ke he lagi, ha kua nakai fai tagata ne hifo mai he lagi ke talahau ki a tautolu. Kua nakai hako e manatu ia. Ne nofo a Iesu Keriso he fakatokaaga fakaagaaga, po ke lagi ato hau a ia ke he lalolagi. Ti talahau fakatonu e ia ke he tau takitaki lotu he senetenari fakamua: “Ko e mena nakai hifo mai au he lagi ke eke ni hoku loto, ka ko e finagalo hana ne fakafano mai au.” Kua talahau e Iesu e tau vala tala ia he tala age ke he tau aposetolo haana: “Ne loga e tau mena ke nonofo ai ke he fale he haku a Matua.”—Ioane 6:38; 14:2.
Ko e Matua ha Iesu ko e Atua ne higoa ko Iehova, mo e ko e “fale” ha Iehova kua haia he lagi. (Salamo 83:18) Ti nakai fai tagata kua iloa ke fakamaama fakamitaki e lalolagi nakai kitia, ka ko Iehova ko e Atua mo Iesu Keriso ni kua maeke. Ne fakakite mai e laua e tau vala tala loga hagaao ke he lagi, puhala mai he tau fakakiteaga ofoofogia ne fakakite e laua ke he tau tagata tua fakamooli.
Ko e vala tala ka mui mai to fakatutala ke he tau vala he Tohi Tapu ne fakamaama e tau fakakiteaga loga ne kitia he tau tagata taane. He manamanatu a koe ke he tau fakakiteaga nei, manatu ko e lagi kua nakai ko e tuaga fakatino he tau mena ne maeke ia tautolu ke aamo po ke kitia. Ti nakai fifili e Atua ke fakamaama fakaagaaga ki a tautolu e tau mena nei ha kua nakai maeke ia tautolu ke maama, ka kua fakaaoga ai e tau fakakiteaga ke fakamaama e tau mena momoui fakaagaaga ke he puhala ke maama ia tautolu. To lagomatai he tau fakakiteaga a koe ke maama a lautolu ne nonofo he lagi ne “loga e tau mena ke nonofo ai.”